Quéne istwêre, qué pléjî di wétî ça ! No ptit payis aveut quasimint disparechu d' el sinne mondiåle e tenisse. Dins les grands tournoes, gn aveut in grand trô. Tout d' in côp, Kim a rvenu. Eyet asteure, c’ est å toû da Justine. Sins roubliyî Yanina. Oyi, nos nos rtrouvons avou troes bounès djouweuses di tenisse. Astok des Amerikinnes, des Chinwesses eyet des grandès Rûsses, in ptit payis come el nosse erleve el tiesse. C’ est tout bounmint clapant !
El 9 di djanvî, a Brisbane, e-n Ostraliye, Justine a batu Kim e l’ finåle du tournoe. I fjheut malåjhî, divant l’ såjhon, di crwêre a in té sinnario. Bén seur, nos-ôtes nos-avéns l’ espwer, mins did la a-z assister a in té combat, gn aveut ene fameuse asdjambléye.
- Vos rindoz conte di l’ afere ? Comint mådjiner di vir ene téle pårtiye, pou l’ prumî tournoe di l’ anéye ! Dji ndè su co foufouye ! C’ esteut deus rvinantes qu’ avént prins leu pinsion !
Tertous reveut d’ ene téle finåle inte les deus meyeusès djouweuses d’ amon nos-ôtes … come å bon vî timps !
El tenisse di no payis eyet minme did pus lon, end a sôrti wangnant.
Divant l’ pårtiye, Carlos Rodriguez, l’ etrinneu da Justine, esteut binåjhe qui pou s’ ertoû, ele djouwaxhe disconte di Kim. C’ esteut, d’ après lu, in boun egzamin. Il a stî reyussi pusqu’ åd dibout di deus eures eyet 23 munutes, les 5500 spectateurs d’ el « Pat Rafter Arena » s’ ont levé pou aplodi nos deus meyeusès djouweuses. Mi etou, come toutes les djins calés padvant leu boesse ås imådjes, dj’ a shû ene lûte atchårnéye. Les deus coumeres s’ ont batu pou in spectåke ki ndè valeut les poennes. Dayeur, les deus meritént di wangnî, avou ene preferince a Justine, qu’ est ene Walone, bén etindu !
El preparåcion, dins les spôrts, come dins tout, a bråmint d’ impôrtance. I fåt bråmint d’ boutâdje, des etrinnmints eyet des massâdjes. D’ après çu qu’ dj’ a lî dins ene gazete, i paretreut qui pou touwer ene pårtiye d’ ès timps libe, Justine erwéteut in rpôrtâdje dissu l’ deujhinme guere mondåle. C’ est vraiymint qui leye, elle a èn esprit di bataye ! I gn a qu’ a l’ vir djouwer pou l’ ermarquer. C’ est des pårtiyes fôrt impôrtantes wou çqui Justine si scrandit ådla pou trouver el bon rite [rythme]. Etou, fåt nén roubliyî qu’ ele a in bon siervice. C’ est tout çoula qui lyi a permetu di dmorer a in bon livea [niveau]. Ene miete après, elle a stî batuwe e finåle di l’ Ostralyinne Open pa ene des deus sours Williams.
Dins l’ fouléye, ene troejhinme djouweuse beldje fét mia qu’ ès disfinde. Si Justine eyet Kim sont-st al fene coupète, i gn a etou Yanina Wickmayer qui s’ acrotche. Ele n’ a qui vint ans. Elle a dayeur reyussi in bea tournoe a Oclande pou s’ ertrouver eyet wangnî l’ finåle siconte di l’ Itålyinne Pannetta.
Gråce a ces troes djonnès coumeres la, dji pasrè co des eures padvant m’ boesse ås imådjes. Vos m’ poloz croere !
sicrît li 9 di fevrî 2010