Trwâjime tauvlê
Contrand, Tchon, Tîri d' l'Alou, Djihin.ne
Dji. ‒ Èt qwè, Contrand? Tu m’ès scrît la paskêye quu tu m’ dijos èrsè ?
Ctrd ‒ Tês′ qu'ây, don! Tu sés bin quu dju n' si nin ome à r'mougner ma parole.
Dji. ‒ Quî ç' qui d'jot t'taleûre : li ci qui n'a nin s' dit èt s' disdit n'èst nin d'avaurci.
Ctrd ‒ Hê, ma fîe, c'èst nin mi, là, qu' è dit ça. Pour mi, tu hantes du trop avu lès Fauminwès. C’èst yink du zês qu' è toudi ça à l' boutche.
Tîri (qui s' sint adusé) ‒ Â l’ vèraut d’ Ârdinwès ! Magneû d’ crompires ! Magneû d' cwârbaus !
Tch. ‒ Ça, ça n’è ni tëmé dins l'orèye d'un choûrd.
Ctrd ‒ Non.nè ca non.nè ! Dju lî r'plaquerans ou néz dins nosse paskêye, douwau, mussîre dë l’ Frantche Têre ?
Dji. ‒ Èt qwè, çu paskêye-là, c'èst pou ènut′ û c'èst pou n'mwin ?
Tîri ‒ Taudje on pô. Là l’ Bouyonès qu'aprète si bwès à musique. Sabay s'i ploûrè ç’ nêt-ci ?
Tch. ‒ Lès Romins noumant ç' cayèt-là « lawoûde ». C'è-st-inla quë t' dos dire si t’ vës fwêre dès fwêrîes dëvant lès bwéchèles.
Ctrd (avu èn-êr du deûs-êrs) ‒ Têje-tu, va, il èst bin trop vî pou ça.
Tîri ‒ To rovîe qui c'èst todi dins lès vîs possons qu'on fêt l’ mèyeûte sope.
Dji. ‒ Ây, mês quand on z-è dès djon.nes rucines pou mète dudins. Û in bê ochê, anfin.
(i riyèt; su l' timps qu'i causint, Tchon grète sacantes notes, pîs i djoûwe èt Contrand tchante.)
Ctrd ‒ (qui fwèt ène pitite vwas, come Djihin.ne)
Nosse mére nous l'avot bin dit
Du nous n'mèfier d' li.
Trop vayant pou z-esse onête;
Lès-omes, c'èst mou trête.
Trop bin moussé pou s' mustî,
Li qui s' dit mèstrî.
Vou-l’-là avu s' doûce alin.ne
Qui dit:…
Tch. ‒ (qui fwèt ène grosse vwas, come Tîri d' l'Alou)
Mi p'tite rin.ne
Vinèz v' porminè o bwès
Avou mi qu'èst Fauminwès.
Ctrd ‒
{{c|<poem>Nosse mére nous l'avot bin dit
Du nous n 'mèfier d' li.
Pour mi, Bûre èt Lèstèrni,
C'èst payis d' Tchini
S'apinsèt lès Fauminwès:
Tch. -
Vos-ôtes, Ârdinwès,
Z-astèz dès magneûs d' crompîres
Qui v'nèt inte lès pîres.
Z-astèz dès magneûs d' cwârbaus;
Ctrd ‒
Gâre aus-èfants d'Atrivau !
Nosse mére nous l'avot bin dit
Du nous n'mèfier d' li.
Dju n' l'ê nin volu choûter
Cè qu' c'èst qu' d'èsse maktée !
Dj'ê pris la tine èt l’ savon.
Tch. ‒
Coûr aus Wés-d'-Bouyon
Fê son.nance d'alè ol bwéye
Ratins-m' ol passéye
Muchioz voci l' tine èt l' bwéye
Et s' moussoz ol vîye viréye !
Ctrd ‒
Nosse mére nous l'avot bin dit
du nous n'mèfier d' li.
I causot come in maurlî
Li qui s' dit mèstrî
‘L avot rôlé tous costés
Jusqu'oûte du Nûvier.
Pour mi, Stègne èt Lès Batis
C'èst payis d’ Tchini.
Dju n' counu quu l’ Pré Douni
Qu'èst fin griblé d' fleûrs d'avri.
Nosse mére nous l' avot bin dit
Du nous n'mèfier d' li.
Tch. ‒
A l' fleûr qui n'èst nin d'avri,
Gn-è 'ne pitite sèris.
Qu'è v'nu ramechier du-d-tautoûr;
Fourguine la mwin d' v'roûle !
Ctrd ‒
Dj'a seû qu’ c'è-st-avu l' pèpion
Qu' la fame avot bon
Mi qu' n'avot counu d' plêji
Qu' d'awèr du l' tchaur pou mîdi.
Nosse mére nous l' avot bin dit
Du nous n'mèfier d' li.
Dj' ê co sintu d's-ôtes cayèts
Sins qu' dju n' wèche bin qwè.
Adon, dj'ê r'choûrbu na boutche
Et dj'ê r'nètié l’ roudje
Qu'avot anichté ma cote
Du-d-dû ç' quu ça sorte?
I m'è dit:
Tch. ‒
I n' faut rin dîre
Oudonhin ça v' costrè tchîr
Ctrd ‒
Nosse mére nous l'avot bin dit
Du nous n'mèfier d' li.
Dju n' l' ê nin volu choûter.
Cè qu' c'èst qu' d'èsse maktée !
Tch. ‒
Lu lon.nmwin, ‘l astot au djâle
Va-z-è vèy dû, djâle !
Lu trô d' l'eglîje astot voûde ;
L' bê timps astot oûte.
Ctrd ‒
Mi qu' crwayot qu' lès bês moussemints
N'alint qu'avu lès bones djins
Mosse mére nous l'avot bin dit
Du nous n'mèfier d' li.
Dju n' l'ê nin volu choûter ;
Cè qu' c'èst qu' d'èsse maktée
La s'mwin ne quu dju n' m'ê nin r'veû
Dju n'ê nin co seû
Qu' quand on n'è pus sès parints,
C'èst don qu'on ratind.
Tch. -
Mês quand cèst sté pou dabôrd
‘L è falu qu'èle su rassonre.
Ctrd ‒
Nosse mére nous l'avot bin dit
Du nous n'mèfier d' li.
Dju m' rassonre, c'est pou n'mander
N'mander pou m' marier
A in vî ome qui sposerot
La gade èt l' gadot
Dj 'avos dès rôyes à mès cwan.nes
Èt asteûre i m' san.ne…
Ctrd èt Tch.-
Quu l' plêji du l' vîye virêye
N'è vaut nin toutes lès kèrwêyes.
(Tchon crète co sacantes notes su l'awoûde; tourtous tchoke dins sès mwins)
Tîri ‒ Poqwè brèyez, ô, Djihin.ne ?
Tch. ‒ Pace que c'èst la përe vèrité.
Dji. ‒ Ây, èt, qu' sa mờ sté lon. (à Contrand) Èt pouqwè n'as′ nin dit quu l'vî ome, c'astot in saligot, avu dès-abitudes du vî djon.ne ome, quu dju n' vous-ôseros dîre. (…) Èt i m' rudinguot quausu tous lès djoûs; èt pou ène vèce mau toûrnêye, i foutot ène ratoûrnêye à l’ ganine, (…) èt s' la lêre sins mougner. Èle duvot aler tèter nosse gade du l’ nut′ pou z-awèr ôte tchôse quu dès flîmes dins su p'tit stoumac.
Tîri ‒ Èt comint t' ènn′ as‘ mètu cwite ?
Dji. ‒ Dju savos bin qu'il astot pris du keûr. Pa dès côps, quand i coûtchot avu mi, il avot témint mau la gavêye qu'i n' savot pus hay deûs trwâs djoûs au long.
Tch. ‒ Â l’ lêd cayèt ! Lë lêd cayềt avë !
Dji. ‒ Pus′ qu'il avot sté ardant, pus′ qui ça li purnot fwârt èt longtinps. In côp — ç'astot ou mwès d' mârs′ du l'anêye passé — dju l'ê spani in mwès au long. Pou ène vèce mau toûrnêye, dju lî quèros misére. Èt à l' nut′, dj'alos coûtcher toute seûle avu la gamine ou fourni. Dju nous-î rassèrins avu in doube lokèt.
Tch. ‒ Qué coumèdîe. C' ére un plan nou s'aniquer sins vrêmint dôrmi s' sô, là, ça.
Dji. ‒ Il astot dèmonté. Co trêze côp qu'i mè volu stran.ner. Pour mi lî chiper fû dès mwins, dju li d'jos: « dumwin, dumwin, dju tu l’ garanti ». Après in mwès du s' comèdîye-là, dju m'ê lê fé. Dju l'ê astchaufé come ène biêsse. Il astot tout piêrdu. I rûtiot come in goudi. Ou mounint qui s' plêji lî è v'nu, il è bwâlé come in bouc qu'on stran.ne: Âââââ !
Tch. ‒ Â l’ niche goudi !
Dji. ‒ … èt i s' tunot la gwâdje avu sès crawyeûs dègts. Il è tumé djus du l' bèderîve, a tère. I n' è nin ruspité. Il astot mwârt.
Tîri ‒ Li Bon Diè s'n-âme, èt l’ Djâle sès-ochês !
Tch. ‒ Pou fwêre dès p'tits mantches de coutê ! (…) (in mounint) Il î è léchi la osète, ma pauve djans. C'èst l' Bon Diu qui l'è pûni.
Ctrd ‒ Reqwièscât′ in′ pâché. Âmèn′.
(In p'tit moumint sins rin dire)
Tch. ‒ Â l’ vî ganache! Bin il à co sté vite voûye.
Tîri ‒ Z-astîz tranquile, adon, parèt, Djihin.ne ?
Dji. ‒ Tranquile ? Tranquile ? Dju v's-î vôros bin vèy, là, mi, vous-ôtes !
Ctrd ‒ I v's-avot lê du bin ?
Dji. ‒ Dj'avos èrité d'ène gade, ène augne, deûs troûyes à couchè, èt deûs djoûrnaus èt n'mi d' sâkés tchamps à Hanwêde.
Tîri ‒ Èt poqwè n'as′ nin d'morè lauvau à mode ti gade, à djetè tes couchès èt ‘nn′ alè ol foûréye po tès lapins ?
Dji. ‒ Dịu vôros bin v's-î vèy, là, mi, vous-ôtes.
Tch. ‒ Oyi, pouqwa?
Dji. ‒ Bin pace quu dj' n'avos nin la consyince tranquile, là, mi. Pou dîre lu vrê û ç' qu'il èst, c'è-st-in pô come si ça s'rot mi qui l'aurot yu touwé.
Tîri ‒ To n'avéves qu'à t'alè k’fèssè, èt on n'è causéve pus:
Dji. ‒ C'èst ç' qui dj'ê fwêt.
Tîri ‒ Èt bin dabôrd ?
Ctrd ‒ Èt qu'èst-ç' qu'i t'è n'né pou pènitince ?
Dji. ‒ I m'è n'né la plantchète.
Ctrd ‒ T-i possibe, bin chûr !
Dji. ‒ Pou qu' dju vous l' dis !
Tch. - Bin d' ma vîe !
Tîri ‒ Èt qu'as′ fêt, dabôrd ?
Dji. ‒ Dj'î ê rusté pou fé mès paukes. Dju brèyos come ène madelin.ne.
Tch. ‒ Alôrs, pou ta pènitance ?
Dji. ‒ I m'è voyé a pèrlinadje à Yèrousalèm.
Tîri ‒ Qwè? C'èst po ça qu' t'è-st-avou nos-ôtes. To n' mi l'avéves djà jamês dit. Â qu' lès coméres sont catchètes !
Ctrd ‒ Dju l’ vus bin crwâre. C'èst l' moumint qu'i bassinint tout tchamp tout payis pou l' pèrlinadje. Il aurint baujé ène gade inte sès cwan.nes pou z-awèr dès plérauds.
Tch. – Insi, djë t' dëmande ! Èt dîre qu'on z-avot dësfindë l' pèrlinadje aus couméres.
Dji. – Dju n'astos pus coumére, pou qu' dj'avos ène gamine du chîs-ans. I m'è dit qu'an purnant la gamine avu mi, on m' lêrot tranquile. Quu dj' n'auros qu'à êder à l' bwêye èt à l' popote dès sôdârs.
Tîri – Èt to l'zî fês ôte tchôse qui leû popote ?
Dji. – I faut bin viker, là, valèt. On wèt bin qu' tu n' sés nin ç' quu c'èst, là, twè, d'alver dès-èfants quand on crève du misére. Dj'in.me ostant qu' la gamine sôye bin r'pachêye, èt d'awèr dès p'tites massales toutes roujelantes quu d'èsse sublarîye èt tchîe-viêr, come quand dj'astins à Sètcheri. Min.me si, pou ça, dju dos ‘nn′ aler trin.ner.
Tîri – T'aurîz co bin l' plantchète on-ôte côp, là, non pus.
Dji. – C'èst pou ça quu dju n' va pus à k'fèsse. Èt quand dj'ê fwêt mès paukes çute anêye-ci, dju n'ê rin dit d' tout ça. (…) Mês dj'ê promètu quu quand dj'aurins rabrèssé l' tombau du Cris′, dju n' f'ros pus dins cès cayèts-là.
Ctrd – Dju n'î astans nin co, là, non pus, su l' tombau du Cris′. Èt si dj'î v'lans ariver nin trop hodés, i n' faurot nin racachîjener tous lès djoûrs come ènut′. Wête in pô la vôye quu l' Tchaur Peûtchèt è djà fwêt dupîs l'anuti.
Tch. – Bin vou-t'-là bin ! Pouqwa n' ni parnëter dé l' fû. I fwêt mou friskë, anët'. Të n'ès toudi rin à z-alkiner pou d'mwin, èndon ?
Ctrd – Rucatche lu feû èt s' tu tês. Dju si fin hode, sés’, mi.
Tîri – Èt mi avou, dji so fornauji. Dj'astans vôye, Djihin.ne ?
Dji. — Dj'in.me ostant. Jusqu’à, savèz, mès djins !
Tch. ‒ Bone nët′. C’èst quand vous v'lèz, don, Djihin.ne pou z-oyë vosse paskîe.
Ctrd – Ratche co cès quéques coches-là, hê, twè. Ca n'è nin co r'ssouwé pa drî 1ès-oreyes èt ça vôrot djà aler aus couméres.
Dji. ‒ Nu l’ kuboutez nin insi, don, Contrand. Dju r’vêrê co in côp à l' chîje dé vous, si Tîri m'î vut bin amon.ner, ca lès pasês n' sont nin trop chûrs, dourê, Tîri ?
Tîri ‒ Si l’ Bon Diề l' vout bin. Dji n’ vikerans moton pus n'mwin.
Dji. ‒ A quand l’ Bon Diu l’ vôrè bin, dabôrd.