Èç côp-cî, dj’âreu plu vos dvîzer del victwêre da Cadel Evans å tour di France, del diskinte ås infièrs du Spôrting di Châlèrwè ou co bén minme des transferts di Lukaku ou di Witsel…
Non-fait ! I gn a ene saqwè qui m’ trècasse ene miète : c’ est l’ yèbe des tèréns d’ fotbale. Dji sé, vos dalez m’ dire qui dji pied l’tiesse. Eyet pourtant … - Est ç’qui vos con’chez les plouzes ârtificièles ?
Amon nozôtes, c’ èst a Sint Trond, å Stayen, qui pou l’ prumî côp, on a djouwè ene pårtîye di prumire divizion. Ça s’ passeut el set du moes d’ awousse.
On dit souvint qui l’Union beldje est dispasséye. Ele vént di doner l’ otorizåcion e moes d’ sètimbe 2010. Eyet pourtant, vos ‘stez bén achîd, el prumire pårteye djouwéye e-n Urope dissu in té tèrén date di dècimbe 1981. C’ esteut å Queens Park Rangers a Londe.
« Qwè ç’qui ça va candjî ? » dalez m’ dimander.
D’abôrd des liårds ! On påle roci di 500 000 uros. D’èn ôte costé, pupont d’inondåcion a-z awè. El tèrén dmeurrè toultimps e boun estat. Fåt dire qu’i gn a ddja branmint des tèrén d’etrinmint avou in té covraedje.
D’après les espèciålisses, c’est pus åjey a djouwer ladsu pou les èquipes a vocåcion tecnique. Mi, dji m’ dimande toulminme si ça n’va nén dèzoûrner [perturber] les djouweus. Dji pinse tout d’in côp a l’ vitesse du balon. Etou ås rbonds, sins roubliyî qu’on risquéye di bouler [déraper] pus åjeymint. Dj’espere qui les crampons sront arindjîs pou l’ nouvia tèrén.
Les djouweus did dins mes conchances qu’ont ddja djouwé dissu del yèbe årtificiele trouvnut qu’c’est pus deur eyet qu’on l’ sint dins tous les musses djusqu’a dins l’bas du dos. C’est seur qui les aspoyaedjes èn sont nén les minmes. Et, co in côp, gn a branmint pus di candjmints d’ rite [rythme].
El fameus waezon, c’est du såvlon maxhî avou du vert cawoutchou. Coula est tapé dissu ene pårteye èlastique, 22 milimetes sipesse. Pa dzou, i gn a ene coutche di låve pou-z awè l’euwe qui s’eva wôr. Divant çoula, c’esteut des vîs pneus qu’on perdeut. On pleut adon ralouwer 39.000 puneus pou in mérseu tèrén d’ fotbal.
Gn a toulminme du bén dins l’istwêre. Quand i djele, i gn a don pus dandjî d’ mete ene saqwè å dzeu, ni bén seur di dvwêr instaler des tuyos pou l’ tchåfer. Çu qui vout dire qu’on va fé ds èconomeyes ostant dissu l’ètertènaedje qui dissu les dandjîs è-n ènerdjeye.
Dj’é minme lî dins ene ervûwe espèciålijéye qui l’ diferince inte el naturel eyet l’ sintètique permeteut d’ espårgnî deus miyons d’ lites d’euwe (eyet minme el doube dins les tchôds payis).
Sins roubliyî qu’ pou l’ yebe naturèle, on tapeut des pesticides a rlaye, dabôrd qui, roci, i gn a pus dandjî. Minme afêre pou ls ingrés. On nd uzeut nén lon d’ene tone et dmeye pa anéye. On radjoute a çoula qu’i gn a pus dandjî d’el côper. El djårdinî pout daler racrotchî ses crampons !
Pou ètertènu l’ yèbe årtificiele, i fåt rèfoncî les ptitès beyes di cawoutchou eyet etou arouzer l’ tèrén… pusqu’i gn a toulminme ène saqwè qui rchène a di l’ yèbe. Çoula fét ene wôteu di cénq cintumetes.
- Ba, qwè vlez ! Fåt èvoluwer avou s’ timps. Adon, ebén tant mieu si on pout-d ariver a n’ pus dvwêr côper ès pètit bouquet d’ pachi dins l’ djårdén !
sicrît el 5 d’ awousse 2011