Wangnî on Dakar n’ est seurmint nén åjhey. Mins l’ repoirter ene dijhinne di côps, c’ est tolminme ene sacwè !
Dj’ a don decidé di vos dvizer di Stefane Peterhansel.
El Francès di 46 ans, vént di fiesti el victwere po l’ dijhinme côp. Cwèki, c’ est l’ cwatrinme anêye k’ el coûsse ès passéve e-n Amerike do Sud et i n’ aveut co måy wangnî låvå. Dispus 2007, i coreut après ene novele victwere.
I fåt pacô waire di tchôzes po dvini on tchampion. Waitîz on pô : el pitit Stefane, viè les 8 ans, il a fwait del moto come ès popa. A doze ans, il a monté dissu ene plantche ås rôletes po dvini tchampion d’ France cwate anêyes pus tård. Ene miete pa après, il a rvinou a l’ moto po fé d’ l’ anduro.
- Mins rvinans å Dakar !
El Dakar 2012 a stî onk des pus deur d' ès-n istwere. D' après les especiålisses, c' est sortot les dierinnès estapes disputêyes å Pérou k' endè valént les poennes, avou des dunes come i gn aveut dvant el Måritanreye. Cwand dji pinse a l' tcholeur k' i gn aveut, i fåt tolminme awè ene boune condicion fizike. Vos mådjinez on pô les 45 digrés. Co mî, dins l' vweture, on-z arivéve a 60 digrés ! Eyet çoula durant cwate a shijh eures d' estape !
Stefane Peterhansel voeyeut voltî l' Dakar e l' Afrike.
- Il est vraiy k' c' est rola k' il a crexhou et k' il aveut ses raecenes !
Portant, di l' Afrike a l' Amerike do Sud, c' est bråmint des candjmints. Låvå, on pårteut dins des grands paxhis avou nole åme e cotoû. Ça fwait k' gn aveut moyén d' ès piede durant des djoûs etirs. Li djoû et l' nute avou l' passion des djins di l' ôte continint. Figurez vs k' a l' arivêye dins Lima, el mwaisse veye do Pérou, i gn aveut ostant d' djins ki po l' vizite du pape Djan-På II. Vos vos rindez conte ! Minme el Présidint do Pérou î esteut.
A !, el coûsse n' est nén presse di rvini e-n Afrike. C' est trop dandjreus. I gn a yeu trop d' prijhes d' ostaedjes et d' atacas po rcomincî låvå ! Minme si ene coûsse come l' Africa Race ès fwait e-n Afrike.
- Des djins d' amon nozôtes, nos nos dmandréns comint fé po wangnî dijh côp el Dakar.
A m’-n avis, i fåt sawè moenner comifåt. Mins tot åd dilong des 9000 kilometes, i fåt k' el vweteure tegne el côp et n' euxhe pont d' problinmes mecanikes. Dji pinse åzès crevaedjes di pneus, a l' boune etinte avou s' co-moenneu. I fåt eto fé atincion a s' vweteure. Tot çoula, el Estefane î a-st arivé, … avou ene miete di tchance.
Dins l' Dakar 2012, l' ome a tolminme yeu deus saizenes. El prumire, c' est cwand ès mini a bôré dins on motård. L' ôte aveut bloké s' moteur télmint i steut scrand. El vweture l' a djondou et i s' a rtrové dins l' aiwe. Å niût, el futur vinkeu s' a stî escuzer mon l' ome åzès deus rowes.
El deujhinme côp, c' esteut a deus djoûs di l' arivêye, cwand i s' a rtrové dins ene cuvete wou çk' il a pierdou ene vintinne di munutes.
Ès mestî, lu, i l' passe dins les vweteures. Cwand vos liroz m’-n årtike, l' ome årè asprouvé on novea moteur BMW diezel di sereye dins les såvlons do Katar. Minme si on n' voet nén voltî des tchampions come Peterhansel, les avançmints tecnikes des vweteures come les nosses ès fwaiynut tolminme gråce a yeusses.
Sicrît el 1î d' fevrî 2012