Elwè Golinvå, c’ esteut on vî djonne ome, come i gn è-n a co beacôp amon nozôtes, e l’ Årdene. A leu måjhon, i gn aveut cénk come lu. Il estént trop pôves po pårti les kékes cayets k’ il avént, et trop laids po trover des comeres. I gn aveut djusse li båshele k’ aveut on pô d’ aleure, mins ki dmoréve avou les frés.
I morèt tertos, såf l’ Elwè. Il esteut tot seu. I tournéve må. On pô såvadje ; èn oûsse, cwè ! Il esteut minme on pô metchant. Et on l’ loméve Gogol, çou ki l’ rindeut co pus mwais. Et come tchaeke anêye, li dimegne di Påke, les gaméns, leus raketes al mwin, tchantént leu tchanson divant l’ måjhon d’ Elwè : « Ramtatam, cwareme eva ; cwand on dene des oûs, cwareme est foû ; cwand on n’ è dene pont, cwareme dimeure. »
I conoxhént dvant li response da Gogol. Adon, i tournént les talons, e djhant come po taper on mwais sôr : « Les poyes crevront. » On djoû å cminçmint d’ l’ anêye, c’ esteut l’ ramassaedje po l’ grand feu. Les efants saetchént ene tcherete. Et djusse divant mon Gogol, gn a ene rowe ki skete. Si tchvå esteut djustumint atelé å begnon. Li pus grand des gaméns saya, et dmanda å Gogol po-z awè si tchvå. Il a yeu bea l’ priyî et l’ supliyî, gn a pont yeu d’ avance. Gogol esteut bén trop binåjhe do dire « niete ».
Tchofile ni l’ a nén rovyî. I n’ pleut nén croere k’ èn ome saveut-z esse si mwais. I dveut dmorer on pô d’ bonté cwanlminme, a ç’ vî oûsse la. I vleut ariver a l’ mostrer, mins i lyi fårè del pacyince, et tuzer on sacré côp.
Tchofile a yeu bråmint del pacyince. I kessiona a gåtche, a droete, po conoxhe les abitudes då Gogol. Il aprinda k’ al Sint-Elwè, après messe, Gogol si foteut ene tchike å peket.
Tchofile årè dandjî di s’ grand-nonke, Abel. I dveut-z esse seur ki Gogol aléve esse bén sô li prumî d’ decimbe, et ‒ pocwè nén ‒ î esse co on pô dpus k’ dabitude.
Li djoû k’ on-z a dit, après messe, Abel esteut amon Remi Rezete å cåbaret. Gogol î esteut avou si tchvå. I l’ inméve bén, si tchvå. Si no, c’ esteut Bixhete. Elwè esteut dins s’ cwén, et beveut tot seu. Pu, gn a on cuzén do Sårt k’ a vnou boere avou lu. Abel riwaitive. I n’ aveut rén a fé.
Al fén, Gogol esteut si télmint berzinke k’ i n’ saveut ddja pus comint çk’ i s’ loméve. Bixhete li ramoenna al måjhon.
Il esteut ût eures cwand Abel ariva amon Alicse et Tchofile. I lzî raconta ki Gogol esteut plin come tote li Pologne. Abel aveut reyussi a fé çou k’ i dveut.
Viè meynute, Tchofile ala drî l’ eglijhe ritrover ses soçons. Li Dédé, li fi do marixhå, esteut la. C’ esteut lu l’ pus impôrtant po l’ operåcion. Schoûtez bén.
Tchofile aveut decidé d’ ataker l’ ome pawou çk’ il aveut petchî.
Il ont dismantchî, dismonté l’ begnon. Li fén Mimile a ridé dins li ståve et drovi l’ ouxh. Tertos eshonne, il ont metou l’ caisson do begnon ‒ et les pîs ‒ dins li ståve, et il ont tot rmonté. Rén d’ cassé ! Pont d’ brut ! A ! c’ esteut ene foirt bele bezogne.
Tot shonnéve normå, a pårt k’ ene éndjole di cinse esteut dins on ståve la k’ il esteut impossibe di l’ î fé intrer.
Tård dins l’ matinêye, Gogol a drovou èn ouy. I veyeut brouyî. Kékes munutes après, i rconoxha s’ tchambe. Rén n’ aveut candjî dispu ersè. I s’ leva, mins si stoumak n’ esteut nén dacoird. Tot d’ on côp, il aveut trop tchôd. I n’ ava ki l’ tins d’ ariver å ståve, et rnåder tos les pekets del shijhe. Et-z eraler a s’ coujhene sins vey li begnon.
Il aveut froed. I fjha do feu et cassa cwatre oûs dins ene paile avou deus kertons. Rén d’ mî po-z esse d’ atake. Après côp, il a doirmou tote l’ après-nonne. Aviè cénk eures, il a ndalé mode les vatches. « Miyård di djus ! Cint miyårds di djus ! Meye miyårds di djus ! » I tournéve åtoû do begnon et i s’ gretéve li tiesse.
Li londmwin, i s’ dimandéve co kî çk’ aveut polou fé ça. Les troes cwårts do viyaedje ni l’ inmént nén et nd estént bén capåbes.
Li sorlondmwin, i mzura po rexhe li begnon do ståve. C’ est k’ i nd aveut dandjî, di s’ begnon. Et il aveut dandjî d’ on côp d’ mwin, ossu. Mins il esteut tot seu, må inmé, pitieus.
Il a stî amon Abel, li seu ki lyi aveut dit bondjoû al Sint-Elwè. Abel esteut foirt sibaré. I n’ lî aveut pus cåzé dispu dijh-nouv cint saze. I lyi raconta s’-n afwaire. « I fåreut ki dj' våye vey ça did pus près » dit-st i l’ Abel. « Vinoz vey ! » « O ! »
Abel n’ a nén rispité. I lyi fåreut troes cwate omes, mins i travayént. « Ubén… » « Ubén cwè ?! » « Kékes gaméns ; ça pôreut aler. » « Et vs creyoz ? » « Åy, vårmint ! »
Abel veyeut l’ Dédé do marixhå ki djouwéve å ceke. Ça lyi a dné ene idêye. I criyît après l’ gamén po-z aler cweri li binde des cénk-z ôtes. Il î ont stî d’ bon keur, hin.
Et dispu don, Elwè esteut foirt ricnoxhant eviè les efants.
Away, ça, ç’ côp la !
Prezinté ås scoles di Bive li 20 di may 2025 (scoles pås scolîs); li rfondeu a rcandjî sacwants passaedjes.