C' esteûve l'hivier : li nîve di s'blanc linçoû
Couvieûve les tchamps, les maujones et les coûs.
On pôve vî sauverdia, dins l'fond d'on trau d'mani
Si t'neûve racrapoté, causu prêt à flauwi.
Pus rin po mète è s'betch
Vinte plat et gozî setch.
Piérot, fwart anoyeû
S'met à causer tot seu :
C'est-on p'tit accidint
qu'arrive aux viyès djins.
« Oh! qué guignon, dist-i, qui l'Mwart a pris l'cinsresse !
A do timps come i fait, elle douvieûve si fignesse ;
Et di s'mwain charitâbe, elle mi spiyeûve do pwain.
Li boune djin ni pleûve mau di m' lèyî moru d'fwain.
Mins asteûr, ses èfants, barbares corne des Teûtons,
N'ont po m' foute didins l'cwarps qui dèl simince di plomb.
Si dj' saveûve mes patères, dji priereûve li Bon Diè
Di m' lêyî tchair do Ciel saquants p'tits grains d'millet. »
Pièrot ètind do brût, i bauye au bward di s'trau,
Et qui vèt-i ? Quéne chance : On gros et brave tchivau,
Qui, lèvant s'quewe, li siève on bon diner tot tchôd.
Li mouchon s'dare dissus et s'dispètche à grands côps.
Bètchant par ci, bètchant par là,
Di ses pattes rimouant l'moncia,
Spèpiant pa d'-zeûs, spèpiant pa d'zos
Po bin r'nètî tot l'bon fricot.
Bin guèdé jusqu'à l'djève, i vout fiester l'banquet :
I n' fait ni one ni deux, frout… al copète do twèt
I zoubèle
I tchîpèle:
I tchîpèle si bin
Qui Batisse l'ètind.
Batisse fait p'tits pas
Etot djant tot bas :
« Ah : ti danses su l'twèt,
Maraudeû d' mes pwès;
Taudje ! dji t'vas fé danser ti dérène danse, tonère ! »
I prind s'fizike, èt pouf! volà l'pôve biesse à l'tère.
Morale.
Quand t'as fait bon diner, qui t'as bin néyi t'swè,
Ni vas nin tchanter ça fiér'mint su tos les twèts.
Li dêrin diner d’on sauverdia
Ciste ouve ci egzistêye eto divins ds ôtès ortografeyes : Rifondou.Li dêrin diner d'on sauverdia