E vla co ene, di drole d’ istwêre ! Il ès lome Advocaat. Mins c’ est l’ avocåt du diåle, azår.
Comint est i possibe di fé confyince a m’-n ome. Dedja qu’ divant, il aveut fét ç’ côp la a quate erprîjes. C’ esteut pou l’ prumî côp e 1995 avou li Holande pou daler å PSV Eindhoven. Pou chure, il a quité l’ PSV pou les Glasgow Rangers. En 2005, il a signé ås Emirats Arabes et deus moes pus tård, i s’ endaleut mwinrner l’ Coréye du Sud. Et pou fini, i s’ egadje avou l’ Ostralîye pou rtrouver l’ Zénit Sint Petersboûrg qui lî ofrit 2,7 miyons d’ euros.
Eyet roci, les hôtès instances di l’Union Beldje ont decidé d’ el parachuter a l’ tiesse di l’ èquipe nåcionåle. Dedja qu’ ça n’ toûrneut nén avou l’ cén qu’ esteut dvant li. Bén etindu, ès-n arivéye aveut ddja pôzé des problinmes.
Eyet vla qu’ tout d’ in côp, el Holandès done in côp d’ fil e dijant qu’ i djoqueut s’ boutâdje e l’ Beldjique. Mossieu s’ endaleut e l’ Rûssiye avou in fameus paquet di liårds dins s’ potche. On påle di set miyons d’ euros. L’ afêre va fini å tribunå. I n’ fåt nén roubliyî qu’ i gn åreut in miyon d’ uros a payî come dedomâdjmint di rupture di contrat.
El gayård etrinne l’ AZ Alkmaar. Mins rola, i s’ téjeut dissu s’ nouvia contrat. Il est vraiy qu’ i s’ a ndalé d’ låvå el 2 d’ may. Les reyacsions evont tertoutes du minme costé : c’ est s’ foute du peupe beldje, in manque totå di respet, våt mia rpårti a zero, el manire di fé est scandaleuse, et tchik et tchak.
Eyet dire qu’ el troes di setimbe, c’ est dedja Beldjique-Almagne.
Advocaat n’ a rén trouvé mia qui di responde qu’ i n’ wèyeut nén çu qu’on lyi rprotcheut eyet qu’ i feyeut preuve d’ oniestruté. A l’ etinde, ès depårt rintere dins l’ lodjique !
Des belès promesses et des belès rezolucions qui seulmint deus djins del Federåcîyon, François De Keersmaecker eyet Philippe Collin, ont gobé a rlaye. Domâdje pou no-n èquipe beldje qui n’ aveut ddja nén dandjî d’ene pareye reclame.
Replacî Advocaat, evoye après a poenne chîj moes, cénq pårtiyes eyet 300.000 euros, ci n’ est nén åjîy.
Ci n’ est nén qu’ i feyeut du bon boutâdje, mins persône ni vleut prinde ès place. Fåt dire etou qu’ e wêre di timps, i s’ a egueulé avou Stiynen, Kompany, Fellaini, et hay vos nd årez.
Chaque a s’ toûr, des etrinneus confirmés ont stî acrotchîs. On a dmandé a Preudhomme, Gerets, Leekens. Mins is n’ ont nén vlu ès risquer. Fåt dîre qu’ el boutâdje est malådjî pou s’ qualifier pou l’ coupe d’ Europe 2012. Ça n’ les arindjeut nén. Fåt rconeche qui no-n èquipe nåcionåle est a l’ imâdje di no govienmint. I gn a pus rén qu’ èva come i fåt.
I gn a trop longtimps qui no payis n’ arive pus a s’ qualifier pou ene coupe du Monde ou minme d’ Europe. Nos avans pourtant des bons djouweus qu’ on nos dmande dayeur dins les ôtes payis (Arsenal, Everton, Manchester City, Bayern Munich, Ajax Amsterdam). Fåreut tout d’ abôrd èn etrinneu qui såreut mete di l’ ôre dins l’ boutique.
Eyet on croet l’ awè trouvé : c’ est « long coutia », Georges Leekens qui rvént. Il aveut ddja stî etrinneu d’ l’ èquipe di 1997 a 1999.
sicrît li 2 d’ may 2010