Nos vla dèdja å moes d’ decimbe. Toutes les fouyes ont tcheu des åbes dispu lontins.
On les a ramassé a l’ eschoupe come saquantès èquipes ont ramassé les pwints a fôrce di gangnî les pårtiyes. Dins l’ fotbale come dins tous les spôrts, i gn a les cis qui piednut eyet les ôtes qui gangnnut. Ådjourdu, dji m’eva vos dvizer d’ene equipe qui toutche el fond.
Comint ç’ qu’on pout end ariver la ? Tout d’abôrd, divant qu’el saizon n’ cominche, on a egadjî in boun ètrinneu. Il aveut ddja vnu a Châlerwè, el Mathijssen ! Mins l’ Présidint Bayat[1] aveut yeu des mots avou li. Adon, i l’ ratindeut å toûrnant. Saquants mwais résutats, et hop, tapé a l’uch. C’est mi qui comande, c’est mi qui decide. Dji seu l’ patron d’èm-n eterprije eyet mes eplweyés n’ont rén a dire !
Ene miete fôrt quand on sait qui Mathijssen esteut bén veyu di tertous, ttossi bén des djouweus qui des supôrters. Djustumint, yeusses, is ont mårqué leu dezacôrd avou l’ Direcsiyon. On a vu aparexhe des bandroles anti-Bayat. ène niût, is l’ont minme mârqué dissu l’ rimouye [pelouse]. El djårdini a dvu mete del vete couleur dissu les yèbes pou catchî l’ tècse.
Adon, ça a stî el sèriye di djins qu’ont quité (oubén dvu quiter) el batia qui perdeut toudi pus l’euwe. Fén del saizon passéye, Tommy Craig est tapé a l’uch pa Bayat. Fén avri, Mario Notaro vout pårti mins dmeure djusqu’a l’ fén del saizon pasqu’i fåt ène licince d’ètrinneu dissu l’ banc. È moes d’ djwin, Bert de Waele doet rindjî s’ cårculete : ène dècizion da Bayat. El 19 di setimbe, Jacky Mathijssen est tapé wôrs du vestiaire. El 13 d’ octôbe, c’est l’ toû da Dominique Henin di rçuvwêr ès C4 : Lazlo , in nouvia prèpareu fizique, arive. Pire, Mogi Bayat, nén d’acôrd avou s’ mononke, ès voet moustrer l’uch di sôrtiye. Dijh djoûs pus tård, Raymond Mommens, vî serviteur du club, end a s’ sô et pete å diâle. Cominchmint nôvimbe, Tecklak, a l’ tiesse des zèbriyons, n’est nén d’ l’avis da Abbas eyet s’eva etou. L’izolmint du Prèzidint les tchoque tertous. Li, i continûwe. L’ome est quazimint mierseu. El fåte a ène estratèjiye di jession qui fwait qui tout toûne li cu a l’Espôrting. A cåze d’èn ome : el Prèzidint Bayat. Awè l’ådjeu di disloyî les côrdons del boûse done-t i ostant d’ pouvwêr ? Ène rèdjon etire pinse qui non. Mins èn ome …
El nouvia ètrinneu èn perdeut nén dipus d’ pwints qu’ l’ôte. Du contraire ! Mins c’est l’ Prèzidint qu’ l’a amwinné. Fåt dire etou qui les chifes ont tcheu. Les gaztîs ont seu qu’on aveut vindu pou troes miyons eyet achté pou 150.000 uros. C’est tout ç’ qu’el Présidint aveut metu dins l’anvlope. C’est l’ vraiy qu’i gn a dijh ans, il aveut såvé l’Espôrting del catastrofe è stitchant bråmint des liårds. El Louviére et Moucron s’ ont rtrouvé dissu leu cu sins awè ène saquî pou les rprinde. Mins did la a djouwer avou les pîs des djins come i fwait è dijant qu’il est mierseu a dècider dins s’-n èterprije, rastrin in pô, la valet !
Gn a todi mwinse di djins k’ èvont å ståde. I gn a d’ cwè ! Vir ses couleurs batûwes avou des djouweus bråmint trop courts pou l’ divizion yin ou cobén minme des transferts qui n’ont nén co djouwés dispu l’ cominchmint del saizon, c’ est malåjhiy a supôrter.
El set di nôvimbe, saquants djoûs après … l’ Toussint, les gades a rôyes ont atrapé in troféye k’ is s’ endè srént bén passé : el roudje lantiène. L’espwêr, c’est qu’is n’ fèyénxhe nén l’ culbute. I gn a ddja waire d’èquipes walones è divizion yin…
Pou cominchî l’ deujinme toû, l’equipe a stî a Malaga.
Ça pout candjî ène saqwè ?
Fåt vir !
sicrît li 18 di nôvimbe 2010