Li Crolé, ki s’ mwaisse a batijhî insi paski ses pwels sont-st ossu roeds k’ des tuyôs d’ pupe, c’ est l’ tchén del cinse. Tot çk’ i gn a d’ pus baståd. Ça n’ l’ espaitche nén d’ esse ene boune biesse. S’ i n’ a nén d’ cwè esse fir di tayons k’ persône ni conoxhe, i s’ pout vanter d’ awè bon caractere.
Po l’ fidelté, vos courrîz lon po trover mia k’ lu et il est l’ meyeu des camaerådes da Bebert et da Mimiye. Dji vos acertene k’ i gn a ene, di xhaxhlêye, cwand i fwaiynut l’ sot zels troes.
C’ est tot djusse si l’ cinsî et minme li cinsresse ni s’ î metnut nén ossu. Li boune oumeur, ça s’ atrape ossu bén k’ les rovioûles ou les noerès ploketes.
Tot å moens cwand on-z a l’ tchance d’ inmer l’ djonnesse et di n’ si nén leyî aler a divnou des vîs bezéns, des vîs berdelåds, come i gn a dtrop. Ureuzmint po Mimiye et Bebert, leus parints n’ sont nén di ç’ sôre la.
Li cinsî xhufele come on miele e moennant si tchvå, et tenawete, i trouve li tins d’ amuzer les efants.
Li cinsresse tchante voltî et ele ni s’ plind nén d’ awè pierdou s’ tins cwand elle a djouwé ene pårt al kine ou conté sacwantès fåves, k’ on schoûte li boutche å lådje.
Li cinse ni va nén pus må po ça, creyoz m’, et on s’ î voet voltî, biesses et djins.
Cobén d’ côps etind-t on so ene djournêye : « ou est i l’ gamén ? Mimiye n’ est nén co rintrêye ? Ou çki m’ popa est evoye ? Man, ou est i, l’ Crolé ?
Et l’ Crolé, lu, naxhe tocosté po rtrover l’ ci ki n’ est nén la.
Alez ! C’ end a stî ene, d’ afwaire, li prumî côp k’ i n’ a nén rintré a l’ swerêye. Gn a persône ki s’ vleut decider a-z aler coûtchî. Totes les cénk munutes, cwand ç’ n’ esteut nén onk ki coreut so l’ ouxh, c’ esteut l’ ôte.
‒ Crolé l Crolé ! Vinoz, mi ptit !
Deus djoûs, troes djoûs al file, ç’ a stî l’ minme paskeye.
‒ C’ est ene fouke, ô ! I rvénrè, dijheut i l’ cinsî.
Mins tote li måjhone esteut d’ doû. Minme li tchet venéve tocosté come on pierdou.
Après ene samwinne, tolmonde pinséve sins l’ oizeur dire : « on nos l’ a touwé ; nos nel rivierans pus. » On cåzéve do Crolé come on dvize d’ on parint moirt, a ça près ki l’ bén k’ on djheut do tchén, on l’ pinséve.
Cwénze djoûs ont passé, pu troes samwinnes. Po consoler ls efants, li cinsî aveut prometou d’ rapoirter on djonne a l’ prumire ocåzion. Mins vla k’ on côp, e passant dé l’ tcheri, Bebert a etindou djemi. I n’ s’ a nén trompé, savoz ! Il esteut seur d’ awè rconoxhou l’ vwès di s’ Crolé k’ esteut la, tronnant, tot ramwinri, ni s’ oizant mostrer.
Diu sait portant s’ il aveut fwin, et co pus fwin d’ caresses di ses mwaisses ki d’ pwin.
Bebert l’ a adviné. Il a corou dé li, l’ prinde so s’ schô et l’ cadjoler. Li biesse tressinéve d’ binåjhté.
‒ Est çk’ on m’ è vout Bebert ? Est çki dj’ serè batou ?
‒ Batou pocwè, mi ptit Crolé ? Non endon ! I gn a nolu ki pinse ki c’ est d’ vosse difåte, alez ! Les prumîs djoûs, nos avans yeu l’ idêye tertos k’ on vos aveut resseré. Pu, nos avans pinsé k’ on vos aveut touwé. Nos avans byin yeu del poenne, savoz ! Ewou avoz stî, ptit rôleu ?
‒ Fåreut vali k’ dj’ åreu stî touwé ! Schoûtez m’, Bebert. Dji n’ serè ene miete trankile ki cwand dj’ årè conté l’ tchôcmwår ki dj’ a viké. La cåzu on moes ki dj’ sôrtixheu al vesprêye, fé mi ptit toû divant d’ aler coûtchî.
« I fjheut påjhir, et cåzu ttossu clair ki plin djoû plinne eure télmint ki l’ lune esteut bele. Dj’ a bawé après come on djonne sot, pask’ i m’ shonnéve ki dj’ veyeu les rais d’ loumire dischinde did lahôt disk’ addé mi come s’ i m’ avént vlou kekyî. Tot d’ on côp, i gn a onk di ces rais la ki s’ a vnou cotourner åtoû di m’ coir et dji m’ a sintou assaetchî.
Li rai d’ loumire rimoussive dins lu-minme, vos savoz bén, Bebert, come des coines di caracole. Cloupe ! So l’ tins ki l’ tchampete s’ åreut metou a rloper on vere di gote, li rai a rmoussî disca l’ lune, et dji m’ a rtrové stampé so cwate pates ki tronnént. I gn aveut d’ cwè ! O, a ç’ moumint la, i fjheut påjhir, co pus påjhir ki dsu l’ tere. Mins dj’ esteu si bén disbåtchî d’ vos awè cwité tertos, di esse lon erî d’ nosse måjhone.
Cwè fé ? I faleut bén ki dj’ saye di trover on mwaisse po n’ nén mori d’ fwin. Dji m’ a trinné so m’ vinte, venant, tronnant et djemixhant. Dji n’ riconoxheu nén ene des odeurs d’ avår ci.
On moumint dné, dj’ a veyou on ptit bastimint k’ dji n’ såreut mia rmete k’ a on ran d’ pourceas po l’ hôteur et po l’ grandeur, mins tos les meurs estént d’ fier.
Saizi, dj’ a bawé on ptit côp. L’ ouxh s’ a drovou a craeye et on boket d’ ome, nén pus grand k’ èn efant d’ cénk ans, mins avou del båbe disca ses djnos, a vnou waitî. Si tiesse esteut ossu ronde k’ ene bole ås gueyes.
Po l’ groxheur di s’ coir, elle esteut teribe, come si vos årîz vos Bebert, on tchôdron a cure li cabolêye so vos spales. » Bebert a radmint sintou s’ tiesse a deus moens et il a fwait : ouf !
« E m’ veyant, l’ ome a rclapé l’ ouxh bonzet roed, e criyant come on dislaxhî. Dj’ a compris pocwè ene miete pus tård : vaila, les tchéns n’ sont nén pus gros k’ des rats, les vatches ont l’ groxheur d’ on nourin, et tot est a l’ advinant. Dji vou bén croere ki l’ boulome a stî strindou e m’ veyant. Cwè çk’ i vos shonne Bebert ? Si vos trovîz tot d’ on côp, la dvant vos, on tchén ossu gros k’ deus vatches ? »
Bebert a waitî åtoû d’ lu sins responde. Il esteut télmint efoufyî d’ etinde l’ istwere do tchén k’ i n’ esteut nén la si a s’-t åjhe.
- Continouwez, Crolé, dji transi d’ sawè l’ resse.
- Ene miete après, l’ ome del Lune a co rivnou drovi l’ ouxh a craeye. Dji m’ a trinné so m’ vinte disk’ astok di lu e fjhant hossî m’ cawe.
Il a bén veyou k’ dji n’ pleu må ; i m’ a leyî intrer.
Ki n’ m’ a-t i retchessî totshûte, cwand dj’ åreu co dvou crever d’ fwin ! A ! si dj’ aveu sepou adviner pocwè k’ i s’ aschinéve a m’ diner a magnî a m’ fwin !
E schoûtant cåzer les vijhéns ki vnént al shijhe et ki dvizént li walon del Basse Sambe, djusse come vos et mi, dj’ a-t apris a conoxhe ene miete li payis et les djins. Dj’ a seu k’ i gn a deus provinces dins l’ Lune, li Verdasreye et l’ Djaenistreye. Les djins s’ lomnut des Verdasses et des Djaenisses. »
Bebert ni mouvtêye nén, mins i sondje a pårt li ki gn a des Verdasses ôte på k’ dins l’ Lune.
« Dj’ a co apris k’ les Lunîs inmnut les biesses ostant k’ on lzès sait inmer. I n’ ont k’ ene ambicion : fé nosse bouneur.
Seulmint, li mitan des Lunîs s’ a fotou e l’ tiesse k’ i gn a k’ on seu modele di bouneur et k’ i gn a k’ zels di capåbes d’ el fabriker.
L’ ôte mitan des Lunîs pinse ki l’ bouneur des biesses ni s’ trouve nole pårt d’ ôte ki dins leu contrêye.
C’ est po ça k’ les Verdasses et les Djaenisses sont-st e l’ guere dispu des ans et des razans. Ostant dire dispu todi, dispu ki l’ Lune est Lune. Compurdoz ça, vos Bebert ?
Les Verdasses ni s’ contintnut nén d’ fé a leu môde, dins leu Verdasreye. I pretindnut co, ådzeu do martchî, oblidjî biesses et djins del Djaenistreye a candjî leu vicaedje. Di l’ ôte costé del frontire, c’ est l’ minme diåle. Mins l’ pus drole di tot, c’ est k’ ni ene ni l’ ôte des façons n’ convént åzès biesses et k’ ele n’ ont djamåy li credit d’ dner leu-z advize.
Mia k’ ça ! Leus mwaisses ni s’ batnut nén zels-minmes ! I fwaiynut bate leus tchéns, leus tchets, leus boûs.
Savoz bén comint ? Les Djaenisses racontnut a leus tchéns : « Si djamåy i fåt ki t’ vikes come par la, t’ årès pus d’ côps d’ baston ki d’ bokets d’ tchå ! Et t’-minme, pôve tchet, t’ årès pus d’ côps d’ pî ki d’ djates di laecea. Et twè, boû, ti n’ årès pus l’ tins d’ shofler. Hû et hû tote li djournêye. Et pont d’ petråles dins l’ cabolêye ». Les efants tchantnut ça e rivnant d’ li scole, come on tchante vaici « Caracole et mousse tes croles ».
Les Verdasses, zels, i contnut k’ ene biesse did par la, elle a on muzea tote li djournêye.
Ele ni oizreut djamåy bawer ou gnåwer ou rboerler ki cwand on nnî dene li permission. Et si, pa måleur, ele ni bawe nén, ele ni gnåwe nén, ele ni rboerlêye nén dins l’ ton, elle a rade apris çou k’ ça costêye !
D’ on costé come di l’ ôte del frontire, on n’ sondjive k’ a on plan : trover l’ moyén di s’ rinde mwaisse di tot l’ payis, et-z î fé li lwè, cwand on dvreut co s’ bate disk’ å dierin sôdård.
C’ est a n’ nén croere, sortot k’ totes les biesses, ossu bén d’ Djaenistreye ki d’ Verdasreye, ni dmandèt k’ a viker påjhires. Ele si fotnut nén må des ramaedjes di leus mwaisses et n’ end ont a keure di çou k’ on fwait d’ l’ ôte des costés del lene markêye al tchåsse so l’ daegne po mostrer l’ limotche.
Ci lene la, i gn aveut mwints marous k’ avént passé houte et trové l’ tchåsseure a leu pî d’ l’ ôte costé ! Et mwints tchéns ossu. Ça fwait k’ å dbout d’ on ptit tins, cwand l’ guere ripurdeut, on s’ cohagnive ey on s’ gretéve e l’ famile ; pus d’ ene ancyinne crapåde sayive di stronner s’ vî galant ! Todi est i ki cwand dj’ a-t arivé so l’ Lune, li guere esteut co on côp presse a s’ resprinde.
Li Verdassî k’ esteut divnou m’ mwaisse aveut totshûte compris k’ ene biesse ossu foite ki mi, si elle esteut bén dresseye, aléve fé on carnaedje di tos les tonoeres di diåle.
Li laid mvé m’ aveut si bén monté l’ tiesse avou ses boignes contes, ki dj’ åreu magnî tot crou tot çki vneut d’ Djaenistreye, biesses et djins. Dji m’ rafiyive d’ awè l’ ocåzion d’ dårer dsu po mostrer çou k’ dj’ esteu capåbe di fé.
Kî est çki såreut dire å djusse pocwè ki l’ bataye a comincî ? Dji croe k’ c’ est a cåze d’ on gros målasné d’ boû d’ Djaenistreye. I saetchive a l’ tcherowe tot astok del frontire et il aveut spotchî on djonne tchet ou on djonne poyon d’ Verdassreye k’ aveut passé l’ lene sins l’ sawè, come on ptit storné.
Mi mwaisse, k’ aveut l’ linwe li pus efilêye do payis, a-st emantchî on discours a tot foute djus. Dji l’ etind co :
« Tcherès biesses, vayantès biesses ! Vos tayons vont rsôrti foû d’ tere ‒ dj’ a vlou dire « foû d’ lune » ‒ po rvindjî l’ teribe afront ki les brigands del Djaenistreye nos ont fwait a tertos e spotchant on pôve enocin d’ avår ci ki n’ elzî vleut pont d’ må. Vos, les meres di tos les poyons, di tos les djonnes tchets, di tos les djonnes tchéns, vos n’ vicroz pus k’ dins les transes e sondjant ki vos efants riskêynut leu veye a tchaeke pas, a cåze del metchansté d’ nos vijhéns. Vos vos batroz disca l’ dierinne gote di vosse sonk po ki l’ djermêye ki vénrè après nos vike dins l’ bouneur. On côp po tot, nos nos rindrans mwaisses di tote li Lune et nos oblidjrans les Djaenisses a danser come nos xhufelrans. I l’ apudront, fwè d’ Verdasse ! »
E-n etindant ça, totes les biesses di Verdassreye ont gnåwé, groûlé, codåssî, boerlé, grognî.
I n’ aveut falou k’ on bea discours po ls enonder, et l’ promesse rinovlêye a tchaeke djermêye, k’ ele n’ aveut k’ a s’ sacrifyî po ki l’ shuvante euxhe li Paradis so l’ Lune.
Tins k’ on s’ aprestéve po l’ bataye, dj’ a stî fé on ptit toû disca l’ frontire. Dj’ a-st arivé djusse å bon moumint po schoûter l’ deujhinme bea discours di m’ djournêye. Monté so on stok d’ åbe, on Djaenisse k’ on-z aplodixheut a tot sketer minteut d’ ses pus foirts :
« Bounès biesses, trop bounès biesses ki vos estoz, alez co lontins leyî les traites did låvå evoyî leus espions dins nosse tcher payis ? Ureuzmint ki l’ boû l’ pus sûti del Djaenistreye ‒ ki dj’ årè l’ oneur di decorer ttaleure ‒ aveut l’ ouy bén drovou e woeyant so l’ frontire. L’ espion ki sayive di vni sorprinde nos screts a yeu bea s’ catchî, i n’ aveut nén co passé l’ lene ki l’ coraedjeus sôdård a dåré dsu meprijhant l’ dandjî, et i l’ a spotchî come i meritéve di l’ esse. Glwere a nosse boû ! Et asteure, vayants sôdårds, nos n’ avans pus k’ ene sôre a fé : wangnî ene grande bataye, po ki l’ djermêye ki vénrè après l’ vosse, vike trankile, mwaisse di tote li Lune. »
Après ça, on picupe a djouwé l’ Brabançone des Djaenisses et tote li binde a stî presse po s’ aler fé sacraminter, ou a sayî d’ sacraminter ls ôtes.
Mi, dji riyeu plin m’ vinte e sondjant a l’ sorprijhe k’ il alént awè e m’ trovant so leu voye å moumint del bataye. Dj’ è raléve tot fir do siervice ki dj’ aléve rinde, cwand tot d’ on côp ‒ c’ est a n’ nén croere ‒ la k’ dj’ a tcheyou båbe a båbe avou Cora, li ptite lexhe del martchande di boubounes di nosse viyaedje. Dj’ el conoxheu bén paski dj’ aléve sovint å boutike avou vos ou avou Mimiye.
Saizis ki ns avans stî, tos les deus ! Et figurez vos k’ elle aveut yeu l’ minme daye ki mi ! Seulmint leye, li rai d’ loumire ki l’ aveut vnou code l’ aveut leyî rtchaire e l’ Djaenistreye. Come mi, elle aveut trové on mwaisse vaila ; et come mi, elle aveut schoûté et creyou tos ses ramaedjes et ses mintes. Elle esteut presse a croxhî tos les Verdasses del Lune.
‒ Insi, lyi di dj' e breyant cwand dji lyi a yeu espliké m’ prôpe paskeye, si l’ guere comince dimwin, nos serans oblidjî d’ nos bate inte di nos !
‒ Ça djamåy, mi ptit Crolé ! k’ ele m’ a respondou. Dji vos voe bén trop voltî ! Ni vos ni mi.
Elle a cåzé tot bas a mi oraye po m’ espliker çk’ i fåreut ki nos fjhénxhe.
A ! Bebert ! Les comeres sont bén pus fenes ki les omes, savoz ! Nos fréns bén d’ les schoûter pus sovint.
Li leddimwin å matén, li guere esteut diclårêye et dj’ a voré l’ prumî al frontire.
Cora î esteut ddja, di l’ ôte costé del lene. Ele m’ a fé ene clignete, et cwand les årmêyes ont-st arivé, li djeu a stî rade reglé !
Tot çki Cora djheut et fjheut di s’ costé, dj’ el repetéve do minne.
Dj’ a sôtlé so m’ mwaisse et l’ sitårer.
‒ Tådje ene miete, Verdasse ! Dji t’ vas mostrer çou k’ c’ est del guere, mi !
Après lu, ç’ a stî èn ôte, et co èn ôte, et si pa måleur, i gn aveut on sôdård k’ aveut l’ air di vlou ataker d’ face, dji lyi plantéve mes dints dins ses pates k’ i n’ pleut pus må d’ assayî d’ mouvter.
Cora î aléve di bon cour Ossu, tant k’ a l’ fén, Verdasses et Djaenisses ranxhént come des copixhes po corou erî del frontire !
‒ C’ est l’ moumint do discours, a dj’ criyî a Cora.
Nos avans aresté les coreus, et nos avans criyî eshonne:
‒ Biesses di Verdassreye et d’ Djaenistreye, est çki vos tnoz, di tote foice, a vos touwer ou a vos coixhî po k’ vos frés did l’ ôte des costés del frontire vicnuxhe a vosse môde e l’ plaece di viker a l’ leur ?
Ci n’ a stî k’ on cri, k’ ene seule vwès, po dire : « Nos ns è fotans ! Ki tchaeconk s’ arindje po esse binåjhe a s’ môde. »
‒ Ns estans dacoird. Vos alez raler tchaeconk dé vos mwaisses, lezî-z espliker l’ afwaire. Vos n’ schoûtroz pus leus boignes messaedjes et vos les evoyroz brider les gades cwand i vos dvizront d’ fé l’ bouneur des ôtes e les touwant ey e vos fjhant touwer.
‒ Bén seur ! Il a råjhon ! Nos n’ nos lairans pus emantchî !
‒ Dji dmeure vaici avou m’ camaeråde po fé l’ police åd dilon del frontire. Si djamåy i gn a des måladvizés ki volnut rdjouwer l’ djeu, dji lzî promet ene bele pårt di plaijhi !
‒ Bravo ! Vive les djindåres !
I nos årént bén rabressî… s’ il årént yeu oizou.
I nd ont ralé, contins come des bossous, et dji pinse ki leus mwaisses ont compris ki l’ tins des batayes esteut houte. Cora et mi, nos avans berôlé sacwants djoû avå l’ payis. Les Lunîs fjhént des mouzons come on pourcea ki bagne, mins i gn a nén onk k’ a mouvté !
Ene niût k’ nos esténs d’ gåre eshonne do costé del frontire, nos avans veyou on grand rai d’ lune ki dischindeut viè l’ tere. Nos nos avans leyî rider tos les deus tt åd dilon et vo m’ ci.
Al cinse, i gn a djamåy nouk k’ a yeu l’ cour di traitî l’ Crolé d’ minteu. Mins cwand c’ est clair di bele, li martchande di boubounes k’ est d’ doûce creyance, ressere Cora et clôt les volets, télmint k’ elle a peu ki l’ pôve biesse ni s’ laiye co on côp rascråwer.
Mins si on djoû, cwand Bebert årè vint ans, i vént conter a s’ popa des istweres al cråxhe di tchvå d’ bwès po s’ escuzer d’ awè rintré a meye niût meyzeure, dj’ etind l’ cinsî responde sins rire :
‒ Est çki ti t’ prinds po l’ Crolé, m’ fi ? Dismefeye tu ki l’ Lune ni t’ apice !