El sordjant Garcia, tél on Zoro, a-st arivé ! L’ Union bedje di fotbale end a fwait l’ anonce ene samwinne après awè acertiné k’ elle ès separéve di l’ etrinneu Dominico Todesco.
L’ ome a stî tchoezi po esse el selecsioneu di l’ ekipe nåcionåle di no payis.
- Sereut ç’ on mia ? I gn a a-z awè di l’ espwer.
C’ est on Francès k’ a 60 ans (adon ki l’ ôte n’ end aveut ki 39).
L’ ome doerè don rfé brotchî el flame di nos Rodjes Diåles divant d’ ataker les Oukrinnîs, les 20 eyet 23 di måss, dins les båraedjes po dmorer dins l’ like A. Mins i dvrè sortot arindjî l’ preparåcion di l’ ekipe nåcionåle po les cwålificåcions del cope do monde di 2026, eyet çoula troes moes pus tård.
Cwand on pinse ki tot daléve å pus må eyet dins totes les lenes di l’ ekipe, ça vout dire k’ i gn a des mantches a mete pol novea etrinneu.
Rudi Garcia a stî etrinneu di l’ AS Rome di 2013 a 2016, di l’ Olimpike di Marseye di 2016 a 2019 eyet d’ Liyon di 2019 a 2021.
Divant çoula, il aveut stî åzès comandes di Lîle di 2008 a 2013, wou çk’ i gn aveut on certin Eden Hazard. Låvå, il aveut reyussi el doblé, cope eyet tchampionat, e l’ såjhon 2010-2011.
Avou l’ Olimpike di Marseye, el tecnicyin francès a stî finalisse di l’ Europa League e 2018, batou pa l’ Atletico d’ Madride dissu l’ escôre di troes a rén. Adon, i gn a yeu on court passaedje a Al Nasser e l’ Arabeye Sawoudite e l’ såjhon 2022-2023. Po shure, Rudi Garcia aveut rtcheu a Nape ki l’ aveut tapé a l’ ouxh e moes d’ nôvimbe 2023. Dispu don, l’ ome s’ ertrovéve sins boutaedje eyet sins ekipe a-z etrinner.
Eyet les djouweus dins tot çoula ? Cwand gn a on novea etrinneu k’ arive al tiesse d’ ene ekipe, les cwåtes sont rmaxheyes, eyet tertotes cobén.
Dins les disbotoes (vestires), dispu sacwants moes, i gn a yeu bråmint des treyins inte les djouweus eyet Todesco. Jason Denayer, k’ a stî coixhî et k’ est sins contrat e l’ Arabeye Sawoudite, s’ a-st arindjî avou Al Fateh, po casser ès contrat et baguer a Doubay po wårder ene boune condicion.
Po comincî, ça aveut stî l’ afwaire Courtois, onk des meyeus gayolîs do monde k’ a scheu e l’ fotbale di no payis. I n’ vleut pus djouwer e l’ ekipe tins k’ Todesco sreut co etrinneu. I pôreut don rtrover l’ seleccion. Po shure, c’ esteut el côp d’ gueuye da Kevin De Bruyne après l’ pårteye del Beldjike e l’ France. Dins l’ folêye, c’ est KDB eyet Romélu Lukaku k’ ont decidé tos les deus d’ èn pus djouwer e like des Nåcions.
Mins gn a nén k’ yeusses. Des ôtes bons djouweus rpudnut asteure espwer.
Mitchî Batshuayi est onk des prumîs, lu ki n’ a djamåy vraiymint fwait pårteye des plans da Todesco. Nouv côps so dijh, i dmoréve dissu l’ banc ou adon djouwer djusse sacwantès munutes. Avou l’ arivêye di Garcia, i pôreut bén awè ene nouve tchance, copurade pask’ i gn a waire di bons atacants.
El djouweu do mitan Hans Vanaken, el tripe solé d’ ôr, ki djouwéve do tins da Martinez, n’ a nén yeu ene mierseule munute di djouwaedje dispu l’ moes d’ djun 2023. Adon, el djouweu do FC Brudje doet eto clatchî dins ses mwins po Garcia.
Comint n’ nén dvizer do fré d’ Eden, Thorgan Hazard, k’ a totafwaitmint disparexhou. I s’ ermete doûcetmint d’ on sketaedje do croejhlé loymint å djno [rupture du ligament croisé]. Por mi, el pitit fré a s’ plaece po-z aspaler l’ atake di l’ ekipe nåcionåle.
En ôte k’ on n’ påle waire, c’ est Saelemaekers ki, a m’-n advize, meritreut ene tchance. I djowe so l’ costé, mins i sait ttossu bén disfinde k’ ataker. I n’ a tolminme ki 25 ans eyet po l’ moumint, il est prusté a l’ AS Rome.
Do tins d’ Todesco, gn aveut bråmint des djouweus blessîs. Pu des ôtes ki n’ l’ interessént nén. On pôreut lomer Boyata, Denayer, Benteke, Januzaj, Dendoncker, Foket, Michele, Origi oucobén Nacer Chadli.
Çou k’ les especialisses lomént on payis d’ fotbale, el Beljike, a tcheu bén bas. Dire k’ el djeneråcion dorêye ‒ come on les loméve ‒ a finit troejhinme del cope do monde e 2018.
Ça n’ serè nén åjhey di rtrover el plaece k’ el payis aveut dins l’ clasmint di ces trevéns la.
Mins Garcia est arivé…
sicrît el 15 di fevrî 2025