Dj’é l’abutude di vos dvizer di grandès èquipes ou bén di grands spôrtifs. El cé qui dj’é decidé di vos prezinter ådjourdu est seurmint moens cnoxhu. Pourtant, il a bråmint do merite.
Ès pitit no, c’est Oscar ; eyet s’ nô d’ famile, c’est Pistorius. Èç-n ome la est Sud-afrikin. Il a vnu å monde a Prètoria e 1986.
Djusquar la, rén d’espèciål, qui vos dalez m’ dire. Eyet pourtant, les cés d’ inte vouzôtes qui voeynut voltî les coûsses a pî duvnut conoxhe l’istwere da Mossieu Pistorius.
C’est l’ prumî atlete andispôrt a concouru dins in tchampionat du monde pou djins valides. Mia : il a stî l’ prumî mèdayî andispôrt mon les valides.
El pitit Oscar aveut a poenne onze moes quand on lyi a côpé les deus djambes djusse padzou les djnous.
E 2004, i cominche a fé del coûsse a pî adon qu’i s’aveut cassé l’ djinou å rugbi. Divant ça, il aveut minme cachî a fé del bocse.
- Comint s’ fait i ?
Ebén, i court avou deus protezes e carbone eyet speciålmint faites pour li couru. Radmint, e moes d’ setimbe 2004, i gangne ene prèmire mèdaye ås Djeus parolimpiques d’ Atene. L’anêye shuvante, i court avou les valides e l’ Afrique du Sud. E 2008, el Tribunå des Referés du Spôrt l’ otorize a couru avou les valides. C’est adon qui des espèciålisses ont cominchî a fé des tesses eyet studyî les performances da Pistorius.
Dji vos spågne les detays. On a rmarqué ètou qu’el consomåcion d’ocsidjinne est moens foite qui les ôtes coureus. Ès depårt est moens rade eyet il a pus malåjhiy dins les tournants.
L’IAAF a evoyî des medcéns pou fé des analizes tecniques di ses coûsses. Gn a yeu des rapôrts avou des interdicsions. L’ome a stî e-n apel avou des ôtes concluzions.
- Dji n’ vos di nén les dispites inte les esperts !
Les espèciålisses ont trouvé deus afaires di seures. Les mzeures biyomècaniques èn sont nén les minmes inte li foûme del lame e carbone eyet l’ pî d’ èn ome. L’ôte pont est foirt impôrtant. El coureu est å rcoe des rujhes ås niers do talon eyet ås musses del boudene del djambe [mollet]. Des afaires qui poiznut du traeyin ås sprinteus. Surtout ås ètrinnmints.
Èl pårticipåcion da Pistorius ås Mondiås valides est istorique. Qwèqu'i gn aveut ddja yeu deus cas, mins nén avou des lames : Terence Parkin, in nadjeu sourd eyet l’ Francès Salesse, disfoirci del mwin.
Mins Oscar, on l’ prind pou « Robocop ». Les sponsors ès l’ aratchnut. Pourtant, il a toulminme des lames avou des rsôrts eyet pus l’ longueur est grande, pus il est advantadjî.
L’ome s’ a qualifyî pou les Mondiås 2011 a Daegu el Corêye du Sud. El dimegne å matén, li ståde esteut rimpli pou vir les seriyes. Il a stî sôrti e dmiy-finåle du 400 metes, mins a stî medayî pou s’ pårticipåcion å 4 côps 400 metes. Les djins l’ont spoté « the Blode Runner », el coureu åzès lames.
Ène afaire qu’est seure, c’est qu’Oscar Pistorius est èn egzimpe pou les andicapés. Avou ène téle bataye, i done in messaedje d’espwer a toutes les djins qui sont-st amputêyes a cåze d’ène maladiye, d’èn accidint ou co bén minme d’ene guere.
Qwèqui, el pris des lames dispasse les 25.000 uros !
Eyet ça, i n’ fåt etou nén l’ roubliyî !
sicrît el 10 di nôvimbe 2011