El Beljique, l’ Inglutere eyet l’ Espagne ont stî reyusses…
Pourtant, pou l’ ci qu’ aveut yeu l’ idêye eyet rprezinter l’ gouvienmint beldje, no payis aveut bråmint d’ atoutes dins s’ djeu.
Velci saquantes :
Prumirmint : amon nozôtes, i gn a l’ grand mwaisse du spôrt mondiål – Jacques Rok, prezidint do comitî olimpike –
Deujhinmmint : El Beldjique est l’ cinte di l’ Urope djeyografique eyet politique. Etou, i n’ ès faleut nén displaecer e-n avion ou co bén minme e batea pou shure el coupe du monde.
Troejhinmmint : nos avans etou amon nozôtes el prezidint du consey.
D’ èn ôte costé, si on dvize di liårds, i faut investi dins des nouvias stådes. Et come tout n’ est nén supôrté pa l’ publik, on dvize tout l’ minme di 10 miyons d’ uros pou in ståde.
C’ est l’ vraiy qu’ Alain Courtois a trimpé s’ tchimijhe pou cachî d’ convinke les mimbes del FIFA. Pattavå, i sayeut di moustrer l’ professionalisse di no candidateure. C’ esteut fé du « lobiyigne », sapinse a les Inglès (del « poûssance » ou del « tchôcance », k’ on dit nozôtes).
Paretreut qu’ el tchinisse doet yesse fôrt. Surtout si on a l’ imbicion d’ organijhî yin des troes grands evenmints d’ el planete (les deus ôtes, c’ est l’ espôzucion univiersele eyet les djeus olimpiques).
Mins tout çoula a passé pou du vint ! El Russiye a stî rtènûwe. Å cominchmint, i gn aveut quatôze payis. Mins pou shure, end a bråmint ki s’ ont rsaetchî pusqui tertous avént l’ doutance qui l’ organizåcion 2018 endireut a in payis d’ Urope. Adon qui nos pårtis politiques èn savnut s’ mete d’ acôrd minme dissu des pets d’ tchets, nos åréns å moens moustré qui nos nos pléns rashonner åtoû d’ in grand pordjet.
Asteure, nos n’ estans nén presse d’ ercominchî. El tchance est dalêye. El cinte di gravité du monde a candjî. El ci du fotbale etou.
Les djins di no payis qui ratindént ene saqwè pou l’ coupe du monde 2018 poulnut braire dissu l’ espale des fotbaleus.
Waitîz in pô a Tchålerwè, dou ç’ qu’ i faleut in nouvea ståde. Tout l’ minme, i dvreut yesse fwait, mins i srè bråmint pus ptit. Pou s’ finançmint, i gn årè pont d’ liårds du fédérål ni d’ el coupe du monde. Eyet après tout, gn aveut télmint di contrintes avou l’ fameus contrat qu’ el FIFA oblidjeut a shure pou les viles qui rçuvént des pårtiyes di fotbale qui ci n’ est nén kécfiye pus må.
Vla tout d’ minme ene fole idéye, qui pour mi co in côp, n’ aveut waire di tchance d’ ariver. C’ esteut in formidåbe pordjet pou rashonner les djins di no payis. On a quand minme l’ espwer qui les « roudjes diâles » ès qualifiyront dissu l’ terén pou yeusses s’ ertrouver å Braezi, e l’ Russiye, pu å Catår. Mins ça, c’ est ene ôte pwaire di mantches !
sicrît li 20 di djanvî 2011