L’ aiwe
Mouze rôle ses aiwes bén påjhûlmint
Tot tchantant s’ peneuse létaneye.
E cir, nol ouy d’ ôr ni cligntêye
Et l’ blanke beaté ni s’ mostere nén.
Sol corant del nute on froed vint
S’ a-st elevé, et s' laminter ;
Mouze rôle ses aiwes bén påjhûlmint
Tot tchantant s’ peneuse létaneye.
Ene sakî dispoy on ptit tins,
Louke cori l’ aiwe… Ene ascoxheye…
Et l’ pôve coir si djete al valêye.
Cloup ! On gros bouyon… pu, pus rén.
Mouze rôle ses aiwes bén påjhûlmint.