Mesbridjeye
Dins nos veyes, nos viyaedjes,
Tot esteut soriyant
L’ ovrî didins s’ manaedje
Tchantéve e travayant.
Asteure c’ est l’ noere mizere.
Tocosté, on djemit,
L’ efant brait après s’ pere
Et l’ moman après s’ fi.
A l’ apel del patreye,
I sont-st evoye tertos
Dins les plinnes ravadjeyes
Diner leu sonk por nos.
Mins gråce a leu coraedje
Nos pôrans co rtrover,
Do côp passé l’ oraedje,
Nos droets, nosse liberté.
Breyoz, mi tchere Beldjike,
So vos efants pierdous,
So vos viyès erlikes
Ki nos n’ rivierans pus !
Mins n’ rovyîz nén k’ l’ istwere
A letes d’ ôr vént d’ marker
Li bele grande pådje di glwere
Ki vs avoz merité.