Co ene sacwè k’ i gn a ddja bén shijh moes k’ est houte. Mande escuze å scrijheu, mins c’ est les fåtes ås passetes des emilreyes.
El gadjure esteut fôrte pou les ôrganizeus. Domâdje qu' el sécurité des pårticipants esteut bén trop malåjiye a-z assurer dissu l' nwêr continent. ASO, l' ôrganizeu (el minme qui pou l' Tour di France) a decidé d' end aler e-n Amerique du Sud.
Vos dirîz bén pouqwè çqu' on l' lome co « Dacar » ?
El Dacar nouve moudêye nos a ofru du spectaque durant 15 djoûs.
Mågré ene crole di 9.000 kulometes åd truviè d' el Pampa mins etou d' el Côdlire des Andes et surtout du teribe dezert di l' Atacama, i gn aveut quåzimint 530 equipâdjes qu' ont stî prinde el depårt du Dacar 2009. Et-z î discouvri les tidjes di l' Amerique do Sud. Laddins, i gn aveut ene pougniye di 61 Beldjes qui sont-st evôye di Buenos Aires el 3 du mwès d' djanvî. Saquants d' intrè yeusses n' ont nén atchevé el parcoû, rimpli d' arokes di toutes les cougnes.
Si l' Dacar a candjî di continent, l' Årdjintene eyet l' Tchili ont-st ofru des etapes di plinne wou çqu' il esteut malåjî d' dispasser pasqui les pisses estént bôrdéyes di clotures. Ça vout dire qu' i gn a branmint di teréns privés. L' ôrganizeu a don egadjî des cintinnes di pôrtîs pou drouvu les bayes quand les vwetures, les camions, les motos ou les qwades passént.
Mi, dji doe dire qui dji chûveu l' tchinisse dins l' bwesse as imâdjes. L' emission « Les pistes du Dacar » doneut des nouveles des céns qui gangnént l' etape du djoû, mins etou des rpôrtâdjes et des comintéres.
Pourtant, dji vos doe dire etou qui çu qu' dj' é veyu ndè valeut les pwenes. A té pont qu' si on m' åreut propôzé d' èm rinde låvå, dj' åreu yu dit qu' oyi télmint les payîzâdjes valént l' distoû. I candjént tous les djoûs. Dji pinse tout d' in côp ås grands lacs du Nôr d' el Patagoniye. Etou el Côdlire des Andes avou el volcan Lanin eyet l' Paso San Francisco situwe a ene hôteur di 4700 metes.
Adon qu' on aveut suprimé el cén d' l' anéye passéye, on n' pleut fé ene risquete eyet l' Dacar duveut quiter l' Afrique. Såf qui, contrairmint a l' Afrique wou çqu' i profiteut des temperatures di l' ivier, roci, les equipâdjes s' ertrouvît e plin esté. Les especialisses avét prevu des timperatures passant les 45°C. Bén etindu, les equipâdjes d' uzene eyet surtout les rôlants indjéns ont stî preparés e-z acomptant des téles tchaleurs. Mins ç' n est nén l' cas di tertous. Pourtant, i gn a des p' tits truks. Par egzimpe, pou n' nén awè des rujhes avou l' hôteur, i mashiént des fouyes di coca.
On peut dire qu' el Dacar evoluwe tous ls ans, mins tout l' minme !
Si on påle ene miete di ptits liårds, el budjet toûne ås alintoûs di troes miyons d' uros. Et quand on pinse qu' in coureu a moto dispinse di 50 a 100.000 uros pou pårticiper, vos compudrez qu' i gn a des publicités dissu les carosriyes.
Pou l' pitite istwere, Giniel de Villiers gangne pou l' prumî côp dissu in moteur å mazoute, çou qui n' aveut jamés arivé djusqu' asteure.
Du costé des motos, c' est l' espagnol Coma qui passe el prumî el line d' arivéye. Tant qu' ås camions, l' equipâdje Kabirov Belyaev Mokeev dispasse tous les autes. Domâdje toulminme qui gn euche co in spôrtif qu' a morou, el motård francès Pascal Terry.
Co yin d' pus !
Jean Goffart, e moes d’ djanvî 2009