Bebert a yeu les rovioûles. Ci n’ est co rén tant k’ i fåt dmorer dins s’ lét et k’ on pout fé li ptit gåté di s’ moman. Cwand ça va mia et k’ on s’ leve, c’ est ene ôte pwaire di mantches. Si l’ tins n’ est nén vraiymint fwait so muzeure, fåt dmorer resseré.
Vos veyoz ça ! Prijhnî cwand tolmonde e-st a l’ ouxh, k’ on etind djiper les gaméns et les feyes so l’ rowe.
Bebert a l’ cour gros paski s’ masseur Mimiye n’ a nén pretindou dmorer dé li. Moman ni l’ a nén vlou oblidjî. Fåt esse råjhnåve, k’ ele dit. I n’ est nén kession d’ priver tolmonde di ses plaijhis pask’ i gn a onk ki n’ pout nén les prinde.
- Si ç’ sereut Mimiye ki sereut malåde, Bebert, vos frîz ene tiesse come on tchet dins on gurzalî si dj’ vos oblidjive a dmorer dé leye.
Bebert dit k’ nonna. Portant, i sait bén k’ c’ est l’ vraiy. Dayeur, cwand moman l’ a dit, on n’ discute nén. I gn a pont d’ avance.
Mins Bon Diè ! ki c’ est long on djudi passé tot mierseu dins l’ coujhene del cinse.
Hodé d’ dessiner des måjhons sclimboignes, des otos come on n’ è vierè djamåy dissu les rotes et des avions ki minme les oujhenes d’ Amerike ni sont co presses a sawè monter, Bebert s’ anoye, li nez so l’ cwårea.
Disk’ å tchet ki n’ a nén vlou djouwer ! A moens k’ i n’ sereut mia tourné asteure ?
- Minouche ! Minouche ! Vinoz, insi.
- Leyîz m’ doirmi, vos di dj’ !
- Doirmi, doirmi. Laid ptit nawe, vos n’ avoz djamåy ki ça e l’ boutche, vos. Est ç' viker, ça ? Tofer socter ! E l’ ivier padzo li stouve, e l’ esté, nimpôrte ewou, dabôrd k’ i gn a cwate pwels di solea.
- Dji so d’ niût, ô, mi. Dji travaye so l’ tins k’ vos vos cotrouyîz dins vosse lét ene boune dijhinne d’ eures d’ afilêye.
- Mannet ptit tchet, vos vénroz ttaleure mi rprotchî di m’ ripoizer cwand dji m’ a fé nåjhi tote li djournêye.
- A djouwer a l’ bale ou a l’ clignete ?
- Taijhoz vos, minteu. Nåjhi a-z aler a scole, a schoûter l’ mwaisse, a-z aprinde mes lçons, a fé mes dvwers, a…
- A fé assoti vosse sour, et vosse moman, et co l’ tchet ådzeu do mårtchî.
- Si vos n’ vos taijhoz nén, vos alez atraper on côp d’ pantoufe !
- Ça c’ est bén ene response d’ ome ! I sont tertos les minmes. Cwand i n’ ont pupont d’ råjhons a taper dins ene discussion, alez la : on côp d’ pantoufe, on côp d’ pougn, on côp d’ pî. Ça va co bén cwand c’ n’ est nén on côp d’ coutea, on côp d’ fizik ou on côp d’ canon ! Avou des aplopéns come vozôtes, les omes et les bokets d’ ome, i n’ est nén co kession di dvizer do tins k’ on n’ vierè pupont d’ gueres.
- Tinoz, tinoz. Vos estoz bén rewoeyî ç’ côp ci ! Vos cåzez bén po on tchet ki n’ a djamåy sitî e scole.
- Ça, c’ est co ene idêye ki les omes si metnut e l’ tiesse. Seur ki dji n’ va nén a vosse sicole. Mins kî est çki vos dit ki dj’ n’ aprind nén ôte pårt ene masse d’ afwaires ki m’ vegnnut a pont po tirer m’ plan ?
- La waite ene djesse ! Et pout on sawè kéne grande sicole ki vos apurdoz, monsieur l’ Tchet ?
- Tûtûte, c’ est des afwaires di tchet ki n’ vos rgårdêynut nén ça, monsieu Bebert.
- Hoû ! hoû ! Dj’ a compris, savoz, Minouche ! C’ e-st a ene bele, endon, di scole ki vos coroz ! Ci n’ est nén po rén, alez, k’ on dit des gaméns k’ evont rôler å bwès ou a maråde e l’ plaece di vni aprinde, k’ i fwaiynut l’ tchet. A !a ! Dji vos a yeu, hin, ç’ côp ci !
Minouche a l’ air d’ awè ramassé on pot d’ froede aiwe so s’ cabu. Gn a s’ tiesse ki rmousse dins ses spales et i sere ses ouys po mia reflechi. Mins Minouche trouve todi l’ pîce po mete e trô.
- Vos n’ estoz nén lourd po on gamén d’ voste ådje. Seulmint, c’ est co todi des contes d’ ome ki vos m’ aboutez. La-t i ene sacwè ki lzî fåt noeri tolmonde, biesses et djins. S’ i sårént seurmint l’ mitan di çki nos lzî rprotchans, nos !
- O ! mi ptit tchet, vinoz so m’ schô, racontez m’ ça ! Dji m’ l’ a dmandé mwints côps, çou k’ les biesses pinsnut d’ nos.
- So vosse schô ? Dji n’ pou ddja må. Vos m’ saetchroz pa l’ cawe, vos m’ caresroz conte li pwel, et pu vos seroz tot sbaré si dj’ vos grete on ptit côp.
- L’ est bon ! l’ est bon ! Dimorez la. Mins esplikez m’ cwanlminme çou k’ vos vlîz dire.
- Rén a fé, Bebert. Les tchets n’ sont nén des racuzetes. Dayeur, la vosse sour, wai, ki rintere. Puski vos m’ avoz tolminme rewoeyî, purdoz vosse bale, nos djouwrans tot les troes.
Kéne bele pårt ki ç’ a stî ! Faleut vey come li ptit tchet tapiné s’ lancive dissu l’ bale et l’ poûssî avou ses pates, on côp a droete, on côp a gåtche, come on bon djouweu d’ fotbale. Il esteut kession d’ esse subtil po l’ rapicî. Ci côp la, cwand Bebert ou Mimiye el tapént so l’ daegn, Minouche zoupléve ttossu hôt k’ les rbonds del bale. C’ esteut vraiymint trop gaiy. Ça n’ åreut seu durer. Si ç’ n’ est nén målureus, po on côp k’ on n’ si dispitéve nén ! Dire k’ i gn aveut tant plaece a costé do bea våze k’ esteut so l’ dresse, et k’ il a falou ki l’ bale tchaiye djusse dissu.
Bén astcheyou ossu ki moman aveut djustumint metou d’ l’ aiwe et des fleurs didins ! A ! ç’ a stî on bea disdut !
Minouche a tiré s’ plan e corant evoye. Tot peneus, Mimiye et Bebert ont ramassé les bokets d’ vere et les bokets d’ fleurs, il ont rlocté l’ coujhene di leu mia, mins moman vierè tolminme totshûte li plaece vude so l’ dresse.
Mimiye est d’ advize di racuzer l’ tchet. Après tot, c’ est lu ki s’ è rtirrè l’ pus åjheymint, dit-st ele.
Et ç’ n’ est nén l’ prumî cô k’ i sôtele so l’ dresse.
Ci n’ est nén k’ Bebert waite a ene pitite minte tenawete on côp. Seulmint, i sondje ki s’ Minouche s’ esplike avou ses parints come i s’ esplike avou lu, ci serè co pire ki d’ awè dit l’ vraiy.
Ene pûnicion po l’ minte et ene po l’ våze, ça frè dobe råcion.
Mins Mimiye, ki n’ djowe djamåy avou l’ tapiné tchet, ni vout nén croere Bebert.
Taijhoz vos, sot gamén, avou vos boignes contes, dit-st ele.
- Boignes contes ? Schoûtez l’ kénte ki dj’ a yeu l’ ôte feye dabôrd.
- Dji n’ schoûte nén vos carabistouyes.
- Vos vieroz bén k’ c’ est l’ vraiy. Vos è raplez bén, l’ côp ki dj’ vos a apoirté des boubounes tins k’ vos fjhîz vos dvwers.
- Si dj’ m’ è rapele ? Dj’ el vou bén croere ! Ça m’ a shonné drole assez, paski dabitude…
- Dji les mindje bén tot seu, c’ est l’ vraiy. Dj’ aveu co l’ idêye d’ el fé ç’ djoû la, puski m’ pårén m’ els aveut dné.
- Oyi, mins i dit todi d’ fé les pårts.
- Oyi, mins c’ est m’ pårén da mi, hin ?
- Et les boubounes da nos.
- Dji nel creyeu nén. Dji m’ aveu stî catchî e sina po les sucî a mi åjhe. Dj' end aveu scroté sacwantes cwand Minouche a vnou sôter so m’ schô.
- Cwè fjhoz, Bebert ? m’ a-t i dmandé.
- Rén, di dj'. Rén ki vos rgårdêye, Minouche.
- Oho ! ki m’ respond. Ki est çki vos aprind a si bén cåzer k’ ça ? Nén l’ mwaisse di scole, assuré ? Ni co vos parints ?
- Totaleure, dji vos cåzrè a côps d’ savate, savoz, Minouche, et vos n’ mi dmandroz nén kî c’ est ki m’ l’ a apris.
- Fett Fett Fett ! Et si dj’ vos cåzreu a grands côps d’ grawe dins vos bodenes, hon, mi ?
Po k’ ça n’ toûne nén må, dji n’ a nén respondou et dj’ a ristitchî on caramel e m’ boutche. Ç’ a stî adon k’ il a rwaitî l’ saetchot d’ ene drole d’ air.
- I discrexhnut Bebert. Fåt arester po leyî l’ pårt a Mimiye.
- Tûte et mûte, Tchet. C’ est da mi tot.
- Atincion, Bebert. Dj’ esteu dins l’ coujhene cwand vosse pårén a saetchî l’ paket di s’ potche e djhant…
- Vos estoz todi metou ou çk’ on n’ a nén dandjî d’ vos, Minouche.
- E djhant cwè, k’ il a metou l’ paket dins vos moens ?
- A-t i dit ene sacwè ? Dji n’ m’ è sovén nén.
- Bebert, ça m’ fwait del poenne cwand vos mintixhoz. Dji n’ inme nén d’ fé l’ racuzete, mins si vos continouwez, i fåreut bén k’ dj’ el deye a vosse popa. Dji n’ vou nén awè so m’ consyince di vos leyî prinde des mwaijhès abitudes. Ene pitite minte ådjourdu, ene pus grosse dimwin, pu di ptit-z a ptit…
I n’ a nén achevé, mins i m’ riwaitive dins les ouys. Il a falou ki dj’ baxhe les minnes. Dj’ a rtiré m’ mwin do saetchot et il a yeu l’ air tot binåjhe. Mimiye håsse les spales et toûne li dos a Bebert.
Ele ni sait pus å djusse cwè. C’ est des crakes k’ il edvinte a fwait, sondje-t ele. D’ èn ôte costé, dji sai bén k’ i n’ est nén foirt di dnêye et k’ il inme mia tot por lu.
Ele si dmande si ele va saetchî les orayes da Bebert po lyi aprinde a s’ fote di leye ou si ele va apler l’ tchet po lyi dire merci.
Ele n’ a nén l’ tins d’ balancî lontins ; la moman ki rarive et Bebert ki sôtele a s’ cô.
- Man, dji m’ a bén anoyî tot seu, savoz ! Ça n’ a stî mia cwand Mimiye a rintré. Ns avans bén yeu do plaijhi e djouwant a l’ bale. Seulmint…
- Seulmint cwè, m’ fi ?
- Li bale a cassé l’ våze k’ esteut so l’ dresse.
Les ouys da moman s’ fwaiynut ene miete pus noers.
- Li bale ? Ele n’ î a nén stî tote seule so l’ dresse.
- Seur ki non, man.
- Vos savoz bén k’ dji n’ vou nén k’ on djowe a l’ bale e l’ coujhene.
Les deus blondès tiesses s’ abaxhnut.
- Ki est çk’ a fwait l’ såvadje ?
- Schoûtez, man, ça m’ a shonné long, savoz, d’ passer tote ene après-l’-dinner tot seu a dessiner. I s’ pout bén k’ c’ est mi, dj’ årè stî trop lontins trankile…
- L’ est bon, m’ fi. Dinez m’ on betche. Puski vos m’ avoz dit l’ vraiy, nos n’ cåzrans pus do våze. Et minme, wai, dji frè des vôtes po soper. Mimiye, rotez cweri l’ tchena ås oûs.
Sacré Mimiye va, ki n’ vout nén croere çou k’ ele lome les fåves da Bebert… S’ elle aveut seu çki lyi pindeut å nez !