Djans ! Dijhans tot dabôrd ene pitite sacwè : ene robete, c’ est on bisteu d’ basse coû, ki dinrè del tchå, motoit si pea. Mins ci n’ est gote ene atelêye k’ on va cadjoler et kifiesti. Ci n’ est nén l’ efant del famile ; k’ ele dimane e s’ plaece !
Çoula estant bén clair, preparans ns a nd ascoyî onk.
Prumirmint, a dj’ ene plaece po l’ mete ? E-n ene cinse, c’ est åjhey : ene inglêye divins li ståve, o dvins on tcheri, wice l’ odeur et les petales ni dzôrnêyront nén.
Obén, aveur ene pitite cahoute di plantches avou kékes platenes, c’ est co bon.
Vola leu måjhon. Mins elzî fårè des meubes. Por zeles, ci serè ene gayole. On l’ pout atchter tote fwaite ; mins dj’ el voe mî di les fé lu-minme. Des resses vinant do scrinî o do tcheptî, et cweri kékes bokets d’ griyaedje. On braket, on mårtea, des clås et des clames, et zipezape, et tipetape : vo vs la a l’ ovraedje !
Purdoz asteme, tot-z arindjant li cwårtî, k’ elzî fåt ene plaece po magnî et pixhî et petaler, ene ôte po doirmi et djonnter.
Kimint les alez vs nouri ? Bén seur, des magazins ofrixhèt des amagnîs tot presses, setch torteas, avou des vitamenes, et minme ene proteccion disconte des maladeyes. Mins vs n’ estoz nén pouri nawe, mi shonne t i. Adon, vs iroz cweri vos-minme li fôraedje.
Ki fåt i åzès robetes po crexhe et ecråxhî ? Alez côper des berwetes di yebes, di såvadjes cécoreyes, avou leus florins, minme leus raecenes, des coxhetes di så, di frinne, di faw, d’ ônea… Cwand vosse corti vs dene trop di verdeures, o si ele kimincèt-st a diflouwi, les ptites biesses endè seront bråmint continnes.
Mins loukîz bén a n’ les nén epwezner, ca sacwantes plantes les polet fé crever : ranonkes botons d’ ôr, fleurs di coloûte et oreyes-d’-ågne, rubåbe. Et minme les crompires, ki vos è ploz portant dner les pelotes, mins bén rassetcheyes e fornea do stouve.
Sav bén ene pitite sacwè ? Divins les biesses (come divins les djins, dabôrd), si on vout aveur des djonnes, i fåt ene frumele et on måye : ki ci-voci seuxhe on bon potcheu et ki cisse-ciale seuxhe bén coeye, et çoula vs dinrè des djonntêyes préjhåves [appréciables], des ptitès robetes assez, et… on rabiot d’ ovraedje. I vos rfårè des gayoles, cweri pus d’ amagnî, rinetyî deus côps dpus, et tot l’ ôte resse.
O ! ni soeyoz ddja maké d’ dizespwer ! Ni vs tchagrinez nén : si vs polîz saveur ké plaijhi a lzès vey teter leu mame, crexhe, djouwer ! Si vs savîz come on-z est ureus di les tni e s’ mwin, di les candôzer ! Et vos efants, alôrse ! I n’ si polèt pus passer d’ elzî dner on boket d’ raecene, ene pelote di peme, do souwé pan. Fijhoz les tchoezi on ptit no a LEU ptit lapén ; k’ i s’ endè sintexhe responsåves ; k’ il aprindexhe a dner on côp d’ mwin po-z aler cweri do fôraedje et po ramasser les crasses. Ci serè on clapant pasmint d’ tins cwand i n’ vont nén a scole. D’ ene sifwaite manire, vosse aclevaedje pout divni ene pårteye di leu educåcion.
Vos alez-st aprinde a-z ovrer l’ bwès et les usteyes, kinoxhe les plantes a côper (et sortot, les cenes a leyî), rissinti des sintimints. Houte di çoula, vos aprindroz ene sacwè profitåve a vos efants, po asteure et po pus tård.