Gn a nén yeu moyén di n' nén l' sawè. On nd a dvizè, on l' a scrît, on nd a vèyu des imådjes èyet on l' a fiestè. Qwè ? Bén el tite…
… di l’ Estandård di Lidje, èndo. Is sont tchampion d’ Beldjike èyet is ratindént çoula dispus bén longtimps. Chake anéye, on promèteut k’ el tite 'd aleut ariver. Mins l’ èkipe esteut trop coûte èyet les supôrters, yeusses, is n’ wèyént rén vnu.
El tite ki mankeut dispu 25 ans, i faleut l’ fiester. C’ est çk’ on a fét a Lidje èyet pattavå wou çk’ i gn aveut des supôrters des roudjes èt blancs. Les trinte prumirès pårtiyes, les djouweus les avént passé sins yesse batus. El shûvante esteut capitåle. Vos l’ pinsèz ! Erçuvwêr l’ eternel rival d’ Anderlek. Co mia : si Bruges pierdeut des plomes èyet k’ yeusses batént les måves, el tite esteut dins l’ potche des omes da Dono èt PDH. Mins vos savèz bén k’ avou des si, on tape Paris dins ène boutaye.
Eyèt pourtant, les « Rouches » ont rèvoyî l’ èkipe d’ el vile capitåle sins rén du tout. Ene passassion d’ pouvwêr ki fét co pus pléji. Èç djoû la, minme les minisses avént dècidè d’ ène trêve dins leus tchafiaedjes dissu BHV ou bén co l’ comunåtère. I gn aveut des céns k’ on wèt souvint dins les tribunes, mins ètou i gn aveut ds ôtes k’ ont vnu s’ moustrer pou-z awè des vwès pou yeusses ou leu pårti. Sifét ! Yin mindjeut des frites dins l’ pakèt d’ in supôrter, l’ ôte buveut ene boesse di cråsse pinte, el shuvant tchanteut èt danseut, èyet l’ cén d’ après rabrasseut in supôrtèr. Infin, is parèchént tertous binåjes del tournûre d’ el pårtiye.
El niût a stî longue. Li londmwin, les ouvrîs n’ ont nén boutè ttossi hardimint èyet les scolîs avént deur di shûre leu mwésse d’ escole.
Ene nouvele wadjûre [challenge] ratindeut pourtant l’ èkipe. Is årént vlu rintrer dins l’ ledjinde du fotbale beldje. I faleut pou çoula n’ nén piède in seul côp. Mins i dmèreut troes pårtiyes a djouwer. El shûvante, c’ esteut a Chålèrwè el dimègne 27 d’ avri. Rola, l’ Espôrting les a fiestè divant d’ cominchî. Mins les gades a rôyes estént bén dècidès a lyeu fé hagnî dins l’ yèbe du Mambour. A, i gn aveut d’ l’ ambiance ! Les « kop » des deus costés gueuyént d’ leus pus fôrt, chake pou-z ècouradjî ses djouweus préfèrès. Si les roudjes estént rvènus å marcwêr dissu in pènalti djusse divant l’ mi-timps… cand Kere a fét 2 1, el pårtiye des Carolos n’ ès tèneut pus, croeyant bén k’ leu Spôrting èdaleut rèyussi l’ esplwè. C’ est d’ ayeurs çu k’ a arivè.
O bén seur, du costè des Roudjes, on a sôrti des escuzes. Ki les djouweus estént scrans d’ leus sôrtiyes, k’ is distinkiént [décompresser], k’ is avént moens di concintråcion ou k’ on aveut jamés vèyu ène rimouye di fotbale [pelouse] totossi catastrofike (sifét ! c’ est Jovanovic ki l’ a dit). Tout çoula est toudi possibe, mins ene miète egzadjèrè. Ene afêre est seure, èyet ça sra m’ concluzion. Elle est toute simpe. Si on wéte les rezultats, l’ Espôrting di Chålèrwè est l’ seule èkipe ki, dins tout l’ tchampionat 2008, a batu les troes grands, c’ est a dire Bruges, Anderlek èyet l’ Estandård di Lidje ! Adon …
Mins bravo tout d’ minme å Standard pou l’ tite. Eyèt çu k’ i n’ gåte rén, c’ est k’ c’ est tout d’ minme ène èkipe di no payis walon.