- Il est tèribe toulminme ! Mins el principâl, pour mi, c’ est qu’ c’ est in walon !
L’ ome s’ erlèveut d’ ès grand fåteuy. I vneut d’ erwaitî l’ arivêye di Lidje-Bastogne-Lidje dins l’ boesse ås imådjes eyet i dvizeut di Flipe Gilbert. Il est vraiy qui Ptit Louwis s’ aveut toudi acrotchî å velo. Dedja du timps d’ Edy Merckx, i nd esteut supoirter. Mins roci, avou les cwate victwêres di shûte qu’ i vneut d’ nos ofru, no cousse endè pleut pus. L’ ome apiça ene boutaye d’ euwe. I rvoeyeut les imådjes des coûssses. El fletche braibançone tout d’ abôrd. Rola, il aveut batu Bjorn Leukemans a l’ arivêye. Les deus coureus s’ avént ètindu a 14 kulometes d’ Ovèriche.
Adon, gn a yeu l’ Amstel Gold Race qu’ il aveut ddja acrotchî è 2010. Roci, il a bén controlé l’ coûsse djusqu’ a 15 kulometes d’ el lene è skètant Rodriguez et Gerrans. Mins l’ coureu n’ a nén peu di dire qu’ i vleut awè l’ condicion pou ç’ moumint la eyet surtout qu’ il aveut stî bén aidî pa s’-n èquipe, ostant fizicmint qui morâlmint.
- Il est modesse, savez ! I n’ ès prind nén pou l’ meyeu, mins purade pou l’ pus complet du moumint !
Mins ç’ n’ esteut rén avou ç’ qui l’ ratindeut troes djoûs pus tård. Il a dominé l’ montêye du meur du Hu pou gangnî el fletche walone. Pourtant, lu, i n’ croeyeut nén yesse capåbe di rivalijî avou les peurs grimpeus dins ene montêye di pus d’ douze pour cint dissu ene longueur di 900 metes. Il esteut ddja dins les prumîs å pî du meur. Il a controlé eyet s’ a seu disgadjî sins qui Rodrigez èn seuche ervènu.
- C’ est seur qui l’ ome erconèt awè candjî s’ façon d’ couru ! Eyet il a råjhon !
El dimegne, i daleut atchèver li peneuse samwinne [semaine sainte] (nén peneuse por lu) è rèpoirtant Lidje-Bastogne-Lidje. « C’ est m’ meyeuse samwinne dispu qu’ dji seu professionel ». Roci, il a batu, nén pus ni mwins qui les deus frés Schleck åd dibout des 255,5 kulomètes eyet çoula dins in sprine a troes.
- Quéne afaire ! Mi, dji ndè pleu pus quand les deus frés ont ataqué dins l’ coisse [côte] del Rotche ås Fåcons a 20 kulometes di l’ arivêye. Dins l’ montêye di Sint-Nicolai, c’ est minme Flipe qu’ a ataqué pou skèter les ôtes.
Atincion savez ! Flipe est l’ prumî Lidjwès dispu Djôzef Bruyere gn a 33 anêyes did ci eyet l’ prumî Walon dispu 12 ans avou l’ ergreté Franck Vandenbroucke a-z awè gangnî el walone classique. C’ esteut ses supoirters qu’ estént binåjhes. Is estént rashonnés dins s’ vilâdje di Rmoutchamps, å pî del rilomêye coisse del Redoute.
A ! el Waloniye n’ aveut pus conu ene bele reyussite eyet ene si bele victwêre sportive dispu lontimps (avou Djustine, azård).
Tertous ecourâdjeut Flipe. Quand no walon coureu s’ aveut astampé dissu ses pedales, les djins criyént å pus foirt pou vraiymint l’ poirter viè l’ victwêre.
Lu, i vneut di reyalijî in rève d’ èfant. Cwand il esteut ptit, i rèveut di rèpoirter èç coûsse la. Il årè gangnî Lidje-Bastogne-Lidje a l’ ådje di 29 ans !
El fiesse su place pouveut continuwer rola, å pî del Redoute. Minme sins leu tchampion ! Gn aveut minme ene grande tinte avou ses parints, ès famile, ses amisses eyet s’ fanes-club.
Pou tous les bons moumints (eyet on espère bén qu’ i gn årè co branmint ds ôtes), merci Mossieu Flipe !
I fåt rconèche etou qui no tchampion cominche a bén s’ disfinde dins toutes les ocåzions, qui ça fuche å sprine, dins les arivêyes so montêye oubén è-n estant mérseu.
- Mi, pou m’ pårt, dj’ el vireu bén gangnî ene estape du tour di France oucobén minme ene dimeye classique itålyinne di fén d’ såjon avou des gripetes assez deures eyet qu’ on lome el tour d’ Emiliye.
Mins çoula, c’ est ene ôte pwaire di mantches !
sicrît el 5 di may 2011