Li grandiveuse (rif. Sarachaga)/III

Èn årtike di Wikisource.
rortografiaedje da Pablo Sarachaga, e rfondou walon
TROEJHINME AKE

Minme decor k’ å  prumir ake ; On-z est li londi après-l’-dinner. — Å lever do rido, Dadite et Porea sont-st eshonne di foirt måle oumeur. Porea ki s’ a-st amuzé tård ni s’ pout tni a l’ ovraedje ; i foume si pupe a l’ tâve al hintche ; Dadite tote abatowe est ashiowe li keute sol tåve et l’ tiesse so s’ mwin.

SINNE I
POREA — DADITE
POREA
(I s’ vude ene tasse di cafè)

Djans, ni fjhoz nén ene mene insi, vos fjhoz la on vizaedje di procès-verbå… on direut on pourcea k’ a hagnî dvins ene seure peme… Torade Emile va rintrer… et s’ i vs voet d’ ene oumeur pareye vos lyi froz bén del poenne.

(i vout ndè vudî ene a Dadite, ele rifuze).
DADITE

Ô ! Emile n’ a-st avou d’ keure di m’ endè fé, lu, del poenne ! Les efants sont tertos pareys, vos vs sacrifeyrîz tote vosse veye coir et åme por zels, vos vôrîz bén lzès mete mî k’ vos n’ avoz stou et zels, cwand il ont l’ ådje el plaece do hanter ene sakî d’ adroet, ene djin d’ leu rang, i vont s’ abaxhî, s’ abastårdi, taper leus ouys so des Meliye Gårnir !

POREA (i boet)

Hey don Dadite, vos estoz soyante savoz al fén do conte… pa vola l’ cintinme feye ouy ki vos n’ ramtez k’ sol minme afwaire, vos m’ fjhoz ene tiesse come on saeyea !

DADITE

Ô ! nos savans bén k’ vos n’ avoz d’ keure dê vos ! I n’ vis è pind nén pus drî ki dvant, et d’ vosse fi vos n’ vis è tchagrinez nén pus ki si c’ esteut l’ grand Turk !

POREA

La, la, alez ! Vola ôte tchoi asteure ! Vos alez torade dire ki dj’ so-st on måva pere paski dji n’ barbote nén so

Emile tot come vos !