Moussans e li ptite plaece ki sieve di teyåte. Li toele est toumêye ; i fwait tchôd ; i fwait bleu d’ foumire ; ci n’ est k’ breyåjhes, xhaxhlådes et tchawreyes.
Loucans d’’ on pô pus près ; djonnes et vîs sont st assious, strindous onk conte di l’ ôte, so des longous bancs sins poyire. Des ovrîs dvizèt d’ colons ; djonnes et wiyetes si contèt des riyotreyes ; des afrontés gaméns, li calote so leu tiesse, si tapèt des atotes.
On rôlmint d’ tabeur.
« Ké novele ? brait l’ djouweu. Est ç’ tot ? »
Li toele si leve ; on s’ tait. Tos les vizaedjes si tournèt viè l’ sinne.
Ki s’ î passe-t i ? Wai d’ tchoi, et portant bråmint.
Des marionetes amoussèt ou ndè vont, ratnowes d’ on fi d’ årca ki passe e-n on crok tchessî e leu tiesse ; ele djåzèt, — avou l’ vwès do djouweu, — tot pîtlant so l’ plantchî, tot s’ kitapant et tot ctournant leu tiesse a droete et a gåtche.
Mins, po les cis k’ loukèt, il avize ki les marionetes vikexhe. Ces bokets d’ bwès la moussîs avou des pîces di coleur, c’ est les « tchuvalîs » d’ i n a co pus d’ meye ans ki rivnèt disfinde leu tchestea, leu famile, leu-z oneur. La, c’ est Tchårlumagne, li grand impreur ricrindou d’ lådje et d’ lon. Cial, c’ est Tchantchès avou s’ rodje narene, si bleu sårot, si bounete et s’ gueuye a blame di franc Lidjwès.
E l’ clairté del lampe al petrole, ki rglatixh so l’ vroûl des manteas, so l’ keuve bén rschuré des casses et des curasses, djonnes et vîs rveyèt come e-n on sondje, li forfante istwere do tins passé.
Et, cwand c’ est ki l’ toele tome, elzî fåt on moumint po s’ rissovni d’ l’ ovraedje et des mås d’ tiesse, des stroetès rouwales et do grigneus tins.