Dj'astans an dîj-nûf çant nonante-trwâs. Ça fwèt ddja douze ans ku dj' m'ê mètu a scrîre a walon. Dj'ê apris a l' sucrîre avu Lucien Léonard, dès Rèlîs namurwès. Dju scrîjo avu sa sôrte du Feller, et avu l' accint èt les mots come dju cauzins a Transine.
Dj'ê don sortu touplin des bokèts aus rimes — dul powézîye, sabaye ? — des ptites flauwes èt racontroûles, et surtout trwâs lîves du scole « Ène bauke su lès bwès d' l'Ârdène ». Lu prèmî tôme è rèchu an 1984. Mês, a paurti d' 1985, dj'asto trop coûrt atèlé (kèstion pètsales) pour mi polu fé imprimer les deûs ôtes tômes. Et dj' avo dès ôtes cayèts a trèche. Dju tchandjo d' sôrte d' ovradje (mês toudi come ârtisse des biêsses). Èt co des ôtes rûjes. Dju n'ê pus seû scrîre a walon sèt′ wit′ ans au long.
Dj'ê rataké an dîj-nûf çant nonante-deûs, nonante-trwâs. Mês adon, dju wèyo ddja bin ku dju n' sauro aler bin lon tout scrîjant l'accint d' Transine. Dîj kilomètes pus lon, ç'astot ddja des ôtes pârlers.
Pou dîre lu vrêy, dju m'avo ddja siêrvu du walon d'Ôtchamp dins « Ène bauke… » èt du walon d' Tchonvîye èt du cé d' Masbour dins des ratoûrnadjes du « La Tchalète », ène binde d'imaudjes da Jean-Claude Servais, aplêdêye an 1984 dins les « Cayés walons ».
Ké gazète k'avot anoncé in concoûrs du pîces pou la radio ? Dju n' vous l' sauro pus dîre. Toudi è-st i ku dj'ê yu l'idêye du m' mète dins les rangs pou ç' concoûrs-la, avu ene pîce fwârt a paurt. Dju maudjino des djins d' nôs viadjes, ki cauzint come on cauzot lanawêre a Transine, Bèrtris, Forîre, Sint-Yubêrt et Warmich (cink walons mou diferins). Dju counicho ces pârlers la d'awèr oyu des djins dud la (Bèrtris, fwârt près d' l' accint d' Bouyon, et Forîre, pou la Faumène). Pou les ôtes, dj' avo lî des scrîjadjes d'après Sint-Yubêrt, Warmich èt ètou Bouyon.
Pou sawèr comint ç' ku dj'ê tchwâzi l' sudjet, alez vèy su la djîvêye dès lîves ruwêtés. Faut dîre k' on-z aprèstot lu nûf-çantime anivèrsêre du l'ènnaladje du Godfrwa d' Bouyon al prumîre crwazâde.
Dju t' dumande in pô ! Maudjiner la vicairîye du des djins d'avaur ci ki s' rutrovèt an-n Azîye Mineûre (la Turkîye d'asteure) an 1097. Faut-z èsse in fâmeûs franc tigneûs pou ‘nn’ amantcher des parèyes !
Nin sbarant ku dju n'auye jamês rin rseû du ç' bate du pîces radio la. Bin trop fû vôye !
Co yauk: dj'ê lêchu l'ortografîye come dju l'avo scrît adon (a in poy près). Gn è yu bin dtrop d' tchandjmints duspî don dins les Feller, èt dins tous lès sins′.
Asteûre, nu m’ vinèz nin dîre ku, l’an 1097, les djins d’ cès viadjes la cauzint ddja do walon come lu cé ramèchné paus linwincieûs au 20ime sièke. Dju l’ sé bin. Mês c’è-st ène ficcion, douwô ? On î fwèt ç’ k’ on vut !