Oyi, dji vos etin did ci : gn a ddja bén troes moes k’ c’ est houte. Mins rivnans ene miete dissu…
A, i gn a nén a dire, mins ç’‑n anéye ci, dj’ é stî gåté !
Diu sait el nombe di côps qui Ptit Louwis aveut lachî ç' fråze la dispu l' bontimps.
Vos l' pinsez bén ! Ça aveut cominchî avou l' Euro di fotbale è l' Swisse et è l' Otriche. Rola l' Espagne aveut gangnî. Pou continuwer, c' esteut l' tour di France wou ç' qu' on a dvu ratinde el dérène samwinne pou vir el vré clasmint dins les Alpes.
El grand côp, ça a stî les Djeus Olimpiques è l' Chine. Rola, gn a yeu des rpôrtâdjes dins l' bwesse âs imâdjes, ttossi bén a wit eures å matén qui del niût. Pourtant, on s' dimandeut çu qui daleut s' passer låvå. Des moes di dvant, on nos a dvizé des « abondroets del djin », qu' i gn aveut nén drola, et des èguègnes å Tibet. Et on disdut a rlaye dins bråmint des payis avou l' blame Olimpique. E places, il a minme falu suprimer les ceremoniyes. Pou shure, sacwants politikîs ont rfuzé d' ès rinde a l' adrovâdje des Djeus. Etou, des lûteus di tous les spôrts ont respondu qu' is rfuzént d' endaler concouru, eyet çoula pou in moncha d' résons. Yene des dérènes, c' esteut, a tot côp, el polucion. Les Chinwès avént dayeur fwait djoquer des ujènes eyet des ôtes boutént å ralinti. Les vwètures rôlént in djoû les plaques pére eyet l' ledmwin les impéres. On a dmandé ås djins di prinde condjî durant les Djeus.
Toulminme, el 8 du moes d' awousse a 8 eures 08 å niût, les Djeus ont cominchî avou ene bele ceremoniye.
Li ståde qui m' a l' pus mårque, c' est l' cén qu' on lome « el ni d' mouchon », avou les 42 mile tones d' acî pou l' monter. On pleut stitchî ddins 90.000 riwétants. C' est ene construcsion qu' a duré cénq anéyes avou pa moumint 5.000 ouvrîs qu' î boutént.
Qwèqui, on a aprins pa après qui des imâdjes d' el ceremoniye avént stî arindjiyes a l' ordinateur. Sins compter qu' el pitite fiye qui tchanteut n' esteut nén l' cene qu' on etindeut . Cite-lale aveut stî djujéye nén djoliye assez pa les Otorités d' låvå.
Bén seur, come tertous, on a des spôrts preferés. Question pléji låvå, gn a yeu wêre. Sinon el fotbale. Les espwêrs avént fét ene boune campagne pou s' qualifier. Dins ene seriye avou l' Nouve Zelande, el Chine eyet surtout l' Brezil, i n' faleut nén trop croere å miraque. Et ça aveut må cominchî avou el yink a rén pou l' Brezil. Les deus ôtes pårtiyes, is les ont wangnî. Pou shure, on rténra l' victwêre 3 a 2 eyet l' eliminåcion di l' Italiye. Les espwêrs du fotbale beldje estént en dmi finåle el mérseule èquipe d' Urope. Avou zels, li Nidjeria, l' Årdjintène eyet l' Brezil. Mins, pou les dmis, is ont stî spotchîs pa l' Nidjeria so l' escore di 4 a 1. I dmereut l' pitite finåle el vénrdi conte el Brezil, mins les espwêrs ont stî batus troes a rén.
Pou nozôtes, les Walons, c' est broke di viole pou ene medaye. Les Flaminds avou Tia Hellebaut e hôteur end ont yene d' ôr, sins roubliyî l' årdjint du 4 côps cint metes des couméres.
On rténra el nadjeu Michael Phelps qu' a wangnî 8 medayes d' ôr (eyet co el chife pôrte-bouneur des Chinwès). L' ome, qui tchåsse du cénquante, a dispassé Mark Spitz qui nd aveut rascoudu 7.
Etou l' ome el pus rade, el djamayikin Bolt, avou ses deus medayes eyet ses deus rcôrds du monde su cint et deus cint metes.
Les djeus chinwès ont rashonné 11.128 sportifs di 205 payis 16 djoûs å long. I gn aveut 96 Beldjes. On a distribuwé 302 medayes d' ôr. L' evenmint a stî couvru pa 30.000 gaztîs, omes di radio ou di bwesse âs imâdjes. Låvå, i gn aveut 74.615 volontéres ercrutés på comité des Djeus.
Asteure, nos ratindrons Londe en 2012.
Jean Goffart, li 25 d' awousse 2008