Li Tchârlote prèye Notru-Dame

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Rifondou walon.
Li Tchârlote prèye Notru-Dame
2020

Bin, rloukîz cisse trûlêye d'èwarés, ça bouhe djus… …èt ça rote si vôye sins minme si ristoûrner ! Iy, va don……sôlêye… …mâle pâye…

Awè m'cowe… cisse nut', on passe lès matènes ! On n' veût d filer qu' dès riboteûs…

Dji brêreû âs voleûrs… … â feû, qu' nolu n'î f'reû astème, dji creû !!!

Ah, mins riloukîz-m' çoula… c'èst l' Sint Mèyus'

(Ele rêye)

C'èst vrèy ; quéne arèdje, tot blame, tot r'lût

La wice qu'on magne, la wice qu'on beût, i-z-ont bin l' timps disqu'à passé mèye-nut'.

I n' tûzèt turtos qu'à on clapant magn'hon !

N'a plin d'djins d'vins lès rotih'rèyes,lès boldfrèyes, lès crâsse­rèyes !

Mum… …Qui ça sint bon so l' fiér dè feu, l'tchèvenêye……

(Son'rèye di clokes)

Mèye-nut'… Asteûre, li p'tit bounakèt a m'nou â monde !

Divins l'timps, qwand il a m'nou, po d'bon, s'i djaléve come i djale cisse nut' chal, divins lès strins dè stâ di djvâ, Vos n'avez nin d'vou avu bon, Jésus èt vos, Vièrje Marèye !

Mi, dji so la, Sinte Vièrje, à m 'cwène di vôye. D'pôye l'apèro, dji bate carasse.

Dji so-st-ine crape, ine fèye di rin, ine mamêye; mi, c'èst l'Charlote, come on m' nome…

Èdon qui vos n'èstez nin mâle, qu'ine fèye di djôye, plin.ne di pètchîs, vis djâze cisse nut', bin-à s'manîre, po mî v' raconter sès mizères…

Èdon qui vos n'èstez nin mâle ?

Èvôye la… bing… bang… vla qu'on m'kiheût avou dès lites, dès gros pans bènis… dès platês d' mosses di ritches…

Mins r'loukîz don, mâle panse di chamô !!!

Oh …pardonez-m', èscusez-m' Vièrje Marèye, dj'a co fèye dit dès lèds mots !

C'èst vrèy qui dj'a qwité l' mohone, mins çi n'èsteût mây qui teûle èt côps.

C'èsteût, dj 'èl djeûre l'infér, Sinte Vièrje. Dji v's-èl di sins-t-èsse èfrontêye, vos min.me n'î àreût nin d'manou.

Houtez, ç'n'èst nin dès racont'rêyes, c'èst vrèy! dj 'èl djeûre, Vièrje Marèye, mâgré qu'après, bin, dj 'a fèt l' vèye, dj'a tûsé à vos bin sovint !

Dji r'veû vosse bèle bleûve rôbe, vosse vwèle, minme qu'il èsteût tot k'sèmé di steûles, vosse bèle corone d'ôr so vosse tièsse, vosse pitit trézôr so vos brès'.

Et bin, si vos l' volîz Vièrje Marèye, fé cisse nut' chal ine saqwè por mi, po l' timps qui n' pout mâ dè riv'ni, vos n'avez qu'a lèver li p'tit deût èt sins v's-occuper dès moudreûs !

Oh… dji n' vis d'mande nin dès saqwès nin onièsse ! Vos f'riz seûl'mint qu' dji troûve èt qu' dji ramasse on pôr-manôye rimpli d' bilèts, pièrdou d'onk dès mouflâs qu' passèt !

A mi, pus vite qu'à on hoveû !

Ou bin adon, si vos n'volez nin, si vos n' polez nin, Vièrje Marèye, vos alez m' trover bin sins djin.ne, adon… fez-m' tot dreût fé l' dièrin hikèt… èt pwis… èminez-m' avou vos, prindez-m' divins vosse Paradis, la wice qu'i fêt tchôd, la wice qu'i fêt doûs, la wice qui mây pus dji n' f'rè l' vèye.

Oh awè ! èminez-m' s'i v' plêt, èminez-m' divant qui l' nut' seûye passêye, èt qu' dji n' seûye co 'ne fèye ramassêye, èminez-m' dihez, dji v's-è prèye, dj'ènnè pou pus, mi, dè tronler.

Tinez, èsprindez mès mins totes crèv'lêyes, dji n'a qu' dès p'tits solés d' coulêye, èt dj'a todi m' mousseûre d'osté, qu' dj'a fè tinde è neûr po l'iviér.

Oh, awè ! oh, awè ! èminez-m', dihez, èminez-m', èt come i deût-st-avou dèl vôye, si dès fèyes, vos v' sintez nâhèye, Vièrje Marèye, rimplèye di grâce, dè pwèrter à brès' vosse pitit - c'èst pézant in-èfant po fini -, bin vos m'èl donrez on moumint, èt pwis à m' toûr, mi dj'èl pwèt'rè, sins mây èl lèyî toumer djus, come qwand dj'èsteû mon mès parints, p'tite mame divins lès cazères, trimbalant mès frés po complêre.

Vièrje Marèye, plin.ne di grâce, qu'èst bènèye divins totes lès feumes, priyez po nos-ôtes, pôves pècheûrs,

Priyez po nos-ôtes, pôves pècheûrs, priyez po nos-ôtes, pôves pècheûrs…

Privez po nos-ôtes… pôves… pècheûrs…

(Ele rind l'âme)

Note Wikissourd
Richard Joelants (ratournant Jean Richepin), evoyî pal posse li 14 di djanvî 2020, mins dedja scrît (pol Rantoele) sacwants ans dvant.