Estant èfants, bin vite on r'marque.
On waite, on choute et c'qu dj'fègeans
Nosse vie è va poirtè la marque
Po nos ruv'nu o cours des ans.
Nosse cervai r'sanne foirt à in vâse
Qui, po pus taurd, su va rimpli.
C'est à z'y mette, po enne bonne bâse,
Quéque tchônse du bai et d'bon por li.
Quand dju r'passans nôns tribollatches,
Dju nos vèyans quand dj'djouins co.
Nôns p'tits tracas, nôns sayes d'ovradge,
La nayiv'tè d'rusponses à tot.
C'est aux premîres du nôns années
Qu dju r'sondgeans, ca vî soye-t'on.
Comme si nosse t'âme s'rot ramonnée
A c'qui toquot nosse cœur adon.
On s'rutrúve co, ma frique, tot djonne.
Quand on d'mandot : « Quoè'c ci? Quoè'c cà ?
Cumint fait-on ? » Dj'astins à l'ponne
S'on nos lèyot dins l'embarras.
Çu qu dj'vèyins, sins connuchance,
Dju l'expliquins à fotche, à nœud.
On soriot d'nosse t'ignorance
Et g'djimitins les ovris veus.
Du bin mostrè, gn'è grand mèrite.
C'est s't'in duvoir à n'n'in manqué.
La qué ritchesse si on sème vite
Totes les bonnes grainnes à bin noquè !
D'lez les vîs djins, mîe qu'ad'lez mointes.
Dj'avins ruscousse po nôns d'braul'mints.
Quand i nos d'gint leus foisses duschinde,
Nos, dj'apontyins leu remplac'mint.
A quoè s'rot'c bon des prèambules
Po fé comprinde des p'tites questions ?
L'èfant s'runique à tote fônrmule,
C'est des exempes qu'i comprind d'bon.
I faut qu'i vèye, i faut qu'i coure
Et s'bon p'tit cœur su rèdjouit.
Sûr'mint d'connuche sudjet d'amour,
Lu Bon Dieu fait à l'ébauyi.
Avau l'labeur, gn'è rin d'parèye,
Çu qu'enn éfant put s'amîdrè !
Quand i ravize et r'cît consèye,
Là, i gn'è tant à li mostrè!
Duvant l'arègne, vèye ses apprêtes,
Cumint qu'elle tèche su fin rideau.
Aux mouches d'apis, q'd'idées à s'mette
Sus leus si bais et bons gataus!
Ostant qu'i r'luque, li, les capiches.
Olines, balouches, happe des pampions !
A l'aiwe, la trûte file et ramiche,
La rène cusônte, waspe à anwyon,
Dussus les aubes, l'ougeai qui tchante
Ses ravichants et gaiyes rufrains.
Qu l'solai luche, qu'i pluche, qu'i vente,
Tot l'amervie do cœur qu'i prind.
I dut aux plantes d'pus d'in côn d'ouye,
Dins les cortis et dins les tchamps.
Quand sus l'wazon, i s'cuverrouye,
C'est s'in tapis su ranov'lant !
Tint qu'à costè, les grains, lz'avonnes,
Montèt leu paume dussus l'fustu,
Et pu l'solai douc'mint lz'amonne
A dèbônrdè d'ônr et d'vertu.
Qué bons souv'nirs du sa djonnesse
Quand on s'tracasse pus taurd l'esprit !
S'il è po maisse des dgins d'adresse,
L'èfant aurè bramint appris.
Rin qu'à waitè bin hônt les stoiyes
Lûrtiè do l'nute, i srè fondè
Qu'à l'Ete suprême i faut qu'i coiye,
Sins sa Puichance, rin nu s'put fè !
Sicrît e moes d' avri 1930.