Catrime tauvlê
Pére Biètrumé, Contrand, Tchon
P.B. ‒ Â, lès vayants ! On n'a wêre du chijeneûs, ènut′ ?
Ctrd. ‒ Tènoz, quî ç' quu v’là ! C’èst bin mossieû l’ Curé. Z-onz sté dîre mèsse amon lès gros, parèt, ènut′. Qué nouveles après mon cès djins-là ?
P.B. ‒ C'èst vos qu'èst l’ novale, mu fi. Vos èstez so totes lès boutches, vêlà. Min.me lu tchènon.ne d'Auch, l'ome qui scrît è latin lu paskée do pèrlinâdie po Baudwin du Stavelot, min.me li a oyu causè d' vos.
Tch. ‒ Djë v’ l’avos bin dit, là, mi. I va z-èsse counu coume lë mwês sou.
Ctrd. ‒ Bin vous l’ savîz bin, don, vous, quu dju scrîjos mès souvenances su l' pèrlinadje, pou qu' c’èst vous qui m'è n'né l'idêye d'aler ramèchener l'intche èt lès pâtchemins dins la maujon du vî notêre djwif du Wôms’ quu lès plérauds avint sgwardjé.
P.B. ‒ Vos savèz bin quu dju n' sé ni lire ni scrîre. Dju n' si qu'on curè dès p’titès djins. C'èst po ça qu'is m'ont voyè a pèrlinâdje. Si dj'aurès seû l’ latin, dju s'rès co à Sint Yubinrt à scrîre lu Can’tôriom’ du l'Abîe.
Ctrd. ‒ Èt mi, dju scrî bin, èt qu' dju n' sé nin l’ latin.
P.B. ‒ Ây mês, vos, non pus, vos-ètèz on fènomin.ne.
Tch. ‒ Un fénomin.ne, di-st-èle Filomin.ne, l 'êdante d'Ane Comin.ne.
P.B. ‒ Lu bwêçale du l'imp'reû ? Lèye ossi, i parèt qu'èle sucrît po s' pére; èt qu'èle nu dit nin qu' do bin d' nos-ôtes.
Tch. ‒ Lîye, dje la wâs toutes lès nët' dins mès rêves. Èle më vint choûter qui djoûe d' la lawoûde.
P.B. ‒ Sins v' cumandè, ô, Contrand, rud'sèz-m' co on pô quî ç' qui v's-avèt apris à scrîre. I m' l'ont d'mandè t’taleûre èt dju n'è savès rin.
Ctrd. ‒ Pourtant dju v' l'ê dèdjà ravaudé pus d' trêze côps.
P.B. ‒ Ây, dju sé bin, mês c'èst quu dj' rovîe, là, mi, à m’n-âdje.
Ctrd. ‒ I gn-avot in côp, là dès-ans èt dès razans…
Tch. ‒ (qui lî côpe lu chouflèt. I cause a grètant quéques notes su l 'awoûde)
Oyez oyez mès bounès djans:
La paskîe de trouveû Contrand
Qu'avot, rascontré ën-Almand
Ën-Almand qu'avot sté hagné
Hagné pa un tchin aradjé.
P.B. ‒ Hê, mès-èfants, i gn-a qu' fè d' djouwè o troveû. Dju n'èstans qu' nos-ôtes.
Ctrd. ‒ L'ome fijot l’ pèrlinadje à Sint Yubêrt d'Andauje, pour li n' nin atraper la radje.
P.B. ‒ Èt i s'avèt câssè l’ djambe, ènno ? Comint qu' ça s’avèt dèdjà fêt?
Ctrd. ‒ Il astot prèssé. Il avot ratèdu l' dêrin moumint pou fé l' pèrlinadje.
Tch. ‒ I gn-è dès moumints pou lès pèrlinadjes, asteûre ?
P.B. ‒ Po Sint Yubinrt, i faut toutchè lu Sinte Sutofe dins lès quarante djoûs qu'on n-a sti hagnè.
Ctrd. ‒ Jusse, èt nost-ome, li, i n' lî n'mèrot pus qu' deûs djoûs. Quand il è yu arivé ou Palijû, à l'anuti, i n'è nin volu r'prinde alène. Il è abruvé su tch’vau, èt hay daday pou la transin.ne.
Tch. ‒ I faut z-èsse fô gayot, dë s’aler mète an route pou la transin.ne par nët'. I n'avot qu'à v'në sẽ la Frantche Têre. Lès djans lî aurint chûr bayè la djîse.
P.B. ‒ Qu'èst-ç’ quu c'èst co, ô, ça, lu transène quu vos d'jîz t'taleûre ?
Ctrd. ‒ C’èst trans’ner tous lès bwès inte lu Palijû èt Andauje, quu c'èst griblé d’ leûps èt d' voleûs.
P.B. ‒ I n'avèt qu' à sire lu viye voye du Bouyon à Lidje, la qu'on dit pa dou ç' qu'on n-a raminè du Lîdje à Vèrdun lu vachê da Godfwad l’ Bossu, lu non.nonke du nosse Duc.
Ctrd. ‒ Têjèz-v', alèz ! Oûte du Palijû, c'èst payis d' frontires inte Lîdje, Namur, la Basse Lorin.ne èt la Tère du Sint Yubêrt. Dudpîs qu' lès sôdârs d'Albêrt du Namur ont passé par la pou z-ataquer Bouyon, on z-è lê la vôye à l'abandon. I gn-è pus nolu qu'i vut voyer sès djins à l’ kèrwêye pou l' aturtunu. Çu n’èst qu’ toutes fagnes èt toutes warbires.
Tch. ‒ Èt l'Almand, loû, dins tout ça ?
Ctrd. ‒ Vè mêyenut′, nost-ome arive à l’ cartchapèle du Mussi. I dit ène priyére à l’ Sinte Vièrje èt i continûwe sa vôye.
P.B. ‒ Poqwè n' nin d'mandè lodjis′ o tchèsté du Viance? C'èst so l' voye, ènno ?
Ctrd. ‒ Ây, mês on lî avot dit quu l’ tchèsturlin du Viance su n'mèfiot dès plérauds èt qu'i lès rassèrot deûs trwâs djoûs ou tchèstê pour li counuche lès pondants èt lès djondants d' leû voyadje. Il è toudi a l'idêye qu'on lî voye in plérau pou l'apwès’ner.
P.B. ‒ Adon, nost-ome ?
Ctrd. ‒ Adon, i falot passer l 'êwe-du-lèsse. Aus Wés d’ Bouyon, c’èst toutes fagnes. C’èst là quu l’ Duc Godfrwad s'avot afagné in côp qu'i ruv’not d' Lîdje, èt qu'il avot d'vu lodjer à Viance. L'Almand è sî l 'êwe-du-lèsse jusqu'ou Wé-z-è-nwârins. Là, c’èst toutes pîres.
P.B. ‒ Su tch’vau s'avèt apité dins one pîre, ènno ?
Ctrd. ‒ Jusse! Wèyèz bin qu' vous 'nn’ onz co souvenance. Il è v’nu in tèribe oradje. Lu tch'vau è sté sêsi pa l'alumwâre èt sbaré pa l'atounwâre, èt i s'è awaré. L'ome è sté bèroûdé èt i s'è v’nu tchoker suconte d'ène grosse pwintûye pîre. Sa djambe è sté kwachêye. L'ome chalot djus, mês i s'è tout l’ min.me trin.né jusqu'ou viadje. Il è r'monté toute la Fau Mayau èt tous lès Rouvros inlà. C'èst d'ssu l' soû d' nost-uch qu'i s'è lê flacher djus, pou qu’ c'èst nous-ôtes la prèmîre maujon du viadje.
P.B. ‒ Èt v’ n’avèz nin u peû d'on-ome tot man.nèt qui vnèt bouchè à l'uch do l’ nut′ ?
Ctrd. ‒ Çu n' astot d’djà pus la nut’ Ç'astot à l’ pikète du djoû. Dj'avos sté cîlé ène bressêye du gngnêsses ou Rouvro por stèrni nosse gade. L'ome astot pus mwârt quu vike, avu sa grande cote du pléraud toute plin.ne du bôje, fine kuchèrêye ou d'zous paus ronches èt paus sticots, èt avu in grand cinq su la gavêye.
Tch. ‒ Il astot aranjé, ’ndon, cët-albran-là ?
Ctrd. ‒ Vous santèz bin! Awèr crawyé dins lès nwârs bwès toute la sinte nutîye.
P.B. ‒ Vos compurnîz bin ç’ qu'i d'sèt ?
Ctrd. ‒ Nin d' trop. I chamârdot jusse quéques mots d’ lorin. Asteûre quu dj'ans fwêt l’ pèrlinadje avu tous-Almands, dj'ôs bin qu'i causot come lès cés d'Ârèl qu'ont sté spètés à l’ Crauye dès Roudjès Vaus.
Tch. ‒ Mëssîre Contrand, vous sôtez d’ëne brantche à l'ôte ! Dijez-nous ç’ que v’s-onz fwêt avë l'Almand.
Ctrd. ‒ Dj'avins alumé in bon feû. Avu la tchaleûr du l'asse, fin hodé qu'il astot, il è tumé flauwe. Il è n'mèru adwârmu tout-d-djoû èt toute nut′. Dju l'ans wâyé, avu nosse mére, tchèquin nosse toûr. Sa djambe avot inflé, èt èlle astot toute bleûwe. Tout l’ min.me, vè lès-êreûs du djoû, i s'è ranêré.
Tch. ‒ Èt sa djambe toute apitëmée ?
Ctrd. ‒ Têje-tu, hê, twè. Lu pus bê n'èst nin co oûte. Nost-ome astot r’bouteû. I counichot l' nom dès plantes dins tous lès pârlers. « Vous quêre toubac’ à Djauque; toubac′ à Djâque, mèrci » qu’i m’è bèrdèlé.
P.B. ‒ Èt vos c'nuchîz bin lès plantes po médiè, vos ?
Ctrd. ‒ Dj’ê sté n’mandé à ène vîe fame qui n’mènot dins lès bwès d’ Tchan.mont. On la loumot « la Sprive », mês s' nom d' batème, ç'astot Djèn'vire. Èle avot toutes sôrtes du possons avu dès-iêbes souwêyes. Èt quand ç'astot la sêson, on ’nn’ alot quêre dins lès bwès èt lès fwès. Jusqu'aus fagnes du Bèlègne, oûte du Glêreûse, qu'on z-è sté pou ramasser aus cawes-du-r'naud.
P.B. ‒ Èt l'Almand, il è d'morè longtimps clawè là ?
Ctrd. ‒ Du pus d’èn-an, lu timps qu' sa djambe su r’ssôde. Èt c'èst su ç' timps-là qu'i m'è apris à scrîre.
P.B. ‒ Qu'èst-ç' qu'i scrîjèt bin s’i n' savèt nin l’ latin ?
Ctrd. ‒ I scrîjot lès lètes; il avot apris à scrîre lès noms d' plantes : dins toutes lès langues, come il oyot qu'on d'jot.
P.B. ‒ Èt v’s-avîz dès pâtchemins, vos-ôtes ?
Ctrd. ‒ Non.nè. Dju scrijins s' la tère. Après, dj'ans sté quêre dès plates sucayes ou Bwès-è-ban, èt dju scrijins d’ssus avu dès bokèts d' pîre, Adon, dju n'avos jamês pont veû d’ pâtchemin d’ ma vîe, don, mi.
Tch. ‒ I faut wâr, asteûre, lë moncê qu'il è scrît. Tënez, vou-lès-ci ! (I fourguinèt dins lès papîs) A l’ lêd bozon !
P.B. ‒ Ça, c’è-st-one ôte sôrte do pâtchemin parèt.
Ctrd. ‒ Âwây ! cèt-là, dju ‘nn’ ê èrité d'ène maujon du-d-dulé Nicodèmîe. Lès plérauds î v'lint foute lu feû. Dju l'zi ê n'mandé pou ‘nn’ aler in pô randacher d'dins duvant. Ça d’vot z-èsse in scrîjeûs, û in notêre ossi. Wê qué qualité d’ papî.
P.B. ‒ Ayi, c'èst brâmint pus fin qu' nôs gros spès pâtchemins.
Ctrd. ‒ Is loumèt ça du papî arâbe; du l’ cârte, s'apinse qu’is d'jèt.
P.B. ‒ Donèz-m’-è in fouyoû. Dju l' moustèrrê o mwin.ne qui scrît lu Can’tôriom′ po l’ Abé d' Sint Yubinrt, on côp qu’ dju sèrans rarivès.
Tch. ‒ Djë n' sans ni co arivés èt vous causez d'jà d’ araler !
P.B. ‒ Plê-st-à Diu, dj'îrans à Yèrosalèm′, èt dju rvinrans à Sint Yubinrt.
Ctrd. ‒ Ây, tês′, plê-st-à Diu !
Tch. ‒ Dj'îrans èt dj’arîrans, padje à môrt !