Les tchampionats du monde, c' est toudi des belès afaires a waitî dins l' boesse ås imâdjes. Bén etindu, Ptit Louwis èn pleut må d' rater çoula. I s' passént a Berlin.
Tertous esteut foirt mouwé el dimegne quand on a fwait l' adrovâdje. Vos sintez bén ! C' est rola qu' i gn aveut ddja yeu les Djeus Olimpiques di 1936. Èç-n anêye la, l' Amerikin Jesse Owens aveut fwait in teribe afront a l' propagande da Hitler eyet li cpagneye – ki vlént k' i gn åye ki des blancs capåbes d' esse tchampions - e repoirtant cwate medayes.
- Mi, çu qu' dji ratin, c' est d' vir el fameus Usain Bolt dins les cint eyet deus cints metes !
Èm-n ome, il est toudi avou in lådje sourire eyet i fwait l' biesse. El « Jamaïcan academy » domene a crever el monde du sprint, qui ça fuche amon les comeres ou dins les omes. Paretreut qu' is ont çoula dins l' sonk ! Dedja a scole primaire, i gn a des competicions avou des etrinneus. Pou ndè rvinu a Usain Bolt, adon qui les ôtes coureus ès concinternut, lu, i riye eyet fé des séndjriyes padvant les cameras. Gn a nén a dire, mins il est seur di lu.
Arive adon el finåle du cint metes. Ça sinteut l' poude pasqui les rivås avént coru foirt bén e quårts eyet dmeyès finåles. El tripe tchampion du monde a Ozaka, Tyson Gay eyet el pus rapide e quårt di finåle, Asafa Powel avént l' espwer d' el bate.
- Nos avans co tertous dins l' tiesse les imâdjes d' ès triyonfe a Pekin, quand il a spotchî ses adversaires pou dvinu tchampion olimpique du cint metes. Èç djoû la, on l' a spoté : l' alumwer. Mins i n' ès vout nén djoquer insi, eyet i vout dvinu ene ledjinde du spôrt.
Mins rvinans a Berlin, on s' dimandeut si… Bawaite, pou l' ome el pus rapide du monde, ça a stî ene formalité. Pou l' cint metes, c' esteut 9 sugondes eyet 58 cintinmes. Pou l' deus cint metes, il a fini e 19 sugondes eyet 19 cintinmes.
- Il est trop foirt, vos di-dj' !
Des mwaijès linwes pålnut ddja d' dopigne. Saquantès samwinnes di dvant, cénq djins avént co stî controlés pôzitifs. Mins i n' fåt nén vir ces droukes la pattavå tout.
Pou l' pitite istwere, Usain Bolt n' a nén rçû qui des fleurs eyet des medayes. El Veye di Berlin a tnu a rinde bon dvwer a Bolt e lyi ofrixhant in bouket du leu fameus meur. L' ôte croeyeut qu' i l' daleut mete come souvnance dins s'-n apårtumint. Bawaite ! i fjheut 4,3 metes cåré eyet pezer 2,7 tones ! On lyi va evoyî pa batea !
Pou shure, l' ome di Kingston a vnu couru pou l' dierinne mantche d' el « Golden League » a Brussele. Les adjinçneus avént arindjî ene nouve pisse e cawoutchou naturel avou des trôs d' dins pou leyî passer d' l' air pa dzou. Ene téle pisse permeteut d' daler pus rade. Eyet dvinez quî çqui l' a vnu strimer ?
- Bén etindu, is ont fwait vnu Usain Bolt, l' ome qui dmande in catchet di 200.000 uros pa metingue.
Eyet el ci du Heizel, i l' a fwait, mins djusse couru l' deus cint metes. Eyet il a batu l' ercôrd du ståde, vî di 32 ans ! On s' dimande eyu çqu' i s' djocrè. Ès popularité est teribe, mins il arive a dmorer simpe. Fåt dire qui c' est insi dispu l' ådje di 15 ans. L' ome marquêyrè a jamwais l' istwere du spôrt. Dji ndè su seur !
sicrît e moes d’ nôvimbe 2009