Dins l' tins, on s' criyive bondjoû d' å lon.
Ça, dji vos l' pou dire.
Asteure, on s' catche po nel pus dire.
Avou ene viye coulote ou on vî paltot,
zels, on voeyeut çk' il avént padzeu,
mins nén çk' i gn aveut padzo.
Nos n' contans pus; nos estans des tårdous.
Mins, zels, croeyoz m', sont bråmint trop timprous,
paski nos lzî apudrènt co bråmint,
à totes ces djonnès djins.
S' i fwaiynut ene sacwè,
el fwaiynut d' triviè.
Mins, nozôtes, çou k' on fwait,
On l' fwait todi bén droet.
S' i cåznut avou vos,
c' est zels ki conoxhnut tot.
I djouwnut å tenisse, c' est çou ki savnut fé l' mia.
Nozôtes, on djouwéve ås måyes et on s' plaijheut co mia.
On aléve a scole avou des gros shabots;
mins zels ont må leus pîs; il î vont a velo.
Nos aléns al muzike po pleur djouwer do piston.
Asteure, c' est pus åjhey, i bôrnut sol boton.
Cwand passèt so vos pîs, ni pardon, ni s' vos plait.
Por mi, c' est l' monde insi; i fwaiynut çki lzî plait.
Dj' end a nén a tertos,
paski vos compurdoz,
ça dpind des parints;
s' i les ont apris insi,
c' est seur po todi.
Morålité :
On les a come on ls acleve.
Note Wikisourd
Eplaidî aprume so l' Aberteke (e 2006); ene miete ricoridjî vaici.