C’ esteut å mwès d’ julete, i fèyeut tchôd. Minme foirt tchôd. Des timperatures come nos avans rålmint amon nozôtes è l’ Beldjique.
So ç’ timps la, des djins come nozôtes (enfin quazimint) courént a vélo ou bén djouwént å fotbale.
- Dins l’ moes d’ jwin, el coupe du Monde m’ a fét dmeurer aclapè a l’ boesse ås imâdjes. E-n Afrique du Sûd, ça n’ s’ a nén passè come tous les quatre ans.
D’ abôrd, gn aveut l’ brut avou les vouvouzelas, les fameuses trompetes di låvå. In brut qui passe les 130 decibels ! Dj’ é l’ espwêr qu’ on n’ les va nén etinde åtou des teréns dins no tchampionat.
D’ èn ôte costè, les pårtiyes ont pacô arivè a in drole di rezultat avou des trompâdjes d’ årbite. Les decideus d’ el FIFA pålnut d’ mete des cameras pou rpasser les imâdjes des fåzes nén trop cléres. El pantomine ès fét bén dins des ôes espôrts. Adon, pouqwè nén l’ estitchî å fotbale. A m’ n-avis, ça va s’ fé in djoû ou l’ ôte.
Mins sins roubliyî qui, åtou des teréns, ç’ n’ esteut nén rimpli. Fåt dire etou qui les djins låvå n’ ont wêre di liârds et les tegnnut pou mindjî. - Pou ndè rvènu ås rezultats, å contrére di bråmint des djins qui wèyént voltî les Sud-Amerikins, mi, dji croeyeu ås equipes d’ Europe. Dj’ aveu ene preferince pou les Anglès, les Almands ou bén les Holandès. Ces dérins s’ ont rtrouvé e finåle e copagniye des Espagnols, qu’ ont d’ ayeurs gangnî pa yin a rén.
C’ est in tchampion du Monde qui n’ a wêre marquè des gôls (seulmint wit côps dissu set pårtiyes).
On n’ pålrè wêre des Francès qu’ estént la gråce a in but da Henri qu’ aveut marquè del mwin. Låvå, is ont tout fét. Ça a cominchî avou l’ afêre Domenech-Anelka qu’ a fini a l’ Assimbléye Nacionåle francesse. Après ene greve di l’ ètrinnmint, is n’ ont minme nén passè el qualificåcion, batus pa l’ Afrique du Sud.
Les Itålyins ont etou bén displé a leus supôrters.
Mins leyons la l’ fotbale pou dvizer di velo. Durant ç’ timps la, on a couru troes etapes du tour di France amon nozôtes.
- C’ esteut bén pléji, såf qu’ il a ploû du costè di Brussele et di Spå et qu’ i gn a yeu in moncha d’ coureus qui s’ ont rtrouvés a l’ tere avou des ptits ou minme des gros båbås.
Pou fiesti les 65 ans di no pus grand tchampion, c’ est-a-dire Edy Merckx, les organizeus ont fét passer l’ etape padvant s’ måjhon a Meise. Brussele aveut toulminme disboûrsè 240.000 uros pou-z awè l’ Tour. Mins gn a bråmint des ertcheyâdjes economikes, dit-st on…
Bén seur, on a co dvizè dopâdje. Gn a des bruts dissu Armstrong qu’ a pierdou douze munutes dissu ene etape. On a etou discouviet in nouvia prodût dedja eployî e 2009 : l’ Aicar, malåjhî a rtrouver dins l’ coir eyet disfindu pou les djins. Ene cure coustêyreut 500.000 uros. Cancellara åreut in ptit moteur dissu s’ velo. Li, i vout qu’ on féye ene radio di ses djambes.
Pa après, il a co fét tchôd. Minme foirt tchôd ! Eyet Contadôr a gangnî sins trop ataquer. Mins nén minme ene etape !
Pou shûre, gn a yeu les tchampionats d’ Urope a Barcelone. Rola, Kevin Borlée a rèpoirtè el medaye d’ ôr eyet etou l’ bronze avou s’ fré eyet deus ôtes dins l’ erlai quate côps quate cints metes.
- Eyet mi, dji souweu a grossès goutes padvant m’ boesse ås imâdjes !
Mins vos savoz bén, in spôrtif come mi, ça n’ ercule divant rén !
sicrît li 7 d’ awousse 2010