Prumî tåvlea :
Pere Bietrumé; des djins, avou inte di zeles, Contrand et Tchon
Pere Bietrumé - Mes freres del Dutcheye[2], del Tere di Sint-Houbert[3] et d’ leus adjondances; et vozôtes, frés Lorins[4],
Enute, c’ est l’ dimegne di Påke. Mon Diu todi, mes freres, si dji rwaitans pa padrî ! Påke a todi stî on grand moumint po nozôtes.
Riveyans nos li dimegne di Påke did la deus ans. Dj’ esténs co tertos e payis. Des cis k’ i gn a avént fwait l’ måss ; des ôtes avént sårté leu pårt di virêye et il estént ki rwaitént li ptit wassin ki crexheut, mo volontaire. Åy mins non pus : avént i stî rpåcté les tombes di leus moirts, come i s’ doet ? Avént i, li samwinne di dvant, metou del påkete après les bondius po rbeni leus måjhons, come di djusse ? Kibén avént fwait leus påkes, po-z esse blantchi d’ tos leus petchîs ? Kibén, mel dirîz bén ? Cwantes ôtes avént leu vicåreye disbrôlêye ? Cwantes ki l’ Diåle s’ aveut ddja metou dins leu cour ?
Il avént minti å Bon Diu ! Il avént hapé l’ bén do vijhén. Il avént muchyî les djåbes di l’ awousse po n’ nén dner l’ déme å pikeu d’ l’ Abeye.
Des cis k’ i gn a alént vey li feme d’ on shabotî, d’ on bokion, d’ on fådeu tins ki s’-t ome dimoréve e bwès tote li sinte suminne. Dj’ a veyou des vîs djonnes omes ki fjhént avou des gades ‒ ki vos m’ fijhoz si må dire ‒ ki f’ sint avou les gades, di dj’ ‒ ’’in nomine Patris et Filii et Spiritu Sancti Amen’’ (i s’ segne) çou ki l’ Bon Diu a volou k’ on fjhaxhe avou s’ feme. Li Diåle aveut moussî e nosse coir, di dj’ ; li Diåle aveut moussî e nosse coir, avou. C’ esteut e moumint d’ Påke, la deus ans.
Riveyans nos, asteure, la èn an, cwand Pire l’ Ermite nos a houkî å perlinådie. Riveyans noste åme, noere come do tcherbon d’ fåde. Dj’ avéns tertos so l’ dos ene banslêye d’ petchîs. Dj’ esténs ddja so l’ voye di l’ infier. C’ est po nos è rhatchî foû ki Nosse Signeur l’ Apoisse, li Påpe Orban II ‒ ki l’ Bon Diu l’ wåde et k’ i vike tant k’ on l’ towe – nos a houkî so l’ voye di Djeruzalem. Dj’ avans dåré, dandjreus, mo binåjhes d’ esse cwites a si bon conte. Enocins k’ dj’ esténs ! Enocins catoize, avou ! Dj’ aléns a Djeruzalem come si dj’ åréns yeu stî a l’ fôre a Andadje. A tchaeke martchî, a tchaeke tchestea, a tchaeke bork ki dj’ rascontréns, les efants dmandént a leus parints: « Dijhoz, ô, nosse pere, est çki c’ est ciddé, Djeruzalem ? »
Ki n’ avans dj’ schoûté Nosse Sire li duk ‒ ki l’ Bon Diu l’ wåde et k’ i vike tant k’ on l’ towe ‒ ki nos a dit, cwand c’ est k’ dji nos avans ratroplé a Bouyon divant d’ end aller : « Ratindoz ! Vs avoz des djins a rlame, et cåzu pont d’ sôdårds. Kî çk’ årè l’ mwaistrijhe d’ ene cachounêye pareye ? Waitîz les, avou leus boûs, leus poyes et leus coshets. Schoûtez les Bouyonîs ki n’ ont k’ el linwe: (a rxhinant les Bouyonîs) « Est çki les biesses sont po-z endaler dilivrer li tombe do Criss, avou ? »
« Mi, d’ set i Nosse Sire li dic ki l’ Bon Diu l’ årde et k’ i vike tant k’ on l’ towe mi, dji sé k’ ça l’ zî vere bin a pont, por zes vike on mwes ou deus. Mes ç’ côp la, après ? Li djoû ki v’ n’ årez pus rin a mougne,-z irez sewe les ståles et les gregnes des djins. I s’ irant plinde amon leu prince, et i levre des sôdårs suconte di vos. Kî çki v’ dusfindre, adon ? Wåtî sins bins avou s’ pougnêye d’ sôdårs. I n’ a ddja pont pris d’ sous po les paye. Les pus foirts, les pus vayants, l’ Impreu – nu v’ fiyez james trop a li – luzî donere kékes pîces d’ ôr, et i s’ agadjerant avou ses sôdårs di mustî. » C’ esteut dive Påke del anêye passée. Ki n’ avans dj’ choûte Nosse Sire li dic ! Ki n’ l’ avans dj’ choûte, avou ! Tot çk’ i nos avet dit e st arrive, come d’ efet. « Li Bon Diu nos ahessere, enn’ aléns dj". Li Bon Diu nos ahessere avou. Åy mins non pus, po-z aveur dwat ås åjeminces do Bon Diu, i fåt aveur l’ åme prôpe et nete. Les cis k’ ont stronne les Djwifs di Wôms′ et d’ Mayince, avént i l’ åme prôpe et nete ? Les cis k’ ont spete leus femes et leus efants, avént i l’ åme prôpe et nete ? « Li ci ki s’ sieve del supeye perire pa l’ supeye » k’ il a dit Nosse Segneur li Cris′. Les cis k’ ont destroû les måjhons d’ Aseye, do côp k’ il ont u passe l’ êwe, avént i l’ åme prôpe et nete ? Les cis k’ ont pwine des bins d’ crusténs, meritant i d’ esse e perlinådje ? Les cis k’ ont broûle vikants des ptits efants d’ cwayants et s’ les ont fe greye come del tchår do botchî, meritant i co k’ on les lume pleråds? Li pancarou di Djan R’ nåd des Fwates Teres meritet i co k’ on l’ lume pleråd, dabôrd k’ il a rmougne s’ parole? Sins choûte les ruc’ mandes di Pire, ki Nosse Segneur l’ Apåsse nos a metou po c’ mande l’ perlinådje, il a volu ’ nn′ ale pwine por li tot seu li tchesté d’ Serigôde. Quand les nôs l’ ont u pris, i n’ avént k’ a dire messe po rmerciye l’ Bon Diu : il avént assez d’ cures avou zes. Santez bén ! Il ont passe leu tins a fere violance ås femes et a bwåre cekes et tonês. Li Bon Diu les a bin puni ! Li Bon Diu les a bin puni, avou ! Li Roudje Årsinne, li prince des Sarazins ki l’ Diåle li hatche e l’ infyinr ! a u bê djeu di rassere l’ tcheste, et s’ dusfinde ås nôs d’ ale poûje a l’ êwe e choûrd i gn a k’ cit la k’ est metou an d’ foû. Les nôs ont vitmint creve d’ se. Il ont touwe leus tch’ vås po bwåre leu song. Il ont rbeu leu propre pichate k’ i mu f’ sant si må dire . A l’ fin des féns, li marlouche di Djan R’ nåd s’ a rindu et a rtoûne casake: i s’ a metou avou les måfiants suconte do nozôtes. On paray meritet i co k’ on l’ lume pleråd? C’ est po tot ça ki l’ Bon Diu nos a puni. C’ est po tot ça k’ I nos a mine ve la Cråye des Rodjes Vås, ki c’ est tot tienes a pic des deus costes. C’ est ladde ki les nôs ont stî djondus, come Roland a Ronchevå. Po dire li vrê dou çk’ il est, c’ est l’ Bon Diu li min.me k’ a voye suconte del Djint Nosse segneur l’ osse des Sarazins. C’ est l’ Bon Diu li min.me k’ a volu k’ i soyiche supetes, come do såke bisteus. C’ est l’ Bon Diu li min.me k’ a volu k’ leus coir soyîche sutrames avå les bwès. C’ est l’ Bon Diu li min.me k’ a volu k’ leus ochês soyîche supårdes pa les såvadjes biesses jusk’ a so l’ såvlon djondant l’ grande êwe. C’ est l’ Bon Diu li min.me k’ a lê chape li pougnêye ki dj estans. Dj’ avans vike tot l’ ivyinr dins ces bwès ci, tot loketeus. Dju crevéns d’ fim; dji crevéns d’ fred. Dj’ åréns stî a Sint Yubinrt so l’ tchapistrê, les djoûs d’ perlinådje, on nos åre d’ ne des sous. Li pîs d’ tot, c’ est les vejéns ki l’ Bon Diu nos a d’ ne: les tchamosses did dirî l’ Cresse. Des si malådes k’ i f’ sant rôguie leus tårteles cwand i son st avå les voyes, po les djins n’ nén esse apestiferes. Ç’ a stî ça, la, nosse penitince, mes freres. Mês, come Nosse Segneur li Cris′ a d’ more twas djoûs et twas nute e tere et k’ Il a ravike li djoû d’ Påke, dj’ alans ravike, avou, mes freres. On-z ôt brûtie k’ nôs djins son st arives del ôte coste d’ l’ êwe. Qu’ i gn e n a des mile et des mile. Des Francs loréns, come nozôtes, et des Lîdjeus, et des Francs Almands, et des Tiyons, tertos ki choûtant Nosse Sire li dic Godfwad ki l’ Bon Diu l’ årde et k’ i vike tant k’ on l’ towe ; et i gn a co des Normans et des Romans ki son st avou s’ frere Bådwin. Et des Longûe Bårbes, et dji n’ sé co d’ tot qwe. I sont tertos prete a passe l’ grande êwe, po nos fere ravike, po fere ravike l’ perlinådje ki nos minere, avou l’ åjemince do Bon Diu, jusk’ a l’ tombe di Nosse Segneur li Cris′, k’ a ravike on djoû d’ Påke, come enute. C’ est po ça k’ enute, ça s’ re l’ pus bê djoû d’ Påke di nosse veye. Duvant d’ continuwe nosse messe, mes freres, dimandans e Bon Diu di nos spårgne del fureye di Roudje Årsinne et d’ ses Sarazins. Priyans tertos, mes freres: De furorum Sarasinorum, Liberanos Domine Tourtous Liberanos Domine P.B. Credo in unum Deum
Les pîs-notes, c' est l' ratournaedje del seccion « Les pondants et les djondants », pp. 34-40 del mwaisse ouve, la k' il estént scrîts e francès.
- ↑ Li dataedje di ces trevéns la est co mo spepieus, ca les minmes evenmints ont stî rapoirtés pa troes sôres di cronikeus : (1) les cis des princes d' Urope k' alént al croejhåde, ki tchaeke di zels aveut l' sinne; (2) li cronike bizantene d' Anne Commene et (3) les cronikes arabes, inte di zeles les cenes d'Ibn al-Qalanissi, di Damasse, k' aveut 26 ans e 1096, et k' est l' pus fiyåve.
- ↑ Dutcheye di Bouyon
- ↑ Tere di Sint-Houbert
- ↑ Djins del [[w:Basse Lotarindjeye|]]