Ele a stî pècque djudi passé, Mimîye qui s'pinsait si maline, Mimîye qui mèprijait les istwères d'à Bèbert et qui trétait s' frére di p'tit bârdouchî.
Ele djouwait tote seule dins l' tchèri avou s'poupène qu'èle pormwinrnait dins li p'tite vwèture qui St-Nicolè lî avait apwârté. Comme di jusse, pusqui l' poupène avait stî mèchante, si maman lî fiait des r 'proches, et nén doûcemint, dji vos l' dis. Ele alait lî d' ner sakwants clatches à s'cu, quand èle a étindu criyî s'nom. Li vwès v'nait di d'padzos l' tchaur.
- Hé Mimîye ! Si vosse Maman estait ossi malaugîye avou s'fèye qui vos avou l'vosse, vos ârîz pus sovint dè l'blouk qui des su-sucs.
Mimîye a manqué d' tchér au r'vièrs. Si prèmère idéye a stî d'apicî s' poupène et d'couru èvôye. Sauver s' t'èfant !
Ele est d'djà maman, li p'tite Mimîye, mins èle est d'djà feume ossi. Ele sère si poupène di totes ses fwaces conte lèye et rèscule rad'mint d'ène coupe di mètes en s' clénçant po vôye quî ç' qu'est catchî padzos l' bègnon.
Person-ne! Person-ne qui l'rossète pouye qui si'cocheut dins les poûssères. Mimîye risondje à ç' qu'èle lamait les colibètes d'à s'frére, ses istwères di tchè.
Bah, ouiche, i gna nén moyén d' crwère ça !
Elle ni s' léye nén augîyemint stoumaker, ci p'tite comére-là!
Ene ôte pouye qui l' vîye rossète qui n 'a peu d' rén, âréve tron-né en ètindant l'ton qu'èle a pris. Vos âriz dit in champète qui vént d' picî des maraudeus.
- C'est vos qu'a causé?
- Oyi, c'est mi. Et après?
- Après? Après, vos estoz ène pitite grossiére, ène mau èlèvéye, ène ... ène dji n' sais nén kwè.
- Si les pouyes savénn't rîre, dji rîréve ène boune bouchîye. C'est tot ç' qui vos trouvez à responde quand dj' vos dis vos vrais? Dj'è dîréve co bén d' z'ôtes pourtant.
- Afrontéye ! Afrontéye vormint. Mi, dji dîrè à m' Papa qu'i vos côpe li gârguète ! Là wez ! Dins l' bouyon qu'vos îroz !
- Les pouyes n'ont nén peu d' ça. Ele sépenut bén qu' c'est leu dèstinéye. Mins vèyoz come vos estoz mèchante, afîyes. Dji saye di vos coridgî bén djintimint, et tot d' sûte, pan! vos m' frîz moru pacequi ça vos displait. Is sont bén tortos les min-mes les omes, les feumes et les èfants. Quéne pèquéye ! Heureusemint qui l' Bon Diè a mètu les biesses sus l'terre po n ' nén qu'i gn'euche rén qu' d'èl mèchanceté.
Mimîye est-ène miète vive, mins dins l' bon fond nén si mèchante qui ça. Elle sondge à paurt lèye qui l'rossète a raison. Elle si rapinse tot d'in côp qui s' Moman lî a dit sovint : Quand on z'a twârt, i l' faut sawè r' conèche.
Ele ravale si ratchon deus trwès côps. Ça lî chène ène miète seur di s'escuser dvant ène pouye. A-t-on jamais vèyu ça? Ene djon-ne fèye, mi, ène djon-ne fèye (hem-hem), dj'a mèrité ène lèçon d'ène vîye rossète pouye et dj'èl' dwès r'conèche ! Ça n' va nén hein ça! Pourtant, faut dîre ci qui est, c'estait mèchant dèl' man'cî do bouyon. Pôfe biesse, èle arè yeu des bat'mints d'cœur. Et l'tchau d' pouye, assuré.
- Choûtez rossète. Dj'a stî ène miète lon en causant d' vos côper l' kiki. Dj'a pièrdu l'tiesse en vos ètindant, da. Dijoz ? Vos n'èl' pièdrîz nén, vos, l'tièsse si vos m'vèyîz voler ou ponre come vos ?
- Sia, sia, respond l'rossète qui n'dimande qu'à yesse amitieûse, d'abôrd qu'on n'èl' mârgougne nén.
Ele sait bén qu'èle berdèle voltîye come les vîyès dgins, mins èle in-me bén qu'on l' choûte quand min-me.
- Alons, n'è causans pus, m'fèye. Ci qu' dj'è n' n'a dit c'estait po vosse bén.
- Dj'è l' vous bén crwère. Faurè co qui dj' vos dîye mêrci d'abôrd ?
- In mêrci n'a jamais cwachî l'bouche d'à person-ne, èndon?
- Vos avoz todi raison. Mins, dijoz, est-ce qui totes les pouyes causenut come vos ? Bèbert m'a dit qui l'tchè d'visait ossi. Mins dji n'èl' vlais nén crwère.
- Hem… Li tchè, dj’in-me mia nén zè d'viser. Vaut mia st'aire qui d'mau causer et dj'a todi l'idéye qu'il a stron-né pus d'yink di mes èfants. Alons bon! Là qu' dji m' va co mète à brère en zî r'sondjant. Boutez m' vosse mouchwè d' potche qui dj' sofèle mi nez et r'frote mes ouyes. Dins tos les cas, i vaut mia vos d'mèfiyi di ç' qu'on vos raconte qui dèl' crwère trop rade. I gna tant d' blagueûrs et d' minteûrs qui n' si plaijenut qu'dins l'tromp'rîye. Les înocints qui les choûtenut l' bouche au laudge ont sovint à s'è r'pinti, alez, m' fèye.
- Ça c'est l' vrai Poupouye. Figurez-vos qui l'samwin-ne passéye, li p'tite d'amon l' Pohî, m'a v'nu sot'nu qui s' poupène estait pus bèle qui l' mène. C'estait ène fameuse minte. Djè l'a vèyu s' poupène, et dji sos bén sûre qu'èle n'avait dit ça qu' po m' rinde djalouse.
- Dji n' dis nén qu' non. Mins est-ce qui vos n' lî avîz nén raconté ène miète divant, qu' vos avîz in noû foûrau come ci et come ça? Vos savîz pourtant bén qu'èle n'a qu'ène pôve cote, lèye, po l'dîmègne et tos les djoûs, et qu' vos alîz lî fé awè mau s'cœur. Heim ! Est-ce li vrai ? Mimîye bache li tiesse sins responde. C'est lèye asteûre qu'a les lârmes aus-ouyes, pacequ'èle sait bén qu'èle a fait ène grosse pwin-ne à si p'tite camarâde et qu'èle l'a fait esprès èco. Li rossète pouye est tote pèneûse di vôye brère Mimîye et tote continte ossi d'vôye qu'èle si r'pinti.
- Alons, m' fèye, ni brèyoz pus. On z-a tortos ses p'tits défauts ; c'est d' sayî d' s'è coridgî.
- Dji sayerè Poupouye. Dji sayerè, dji vos l' promets. Mins vos n ' m'avoz nén respondu anawére. Est-ce qui totes les biesses causenut come vos?
- Bén, c'est-à-dîre qu'èles sont capâbes di causer. Mins èle ni fèyenut nén aler leu linwe come ène lavète au cu d'in pot, come tant des dgins qu'i gn'a.
Eles ni causenut qu' quand èles ont ène sakwè à dîre qu' vaut lè pwin-ne. C'est ça qu'on n' les-ètind wére.
- Mimîye ! Mimîye ! Eou estoz ? Vinoz m'aidî à dressî l' tauve. Habîye, vosse Papa va rintrer.
Li p'tite fait l' cène qui n 'a nén ètindu. Ele a co tant des afaires à d'mander à l'vîye pouye. Mins l' rossète cheut s'tiesse.
- Vos r'véroz ène te côp, alez'r'z'è aidî vosse Moman.
D'alieûrs, dji sos taurdeuwe, mi ossi. Wez, totes les ôtes sont dèdjà rintréyes.
En z'è ralant, Mimîye si d'mande si èle va raconter li scret à s' Moman.
Non. Vaut mia s'taire. Maman rîréve quétfîye? Pwis c'est-ène sakwè d'awè in p'tit scret por lèye tote seule!
Ele n'èl' dîrait à person-ne.
Ah! Et si on z-alait jamais l' mète à l' cas'role, li pôve rossète? Mon Dieu, mon Dieu, kwèce qui faut fé po bén fé?
Elle ni pout nén lèyî touwer ç'biesse-là.
Mimîye sospire : ça va bien yesse malauji à espliquer.
Comint faudré-t-i m' y prinde? Dins tos les cas, i faut fé bèbèle avou Moman po comincî.
- Si vos vloz, dji r'souwerè l' bagadge audjôurdu, Man?
- Dji vous bén m' fèye, dji sos-t-ène miète naujîye justumint.
- Si vos vloz, dj 'è l' frè tos les djoûs ?
- Non ho! c'est bon audjoûrdu qu' dj 'a mau mes reins ; il îrè mia dmwin.
- Sia, sia. Dji pous bén fé ça por vos, èndon ?
Ci côp ci, Maman dresse l'orèye. Comint fait-èle po z'adviner ç' qui s' passe dins l'tiesse di ses èfants ?
El' place di responde, èle met ses deus mwins sus les spales d'à Mimîyie, et èle li r'wéte dins les oûys en riyant.
- Qu'i gn-a-ti m' fèye ? Kwèce qui c'est qu' vos vôrîz bén m' dîre et qu' vos n' savoz comint vos y prinde?
- Mon Dieu Man! Comint est-ce qui vos fi.oz po z'adviner? Vos n' rîroz nén d' mi si dj' vos l' raconte?
- Rîre Mimîye? Gn'a pon d'embaras. Is n' sont nén fwârt maléns les vîs qui s'moquenut des pus djon-nes.
Is n' si doutenut nén qu' leu riséye fait jusse li minme effet sus in cœur d'èfant, qu'ène djaléye sus des térès fleûrs. Al' viespréye, èles sont co tote frisses, les fleûrs, mins qu'i rèle in p'tit côp pâr niût, et l' lendmwin on n' ritrouve pu qu'ène plante tote racrapotéye, nwarîye.
Vos avoz d'djà vèyu ça, èndon, Mimîye?
- Oyi Man.
- Hè bén ! là ç' qui les moquârts fèyenut des cœurs d'èfants, a-t-èle dit l' sinceresse en rabressant li p'tite.
Mimîye est bunauje.
Si s' Maman avait rî, èle ni lî aréve pus jamais rén conté, et ç' aréve sitî bén malèreûs.
Tandiss' qu' asteûre, èle a confiance, èle ni catchrè rén, jamais rén à s' Moman.
Fauréve valu qu' totes les Momans sèrénn't ossi fines qui l' sinceresse !