Èbén vla, on l’ ratindeut come in tchat après ene soris. El Grand Pris d’ Francortchamps èst arivè. Come èm vijin Fonse aveut dècidè d’ èdaler, dji m’ é propôzè d’ passer trwès djoûs låvå avou li. Dji n’ l’ ergrète nén. Mins m’ compte è l’ banque oyi.
Mins pou in côp ... l’ espectaque dè valeut les pwinnes, c’ est seûr ! Dèdja l’ vénrdi, pou les « libès sayes », i fieut ene bonté d’ tous les diales (20 dègrès). Fonse m’ aveut dmandè d’ èdaler dins ène tante, mins dj’ é vlu tchwèzi in chalet. Tu påles, dj’ aveu compris 50 euros au tèlèfone, mins c’ esteut 500. Èm vijin, qui dveut payî l’ mitan, l’a må pris. Dèdja qu’ il aveut disboursè 36 euros pou l’ pårquigne èyèt co dîj pou l’ programe… Si on radjoute qu’ i faleut compter cénq euros pou in satchot d’ frites èyet l’ mitan pou ène cråsse pinte… Et come on ndè bwèt nén qu’ yène …
Mins co in côp, vir les tchampions del Formule Yin tourner padvant vos iys, c’ èst ène ôte afêre qui dins l’ bwesse as imådjes. On est direk dins l’ ambiance. Pou l’ ertoû du Grand pris, c’ èsteut bén pou discouvru l’ nouvia circwit èyet tester les gomes. Del samwinne, les gazètîs avît branmint dvizè des « acostès » avou Mac Laren condånè pou espionâdje su Fèrari. Èyet co del fôrte aminde è liårds sins roubliyî les pwints pierdus å clasmint du Grand Pris des construjeûs.
Mins ç’ n’ est nén tous les djoûs qu’ on dvize di no ptit payis dins l’ monde ètir ! C’ esteut l’ cas saquants djoûs å mwès d’ sètimbe. Dj’ aveu studyî l’ circwit par keûr èt gn aveut trwès grands candjmints avou l’ ôte. È yin, el nouve tchicane qui candje di costè avou ene coûte rintrèye pou l’ ravitaymint. È deûs, l’ alårdjichmint del drwète line èyèt in pus grand disgadjmint a l’ sôrtiye. È trwès, in grand disgadjmint dins l’ virâdje qu’ on lome di « l’ antène cérudjicåle » .
Çu qu’ dj’ é vèyu voltî, c’ est qu’ on påle ètou di biyocårburants avou del blé, du golzå èyet del bètråle qui sront transfôrmès èn etanol. C’ est in ptit pourcintâdje, mins c’ est ddja in cominchmint. Notèz qu’ i sreut timps, pace qui mes omes consomnut cint lites d’ essince a l’ eûre di coûsse po chaque vwèture.
El semdi, les deûs Ferari estît è pôzicion yin èt deûs. Minme istwêre pou l’ dèpârt du dimègne. El coûsse aveut bén cominchî avou l’ tout preumî frinnâdje å « Sourd », èt çoula pou les quate preumîs. Pus lon dins l’ coûsse, i gn a yeû saquants bias mouvmints, èt çoula co pus rade gråce å miraculè d’ Monrèyål, Kubica, èyet mågré l’ rèplaçmint d’ ès moteûr. Après s’ sôrtîye di route a Monza, Kimi Raikonen a gâgnî pou l’ trwèsième côp a Francortchamps, padvant s’-n equipî Felipe Massa. Il avouwe ètou qu’ c’ est s’ circwit préfèrè. Les Mac Laren d’ Alonso èt di Hamilton ont fini djusse après.
Divant d’ sôrti did låvå, èm pôrtè-foûyes a co yeû tchôd èt s’ a co disvûdî. Dj’ é achtè ène casquète Ferari èy in mayot da Schoumi : lès deûs pou 70 euros. Eûreûzmint qu’ i gn a qu’ in Grand pris pa anéye è l’ Beldjique. Mins acrotchî des loques insi å meûr d’ èm tchambe, c’ est toulminme pus bia qui d’ claper des biyets d’ banque. Et come direut l’ ôte : Francortchamp, c’ est toulminme èl pus bia circwit du monde èt … il èst è l’ Walonîye !