Zande ni saveut cwè fé di s’-n après-nonne. C’ esteut ene djournêye a pårt paski li trezôr da Tchofile esteut cnoxhou. I catournéve ; i racatournéve. I pinséve a s’ fré, et a s’ fåde [farde, chemise de documents], et ses scrijhaedjes.
Esteut ç' vraiy u nén ? Çou k’ Pire racontéve di leu pere li sbaréve on pô. A-z î rwaitî, d’ èn ôte des costés, gn aveut bråmint des djins ki l’ surpurdént, ces djoûs ci. Pire k’ aveut l’ peton ; Mareye-Noyete k’ esteut tote bele, si mere ki saveut po l’ trezôr ; si pere avou ses messaedjes ; Andjlene k’ esteut doûce alinne. Tos contes fwaits : i gn a k’ mi ki n’ sorprind nolu, k’ i sondja.
Pu i monta cweri l’ fåde, et s' aler mete so on banc e corti å solea. Dabitude, i n’ lijheut ki po s’ edoirmi. Enute, i s’ sorpurdeut do lére après nonne.
Tchofile esteut come les ôtes crapåds do viyaedje, et c’ esteut bén insi. Po s’ mame, èn efant k’ esteut niche, c’ esteut èn efant e boune santé.
Tchofile esteut d’ atake. Tot d’ on côp, i sinteut li flate, li strin, li foumire, l’ aiwe di l’ astantche, les schoices, les schites di poye, les strons di tchvå. Sins rén dire, Alicse sinteut did dou çk’ i rivneut. Et atincion ! il aveut interesse a lyi dire li verité, pask’ ele touméve djusse a pô près a tchaeke côp. Tchofile n’ è rivneut nén. Et co moens di l’ esplicåcion di s’ mere. « C’ est mi ptit doet ki m’ l’ a dit. » Por lu, c’ esteut cåzu del madjeye. Pa des côps, les meres ont des antenes.
E rwaitant d’ on pô pus près, Tchofile n’ esteut cwanlminme nén come les ôtes. Il inméve bén d’ raconter des flåwes, des crakes, di djouwer des toûs, et minme des kéntes å rvier. C’ esteut-st on fameus arsouye. Mins djamåy mwaijhmint. I n’ esteut k’ on bôreu d’ crakes. Mins c’ esteut d’ famile. Si grand-nonke, Abel, lyi aveut metou l’ pî dins li strî estant tot ptit. Tos les djoûs, i lyi racontéve des flåwes. Po fini, Tchofile vleut sayî ossu, mins lu tot seu.
Li prumire victime, ç’ a stî l’ Meliye. Li Meliye, c’ esteut l’ feme di s’ grand-nonke. C’ esteut ene pitite setche feme k’ esteut del boune anêye [crédule]. Ele tineut des poyes et des robetes. Tins del nute, li djonne gamén rintra dins l’ gregne. Il aveut veu k’ ene mere di robete si råyive les poys. Avou do four, elle aveut fwait on ptit ni, pask’ elle aléve bénrade awè ses djonnes. C’ est la ki Tchofile catcha troes oûs avou on niyåd. Li londmwin, li Meliye aveut ene sacrêye tiesse. On åreut dit li Bernadete ki rivneut del grote di Massabiene. Li robete aveut ponou ! Abel soriyive. I sereut todi reyusse divant l’ doûce creyance di s’ feme.
« Ça tome bén. Dji vleu fé des wåfes, dit-st ele li Meliye. »
Ele purda s’ pus bea plat. C’ esteut on plat d’ famile. I valeut bråmint des liårds, a çk’ on djheut. Et po ça, ele ni s’ è oizeut sovint siervi.
Ele cassa l’ prumî oû… et dj’ vos lai sondjî. Li plat esteut tot findou. « O ! li plat då nonke Djan ! ».
Tote biesse, li Meliye riwaitive l’ oû co tot etir dins s’ mwin.
« N’ ass don nén veu k’ c’ esteut on niyåd ?! »
Abel esteut måvlé. Il esteut mwais po l’ restant del djournêye. Li Meliye breyive on pô, mins Abel ni s’ tracasséve nén. Li vî ome si dmandéve kî çk’ åreut bén polou fé ça.
C’ est a ç’ moumint li ki Tchofile intra. Il esteut tot binåjhe di vey les rzultats di s’ kénte. C’ e-st insi k’ i s’ a vindou. Li ptite clignete d’ Abel lyi fjha comprinde. Mins nén al Meliye. Ele breyeut todi. Ele racontéve des cayets k’ on n’ compurdeut nén. « C’ est del fåte do niyåd », dit-st i l’ Abel tot rwaitant nosse Tchofile dins ouve.
Dispu ç’ djoû la, Abel s’ a bén rvindjî. I loméve li gamén « Niyåd » a kî vleut l’ etinde. Nawaire, on sôbriket, dins nosse payis, i gn aveut rén d’ drole avou ça. Paregzimpe, Tchofile riloméve Alfrede, si croufieus vijhén, « Chichite ». Li mnujhî, c’ esteut « Rututu » ; li mårlî, « Djèdjè », et l’ ci ki tneut l’ caberdouxhe, c’ esteut « Elberke », li no del bire.
Ces såvadjes nos la estént si bén enancrés k’ on n’ saveut ddja pus comint çki les spotés si lomént dvant.
L’ istwere do niyåd, c’ esteut l’ prumire kénte da Tchofile.
Mins i nu s’ a nén aresté la. Il a stî disca boutchî li tchminêye då Bismark. Il aveut gripé padrî avou deus del minme sôre ki lu, eyu çki l’ toet vneut toprès do hourlea. Li måjhon esteut dins l’ minme estat ki cwand s’ grand-pere prûssyin l’ aveut atchté. K’ il estént binåjhes do vey Franse sôrti avou ene figueure di djambon efoumé cwand on l' dispind del tchiminêye, ey on texhou [tricot] ki scraetchive del foumire.
A Brå, l’ istwere del tchiminêye ristopêye, ça a divnou ene racontroûle po dire al shijhe.
Prezinté ås scoles di Bive li 20 di may 2025 (scoles pås scolîs); li rfondeu a rcandjî sacwants passaedjes.