Deûjime tauvlê
Tîri, Contrand, Tchon
Ctrd. (tout bas à Tchon) — Wête in pô ç't-ome-là bin rassonré qui gangne pavaurci.
Tch. — Ây, tês′; il èst mî aguintchi k' nous-ôtes. I n'èst ni a pènayons, la, loû.
Ctrd. — Çu n'èst chûr nin yink du nosse pèrlinadje qui sont tourtous à lokes èt à furlotches.
Tch. — I d'jant qu'i s'okëpe dès tch'vaus dou Dëc. I lès strîe èt i lès sougne à l' nët′, èt i lès mwin.ne à pachi quand i r'përdant alin.ne pou quéques djoûrs.
Ctrd. — Ça s'rot in tch'valî, dabôrd ? Ça s' pôrot moutè bin. Èt qu'èst-ç' qu'i vint fé ciddé ?
Tch. — Il è oyë dîre quë dj'êrins dë s' payis, èt i vint pou coupiner un moumint avë twa.
Tîri (qu'arin.ne Contrand su l' pîd su l' tchams) — Èdou as′ apris à scrîre, hé, ti, Transène?
Ctrd. — Ployez la djambe si vous l' v'lez sawèr. Èt purnèz ène sucûlêye du nosse toûyisse, si v' n'astez nin nareûs.
Tîri — Qu'èst-c' qui c'èst d' ça po ‘ne saqwè?
Ctrd. — Ène vîe r'cète du Sarazin. On prind dès paumes du froumint qui sont co toutes vètes, ène bone pougnêye. On lès passe duzeûs l' feû pou qu'i lès aduse sins lès rosti, pou brûler les picats. Adon, on lès strîe dins ène tauye èt on choufule lès payètes vôye. Vous voûdez d'ssus ène goute d'ôle, èt lêre la tauyêye su lès bréjes. Adon, vous câssez èn-û û deûs, si vous ‘nn′ onz. Après, vous n'onz pus qu'à toûyer èt à v' raspèpier, si c'èst vosse gout. Tunez, là in cawet pou mougner: c'èst pus comifaut qu' sès mwins.
(On n-ôt Tîri qui râcule la tauye avu l' cawèt, èt qui mawîe)
Tch. — Qué ragaume! Léchis-m'-a ‘ne raguërnète à r'lètchî.
Tîri — To causeréves come nos-ôtes, ti, m' fi, dji dîréve qui t' provins di J'mèle, qui c'èst dès ralètcheûs d' pèle. Tins, vo-tèl-là t' rawète.
Ctrd. — Èt qu'èst-ç' quu vous d'jez d' nosse nouvê payis ?
Tîri — I sont tofêr pus avancis qu' nos-ôtes. Wête lès dinréyes qui sont d'jà pauméyes, èt qu' dji n'èstans nin co à l' Pèn'cosse. Èt s'i ploût di-d-ci à l' Sint Djan, dabôrd ? Il auront l' coye po fè l'awous′.
Ctrd. — C'èst drole ca toudi. Dj'ê idêye qu'i f'jèt d'jà l'awous′ ou mwès d' mêy, èt qu'i batèt ou mwès d' jun.
Tîri — Tènoz, tènoz! Ayi, ç' côp-là, c'èst mo drole.
Ctrd. — Quand dj'ans arivé l'anêye passé ou mwès d'awous′, il avint d'jà ragrègné t'tafwêt.
Tîri — T'tafêt èstéve à cwète. I p'léve ploûre, dabôrd.
Ctrd. — Z-onz ça d' bê a ç' payis-ci. Dju n'ans nin oyu ène sâkée pluvinète du mwès d'avous′ jusqu'ou mwès d'octôbe.
Tîri — I d'véve fè sètch, dabôrd ?
Ctrd. — Sètch come Sètcheri. Z-onz chûr oyu causer du Djan-R'naud dès Fwatès Tères, qu'è d'mèru raclôs sins-êwe avu lès Longûe-Bârbes èt lès-Almands ou tchèstê d' Sèrigôde ?
Tîri — In maufiant qu'a r'toûrè s' fraque. Ayi, mon Diè, ç'a stî bassinè assèz quand dj' ratindins à Constantinope. Qu'i s' vaye fè coru arèdji !
Ctrd. — Ç'astot ou mwès d' sètimbe. Il aurint yu paké avu l' Djâle pou qu'i gn-è vinche ène bone walêye. I gn-è dès cés qu'ont moru d'zêwés duvant qu'i n' su rindinche.
Tîri — I vaut co mî mori d'zêvè qui spètè.
Ctrd. — Ayi, ca i 'nn' ont sin.né mwintes, lès canvolants, quand lès nôs s'ont yu rindu. I gn-è qu' lès djon.nês èt lès fames qu'ont sté spaurgnés. Dju l' vus bin crwâre ! I gn-avot djà qu' ça à rapwârtu come bûtin ou Prince Ârsin.ne.
Tîri — On n-a brûtiè ossi qu'i gn-a dès ma-seûrs qui n' s'enn' ont nin plindu.
Tch. — Oyi, èle ant tout d' chûte tapé leûs cotes padrî lès hôyes èt lès bëchons.
Ctrd. — Lès djon.nês ont sté r'vindus su lès martchîs dès payis qui sont aus-êreûs du djoû, là d'èyû ç' quu lès Sarazins provenèt.
Tîri — Si lès sclâves si vindèt si bin, poqwè ‘nn′ ont-i tant touwé, dabôrd ? I n'avint qu'à lès vinde tortos.
Ctrd. — C'èst come pou lès biêsses: martchî counu, martchî foutu. Si lès martchands savèt qu' i gn-è n-è dès pèklêyes à vinde, ça n' vaut pus ène pouline du pouye. I d'jèt quu, quand il ont pris ç' payis-ci à l'Imp'reû Alèksi là ène quinzin.ne d'anêyes — ç'astot l' pére du ç' poûri goudi d'Arsin.ne-là qui c'mandot lès Sarazins —, i n-unn′ avint tant mètu su lès martchîs qu'in sclâve su vindot lu pris d'ène pwêre du savates.
Tîri — Chaque payis, chaque môde.
Tch. — Tchèque payis, tchèque môde, tchèque Almand, tchèque vôte ! (in moumint sins rin dîre)
Tîri (pour li tout seû) — Bin ây, là !
Tch. (min.me djeû) — C'èst ni rin ca c'èst pâs rin ! … Pârin d' Nolèvau.
Ctrd. (à Tchon) — Rumèt quéques coches ou bréjis′, Tchon. Lès nut′ sont co mou friskètes maugré tout.
Tîri — Ayi, on n-èdure co bin on p'tit feû.
Ctrd. (à Tîri) — Comint qu' ça è sté, vous-ôtes, vosse perlinadje avu les djins du Duc ?
Tîri — Oh bin, savoz bin, nos-ôtes, dj'èstans todi su tchamps su vôyes. C'èst todi à pô près lès min.mès tchîrîyes. Dj'avans stî ètrêtiès à ç't-ovradje-là. Là sacantès-anéyes — dj'èstéve brâmint pus djon.ne —, dj'avéve sitî disqu'à Rome avou Nosse Sîre Godfwèd. On voyadje tot-d-djoû. A l'anéti, on wête après one plèce à cwète, nin trop à tyinre, et avou dès pastèradjes tot près po lès boûs alè brostèyè.
Ctrd. — Vôs bûs sont co vikants ? Nous-ôtes, quand dj'ans sté arivés à Constantinope, ça f'jot dèjà ène hapêye qu'on l's-avot sôye-t-i vindu, sôye-t-i mougné. Adon, on z-è atèlé dès-augnes après lès p'tits bèrgas, èt dès mulèts après lès bègnons. Lès Bulgâres nu f'jèt bin qu'avu ça, zês.
Tîri — Dji v's-î vôréve bin vèy, là, vos, di fè satchè pa dès mulèts nos gros tchaurs à cwatès roûwes avou tot leû fornîmint. Dayeûr, i gn-a qu'one grosse mitan dès tchaurs qu'è-st-atèléye avou dès boûs. Li rèstant, c'èst dès tch'vaus d' trêt, avou dès gorhês modèrnes. Mês dès tch'vaus nèrveûs assèz po lès montè, s'i gn-è manquéve po lès sôdârs. Sovint, c'èst dès p'tits-Ârdinwès : i sont pus bas èt pus stocasses. Faut vey come ça satche su lès tyinres. Malèreûs, vos-ôtes !
Ctrd. — Si v's-onz dandjî d'in côp n' mwin pou lès striyer, vous n'onz qu'à m' fé houtcher. Dj'ê travayé du marchau dins l' timps, èt dj' counus in pô l' mustî.
Tîri — Si ça n' tènéve qu'à mi, ci s'réve bin vlètî. Mês vos n'avoz nin co drwèt di moussi o cam.m'mint dès sôdârs. I vont r'quèri qui v'avoz sti pâr trop longtimps o vèjenadje dès malaudes.
Ctrd. — Pou dîre lu vrê û ç' qu'il èst, dins nous-ôtes, i gn-è la mitan qu'èst rougneûs, èt l'ôte mitan peûyeûs.
Tch. (d'èn-êr grandiveûs) — Lë ç'të qu'èst rougneûs, qu'i s' grète !
Tîri — Parèt qui Nosse Sire va fè v'nu dès r'wèricheûs d' Constantinope. Il ont surtot peû dol tchamossûre: c'è-st-on fwârt lêd mau.
Ctrd. — Têjèz-v', alèz, vous n' p'lèz mau. Dj'ans bin viké d' pus d' chîs mwès dulé lès tchamoussés du-d-durî lès Crèsses, nous-ôtes, èt qu' dju n'ans rin atrapé.
Tîri — Ayi, dji l's-a vèyu après non.ne. I gn-a qu' zèls qui n'ont nin peû d' nos-ôtes. C'èst dès droles do grimancyins.
Ctrd. — Z-onz veû qu'il è vont a f'jant 'nn' aler ène târtèle. Quand lès djins lès-oyèt târtuler, i ‘nn′ ont peûr èt i s' sauvèt vôye. N'onz nin peûr d'èsse apèstifèré, vous ?
Tîri — Mi, dji n' pous mau.
Tch. — Pës mau! Pës mau! Pës-mau è tëmé a l'êwe.
Ctrd. — Pouqwè qu' vous n' p'lez mau ?
Tîri — Dji m' vos va mostrè one saqwè. (i tire one mèdaye du s' cô, dt i la fwêt chilter dins sa mwin)
Ctrd. et Tch. — Oooh!
Ctrd. — Pou vèy !
Tch. — Pou wâr !
Ctrd. — Bin d' ma vîe, djë n'ê jamwês veû yauk dë si bê !
Ctrd. — Tu n-diros du vrê ârdjint.
Tîri — Oyi, ço ‘nn′ èst. Èlle èst mirauculeûse. Èle mi dot wardi dès maus d' djins èt dès mau d' sints.
Ctrd. — Èt quî ç' qui v' l'è n'né ?
Tîri — On vî tchènon.ne, à Rome, quand dj'ans foutu l' vèye à feû èt à song. Il avint témint peû d' nos-ôtes ! Mês il î a mètu one clawe : si dji m' mètéve co avou dès cis qui distroujèt l' maujon dau Bon Diè, èle si r'toûnerît disconte di mi.
Ctrd. — Jésus′ Marîe Josèf ! Ça n' nous raguêyi wêre, tout ça. (à Tchon) Si tu nous djouwos, in p'tit-êr du bije, hê, twè.
Tch. — Dj'in.me ostant, tês′, mi ! (I prind l'awoûde èt i djoûwe èn-êr)
Tîri — T'è-st-on chaugnârd, ti, Transène. To n' m'as todi nin dit dou ç' qui t'avéves apris à scrîre, et vo-nos-là iute dol chîje, asteûre.
Ctrd. — C'èst pou v' fé ruv'nu èn-ôte côp.
Tîri — Å on-ôte côp, dabôrd !
Tch. — Oyi, djësqu'à !