Chaque anéye å mwès d’ djulet, dji les ratind ! Qwè ? Non fét, nén les condjîs! Mins pus rade les coureus do…
Eç-n anéye ci esteut ddja espéciåle avou l’ertour da Armstrong, sins roubliyî ètou Boonen qu’aveut yeu l’ drwèt d’ pårticiper mågré qu’il aveut pris del droque. Mins come ça n’esteut nén durant les coûsses, el tribunål a bén vlu. Boun ègzimpe pou les djonnes ! Qwè qu’il a radmint abandonè (dandjureus e manque … di victwêre !).
Pou ndè rvènu å tour li-minme, dji n’é nén trouvè l’ pårcours fôrt terîbe. Dispu l’ dèpårt di Monaco, i gn a wêre yeu d’ataques des favoris. Dins les ètapes des Pirenéyes, l’arivéye esteut trop lon des montagnes. Adon, gn aveut souvint des ratrapâdjes. C’est insi qu’ l’Itâliyin Nocentini a dmeurè saquants djoûs avou l’ djaune mayot dissu ses spales. Djusse ène pètite ataque da Contador qui s’a rtrouvè a deus sgondes padvant Armstrong et c’ est ci-ci ki divneut mwinrneu.
Dj’ a ritnu ètou des rouspètâdjes pou ène orèyète èyèt les sprin´s da Cavendish.
Nos esténs bén lon erî du tour gangnî pa Edy Merckx i gn a djusse 40 ans avou pus d’ 17 munutes d’avance su Pingeon. Il aveut ètou aråvlè tous les mayots. C’ èst adon qu’el « Canibale » aveut cominchî a dominer les coûsses a vélo mågré les Poulidor, Pingeon, Gimondi, Ocaña èt tous les ôtes.
Eureusmint, dins l’ bwesse as imådjes, gn aveut des belès fotos del Catalane ou bén del Swisse. Fåt dire qui c’esteut des imådjes di superproducsiyon avou 300 djins qui boutént tous les djoûs pou nos-ôtes awè des belès imådjes. Cénq motos èyèt deus élicoptéres tournént sins djoque. Dispu févrî, el rèyalizeu bouteut pou trouver les curiyozités èyèt les malåjîs passâdjes pou les coureus.
Dji ratindeu toulminme qui ça boudje. Dins l’ètape di Vitel a Colmar, rén d’ candjî : l’èquipe Astana èdjeleut el coûsse. L’arivéye a Verbier après 207,5 kulomètes èdveut apôrter ène saqwè. Infin ène pètite ataque da Contador. Padrî, les deus fréres Schleck s’ont bén batu èyèt Armstrong s’a r’trouvè a ène munute 35 sugondes. Å Grand Bornand, Contador esteut dins in fåteuy avou les deus fréres. Mins l’ lèdmwin, il a toulminme gangnî el conte-li-monte.
I dmereut l’ètape di sèmdi å Ventoux. Rola ètou, Contador n’a rén fét d’espéciål. Il a shû Franck Schleck, mins n’a nén ataquè. Ene victwêre sins plouma. Dji vos l’dijeu pus wôt : nos esténs lon erî des victwêres di batants.
El resse n’esteut pus qu’ène pourmwinnåde pou l’ djaune mayot dissus les Tchamps Elizéyes.
Tant k’ ås Walons, on rténra Macsime Monfort qui s’a moustrè ène miyète. Mins, bof !
Dilé Alberto Contador avou s’ djaune mayot, gn a yeu deus ôtes eureus : Franco Pellizotti, li meyeu pedaleu dins les montêyes, et Thor Hushovd, li rascodeu do vet´ mayot do meyeu sprinteu.
Vivmint l’anéye qui vént !