(ratournaedje fwait leye tote seule,
prumire ouve e walon)
Alecs nu savot cwè fére du s’n après-mîdi. Ç’ astot ène djoûrnêye a paurt pasku lu trézôⁿr da Tchofile astot counu. I catournot ; i racatournot. I pinsot a s’ frére, èt a s’ fârde, èt ses scrîjadjes. Ç’ astot vrêy u nin ? Ç’ ku Pîre racontot d’ leû pére lu surpurnot. A-z-î rwêter, d’ èn ôⁿte des costés, gn avot brâmint des djins ki l’ surpurnint ces djoûrs ci. Pîre k’ avot l’ pèton ; Marîye-Nowèle k’ astot toute bèle ; sa mére ki savot pou l’ trézôⁿr ; su pére avu ses mèssadjes ; Anjline k’ astot doûce-alin.ne. « Tous contes fwêts : i gn è k’ mi ki n’ surprind nolu », k’ i sondja. Adon, i monta kêre la fârde, pî ala s’ mète su in banc ou courti ou solê.
D’ abitude, i n’ lîjot ku pou s’ adwârmu. Ènut’, i s’ surpurnot di lîre après non.ne.
Tchofile astot come les ôⁿtes crapauds du viadje. Ç’ astot bin insi. Pou sa mére, èn èfant k’ astot niche, ç’ astot èn èfant an boune santé. Tchofile astot d’ atake. Tout d’ in côⁿp, i sintot la flate, lu strin, la fumîre, l’ êwe du l’ ètan, les scwâces, les chites du pouye, les brès pou les crakes. Sins rin dîre, Alicse sintot dud dû çk’ i ruvnot. Èt atincion ! il avot intèrèt a lî dîre la vèritêye, pask’ èle tumot jusse a pôⁿ près a tchèke côⁿp. Tchofile n’ è ruvnot nin. Èt co mwins’ du l’ esplicâcion du s’ mére. « C’ est mu ptit dèt ki m’ l’ è dit. » Pour li, c’ astot cauzu dul majîye. Pa des côⁿps, les méres ont des antenes.
An rwêtant d’ in pôⁿ pus près, Tchofile n’ astot cand minme nin come les ôⁿtes. Il inmot bin les flauwes, les crakes. Ç’ astot in fâmeus arsouye. Mês jamês mwêjmint. I n’ astot k’ in bôⁿreû d’ crakes. Mês, ç’ astot d’ famile. Su grand-nonke, Abèl, lî avot mètu l’ pî dins lu strî estant tout ptit. Tous les djoûrs, i lî racontot des flauwes. Pou fini, Tchofile vlot sayer ossi, mês tout seû.
La prumîre victime, c’ è sté la Mèlîye. La Mèlîye, ç’ astot la fame du s’ grand-nonke. Ç’ astot ène pitite fame k’ astot fwârt nayive. Ele tunot des pouyes èt des robètes. Tins dul nute, lu djon.ne gamin rintra dins la grègne. Il avot veû k’ ène mére robete s’ aratchot les poys. Avu du foûr, èlle avot fwêt in ptit ni, pask’ èlle alot binrâde awèr ses djon.nes. C’ est la ku Tchofile catcha trwâs ûs avu in niyaud.
Lu londmwin, la Mèlîye avot ène sacrée tchêsse. On aurot dit la Bernadète ki ruvnot dul grote du Massabiène. La robète avot pounu. Abèl sorît. Èle lu surprindrè toudi.
« Ça tume bin. Dju vlo fwêre des wâfes, dit-st èle la Mèlîye. »
Èle purnut s’ pus bê plat. Ç’ astot in plat d’ famile. I valot brâmint des sous, a çk’ on djot. Èt pou ça, èle n’ ôⁿzot s’ è sèrvu.
Èle câssa l’ prumî û… èt dj’ vous lêche a sondjî. Lu plat astot tout findu. « O ! lu plat du nonke Djan ! ».
Toute bièsse, la Mèlîye ruwête l’ û co tout intîr dins sa mwin.
« T’ n’ ès don nin veû k’ ç’ astot in niyaud ?! »
Abèl astot an colere. Il astot mwês pou l’ restant dul djoûrnêye. La Mèlîye brèyot in pôⁿ, mês Abèl nu s’ tracassot nin. Lu vî oume su dmandot kî çk’ årot bin polu fwêre ça.
C’ est a ç’ moumint la ku Tchofile intra. Il astot tout binauje du vèy les rézultats du s’ flauwe. C’ è-st insi k’ i s’ è vindu. Lu ptite clignete d’ Abèl lî fjit comprinde. Mins nin al Mèliye. Èle brèyot toudi. Èle racontot des cayets k’ on n’ compurdot nin. « C’ est la faute du niyaud », dit-st i l’ Abèl tout an rwêtant nosse Tchofile.
Duspu ç’ djoûr-la, Abèl s’ è bin rvindjé. I loumot l’ gamin « niyåd » a kî vlot l’ atinde. Nawêre, in sôⁿbriket, dins nosse payis, i gn avot rin d’ drole avu ça. Parègzimpe, Tchofile ruloumot Alfred’, su vèjin croufieûs, « Chichite ». Lu mneûjî, ç’ astot « Rututu » ; lu bèdaud, « Djèdjè », èt lu cé ki tnot lu caberdouche, ç’ astot « Èlbèrg’ », lu nom dul bîre. Les djins avént tourtous rovié comint ç’ ku cès-t-la su loumint dvant.
L’ istwâre du niyaud, ç’ astot la prumîre flauwe da Tchofile.
Mês l’ Tchofile nu s’ è nin arèté la. Il è sté jusca bouchî la tchminêye du Bismark. Il avot grimpé padrî avu deûs dul minme sôⁿrte ku li, û çku l’ tèt vint tout près d’ l’ oûrlê. La maujon astot dins l’ minme ètat ku cand s’ grand-pére prusyin l’ avot achté. K’ il astint binaujes du vèy Fran’s’ sortu avu ène figure du djambon afumé, èt in tricot ki scratchot dul fumîre. A Brau, c’ è duvnu in floriconte.
Prezinté ås scoles di Bive li 20 di may 2025 (scoles pås scolîs); li rortografieu a rcandjî kékes passadjes.