XXXII
Po l’ daîrin djoû
Quârt po yût’.
Sècundo a tèlèfoné : i-gn-aveût pus rén à fé po s’ frére. I-gn-aveût one deûzyinme dispouye : Silvin Peloso d’ Gob’tindje. Il aveût d’dja tèlèfoné al brigade di Djodogne, po lès sûtes à d’ner…
Yût’ eûres.
On piquèt a faît moussî l’ clèrc di notaîre.
« Â ! Vo-v’-là, vos. Dispôy li timps qu’on v’ ratind ! Donoz m’ vos copîyes ! »
Tot paf ; l’ome !
Rossète lî a faît one clignète pa d’zeû li spale dèl comissaîre, po qu’i n’ s’è faîye nén. Lucyin aveût comprind. Il a toûrné s’ tchaur sins motî.
« Bon ! Dji coûr adlé Jéjé, J’ qu’à tot rade ! »
« Vèyoz, Mwasse, come nos-èstans lodjîs, t’t-à l’eûre, i r’vénrè, tot d’ d’jant qu’ ç’ èst lî qu’a trové l’ preûve tot seû. I vos à d’dja rovî èt c’èst lî qui mètrè lès plumes à s’ tchapia !
Nouv eûres.
Li comissaîre a rabroké vente qui brute.
« Jéjé n’a nin r’connu li cène què lî à d’mandé di r’fé s’-t-auto dins lès fotos qu’ djè lî a mostré. Dj’a rachoné tos lès-omes. Nos lî alans monter one trape au soris. Vos d’mèrroz vécî po ténre li pot drwèt !…
Mwasse : « Quand dji rapinse à tos cès mwârts là, pace qui l’ fabrique Mèlote a sèré sès pwates ! »
Onze eûre on quârt.
Jéjé ratindeûve è s’ maujone, avou on’ ajent d’ vile ; il aveût l’ vèssète. Li mercédès a taurdjî paujêremint. Èlle èsteût bwagne d’one lumerote su li d’drî. One vîye tinrule mémé, dès blancs tch’vias s’a solèvé po-z-atraper l’ sonète. Èle n’a nin yeû l’ timps dè l’ djonde. Lès jandârmes ont sautelé d’ssu. Èlle a pièrdu s’ pèruque.
Li comissaîre s’a avancî avou lès fotos dins sès mwins :
« Docteûr Rik Carak, Dji supôse ? »
Onze eûres èt d’méye.
Tortos avîn’ rabroké al maujo d’ police, po fièster l’ fén d’ l’afaîre.
« Comissaîre lès rapôrts dèl labo sont-st-arivés. »
« Tapoz lès au batch, dj’avans bin faît sins zèls ! »
« Comissaîre, li colonèl Fouyin vént d’ tèlèfoner, il ont r’trové l’ dispouye da Dècrampes dins on p’tit floye li long dèl grande Djausse do costé d’ Ougârd. I v’s-èvôyerè s’ rapôrt… »
« Comissaîre, li minisse vos d’mande su l’ tèlèfone numèrô trwès. »
« Riclape lî l’tèlèfone à s’ nez. Dispôy qu’i tane mès-orâyes. Dji n’a pont d’ timps à piède. Li tèlèvision èst là po qui dj’ faîye one anonce. Il apudrè l’ novèle come tot l’monde. Qu’i vôye au diâle. »
« Â ! Mwasse, dji vos r’lève di vosse chârje di piquèt djusqu’à vosse pinsion ! »
« Mèrci branmint dès côps, comissaîre, Mèlîye va yèsse binauje, mins ci n’èst nin co ça qui va rècrauchî mès féns d’ mwès ! »
Rossète aveût finemint r’trossî sès lèpes, tot r’purdeût s’ place…
C’èst l’ cia qui d’meûre qui pwate li doû !…