En plein mitan du nosse t'Ardenne.
Su trůve lu gros hargneu Libin.
Do l'noval an à l'Saint Etienne,
La bawirie par là s'ônz bin.
I gn'è des ci qu'i faut qu'on loye,
Des ôntes courèt, tos f'gèt faction,
Lu viadge, chaurré inte des grandes voyes,
Denne, là, l'exempe du s'mette d'action,
Libin, qu'è in grand territoire,
S'è cabônrè do bon costè,
Bin long rie d'l'Homme qui boèt l'Aiwe noire,
Lu viadge à l'lache ème libertè !
T'tavau l'grand fond aux deres brouyires
Et des sombes bouès, c'est l'leu voci,
L'coirbau volà. — Qué trisses orires ! -
Ç'aurot sti s' mette à leu merci.
Su l'plein do dzeu qu l'viadge cultive,
C'est si è r'pôn! Mais d'meru dzos
Et s'mau stiqué lu long des rives
D'enne aiwe du fagnes, d'abimes, ah, no!
Pa d'lez Transenne, Viance et Glaireuse,
Gn'è dous vègins, bons à coichè !
S'y trûve la Lesse o fond qui s'creuse
Enne belle courrate po z'y nadgè.
Waire d'aiwe o dzeu, quausu pon d'pinte,
Mais elle s'amonne tot bai douc'mint
Dins enn ètang. Elle put ratinde
Tant qu'in barratche nu s'y cherre nin.
Là, in molin è trouvè place.
Tot autou d'li, foirt habitè,
C'n'est nin presqu li qui s'dusplace
Po les monées, et s'est haurdè.
I s'parètrot qu l'viadge est ritche,
Aux grosses maugeons, on catche des sous!
Po ça, d'lez l'huche, su trûve enne nitche,
L'gardien s'mostère nin bon du tout.
Waitez à vos, ca c'est s't'in féle,
V'pônrîz quéqfie v' fé hagnè là !
Vos n'saurez nin s'la d'meure est belle
Des seigneurries, r'lancé comme ça !
Lu sol est bon et waire à ruques.
La plave lu mouye sins l'aderri.
C'est l'vrai terrain po v'nu des truques,
Gn'è nin mèzônye du les tchoisi.
Voci, la meute est pleinne d'aldrouffes
Et chaque rupas est si vite fait !
Ossi, tot truque, il è galouffe
Lu ci qu'on leme - raweu d'ochai. -
Mutoè qu'on put s'passé n'notaire
Méd'cin, l'banquier, l'gendarme, est-c'bon ?
Habie, Libin, l'vétèrinaire!
I s'fait qu l'ci qu'y denne su nom,
Duvint dônvisse, i pîle, gn'ahûte,
Po in p'tit mau qui s'lètchot d'vant !
I quirre, i node dins possons vûdes
Po z'y trovu drogues et onguent.
C'est totes grimaces au pus comiques.
Il aboule même d'ônr in bai son !
I n'vut connuche qu sa musique,
Mais s' groulatche fausse o diapazon !
Si, avu l'pîd, on vu l'fè taire,
On crie : « Charogne, va's duguèrpi ? »
Il è n'n'irè r'passè ses airs
A l'taque! Tehessez'l rie do tapis.
On n'n'è pon d'sogne, à l'apparence,
Il est q'chinè d'pus qu'i n'faurot.
Dins ses siarvices, gn'è des soffrances.
I r'cît affronts, des cômps, c'est d'trop
Ca, s'il atème, i sét s'dusfinde.
Quand l'enn'mi fait peurre à Libin,
La garde est là po n'su nin rinde,
Bawe po garè l'leu su Maissin.
C'est s't'in matin, da, i s'rèbelle
S'i gn'è dandgî qu'i soye mèchant.
Ôntrumint, c'est l'ami fidèle
Qui s'lairot batte pa enn'èfant.
Ça n'lî fait rin à li s'on l'blague.
I s'fie sus s' maisse, i n'connut q'li.
Comme po in bouès, si l'mwais s'elague
C'est l'bon qui d'meure rud'mint poli.
Sicrît e moes d' måss 1932