Vos n'f'rez jamais menti l'proverbe
Et vz'èci inque qu'a bin quate verbes :
— D's'y prinde à timps o duspaitche-tu,
Du trente-chi sônrtes, on put sônrtu. -
Enne feume su lance à fè sa pausse
Du londginè et cause et cause
Avu vègines, pus rin n's'è fait.
Choutez djà c'qu li bèle la gate :
«Nipais, tchausseures, sont dzos mes pattes ».
Elle ramoèrnie saint Pirre à l'mwai,
La farène manque et v'là qu'elle brait.
Elle dut asteure z'è n'n'allè r'querre,
Et l'feu dins l'for blamme po qu'on r'hère !
Les pouyes russont o cortigeai,
Lu tchin bin long rulance lu vai,
La vailée meule po sa brèschônde,
La troye rûtie enne nin trop tchônde.
Les p'tits couchès staurèt l'lessai.
S'on n'è rind pon, s'protch'ront t'tafait!
Lu tchet, sôntant su la gayônle,
Fait qu s'la dresse lu tot bèrônle.
La covrasse vint, sîte des pouyons
Po fé clapè tos les tèchons !
Les vatches rintrèt, totes awarrées
D'aver bizè et pon d'fourrées !
Po les lapins, i l'ont bin l'timps,
I n'brouy'ront nin auque po leus dints.
Co pi qu'in tour, gn'è la cavale,
Avu s'polain, comme in p'tit dialle,
Qu'ont bin zoublè oute des palis !
Du lz'allè r'querre, elle s'è fali.
Elle nu sondge pu à l'cabolée,
Djà amayée po sa potée !
Faurot r'nettiè, çu r'est sem'di,
Quand pônrè t-elle tchandgè les lits?
Inque qui ratind q'vos l'sucourîche,
Si vos taurdgez, f'rè dins sa tchmîche !
Enn'ônte rintère, c'cherrè, crottè,
Vos zè là deux qui s'f'ront spetté !
C'est q'po lavè d'pus q'leus massales,
Elle duvrè prinde lu drap du stiale.
Ca, à l'comonte, tohu bohu,
Çu qui d'meure net est duscozu !
Lu feu s'dustind maugré l'chofflate,
Crème ou butai ratind qu'on batte.
A carottant, elle s'è d'fûlè,
Scotè l'cordai d'vantrain mônd'lè !
Fronsses et crettais, fauquate à l'cotte,
Y patichèt quand elle djibote !
La bwée qui soue, là, o solai,
Volà qu'i tonne, qu l'timps d'vint laid !
S'rè t-elle chapée po fè s'cozatche
Et s'rustindatche, les nipes o batche ?
Po z'allè vite, elle bresse à tot
Et, contrair'mint à ç'qu'i faurot,
Elle tape, la m'vé, sus l'feu à l'asse
Tot in paquet du sètches dugnasses !
Lu pot prind dzeu. S'in tél fornai,
Ça brule… Pon d'aiwe ! V'là do crahai !
La pônve marinde qui la tracasse,
Va co fallu qu'elle la remplace !
Pa quoè ?… Les ûs sont tos vindus
Po des gagayes qu'elle s'est mettu !
C'est aux airées qu'i faut qu'elle vache
Et pus l'mettrè vite fonde la crache…
Dudins l'pacawe. Quate truques o pot,
Pailtée d'ognons f'rè braire sus tot.
Comme trôns aux tchausses, manquè la pausse,
Todis l'guignon s'è trûve la cause.
« Mon Dieu ! » crie-t-elle, duvant l'augeai,
Du vèye sônrtu spitrons d'tutai !
O pîre momint, su n'homme rintère,
Elle vorre et s'tchule: C'est l'feu, Mater!
Et c'li-là rît, l'suquè démon,
Dudins l'arroi d'toute la maugeon.
Choute, feume, disti, t'auros dandgî
Du farces pus rudes po q'ça vage mie.
Feu du tchminée tu r'sanne fel'mint.
Les sognes su f'gèt dins l'awarmint.
Sicrît e moes d' decimbe 1929