C’ esteut l’ ivier : li nive di s’ blanc lénçoû
Covreut les tchamps, les måjhones et les coûs.
On pôve vî soverdea, dins l’ fond d’ on trô d’ mani
Si tneut racrapoté, cåzu presse a flåwi.
Pus rén po mete e s’ betch
Vinte plat et gozî setch.
Pierot, foirt anoyeu
S’ mete a cåzer tot seu :
C’ est on ptit accidint
K’ arive ås viyès djins.
« O ! ké guignon, dit-st i, ki l’ Moirt a pris l’ cinsresse !
A do tins come i fwait, leye, ele droveut s’ finiesse ;
Et di s’ mwin tcharitåve, ele mi spiyive do pwin.
Li boune djin ni pleut må di m’ leyî mori d’ fwin.
Mins asteure, ses efants, barbåres come des Teutons,
N’ ont po m’ fote didins l’ coir ki del simince di plonk.
Si dj’ saveu mes påters, dji preyreut bén l’ Bon Diè
Di m’ leyî tchaire do Cir sacwants ptits grins d’ miyet. »
Pierot etind do brut, i båye å boird di s’ trô,
Et ki voet i ? Kéne tchance ! on gros et bråve tchivå,
Ki, levant s’ cawe, lyi sieve on bon dinner tot tchôd.
Li moxhon s’ dåre dissu et s’ dispaitche a grands côps.
Betchant par ci, betchant par la,
Di ses pates rimouwant l’ moncea,
Spepiant padzeu, spepiant padzo
Po bén rnetyî tot l’ bon fricot.
Bén guedé disk’ a l’ djaive, i vout fiesti l’ banket :
I n’ fwait ni ene ni deus, froute ! al copete do toet
I zoupele
I tchîpele:
I tchîpele si bén
Ki Batisse l’ etind.
Batisse fwait des ptits pas
Etot s’ dijhant tot bas :
« A ! danse eco so l’ toet,
Marådeu d’ mes ptits poes;
Tådje ! dji t’ vas fé danser ti dierinne danse, tonire ! »
I prind s’ fizik, et panf ! vola l’ pôve biesse a l’ tere.
Moråle.
Cwand t’ as fwait bon dinner, ki t’ as bén neyî t’ soe,
Ni vas nén tchanter ça firmint so tos les toets.
Li dierin dinner d’ on soverdea
Ciste ouve ci egzistêye eto divins ds ôtès ortografeyes : Feller.Li dierin dinner d’ on soverdea