Aurvaye su trúve dins enne èchancreure.
S'apinse in s'crit[1], lu lum'con la v'lot,
Autou do viadge, i gu'è des hônteures,
Mais d'in costé s'afonce in goulot,
Vallée à r'pôn, sins frûzion s'i bige,
Po ça, les cresses su covrêt d'grands bouès,
Tint qu l'solai, la douce air ont prîche
Po nos t'ni tchônd dèrant les ders moès.
Dju plans vantè s'gritcheu territoire,
Du nosse canton, c'est li l'mie mettu.
Comme à l'Ardenne les hivièrs sont foirts,
L'si bon coin denne plaigeance aux stindus !
C'est nôns ancêtes qu'ont djouè l'bai role
A s'cafônrant frileus'mint dins l'fond.
Lu viadge s'è fait comme enne caracole,
Naturel'mint, en lodges du lum'çons.
Mais les Borquins, s'fiyant s'Hurtubige.
Su sont mèlè d'grandeures. Po l'solai,
I l'ont grignè ! Leu ville lu mèpriche !
Duvant leus huches, la glace tint, s'y fait,
Les foisse longtimps à mette des galotches,
Do gaiye prétimps, l'savèt pa l'coucou.
D'Lorcy, sa voix sonne, c'est la bonne clotche,
L'sonneu y tchante à fè l'Borque djalou !
L'humeure do monde è bazè l'entente
Po r'paurti tèrres et fonzais dins l'timps.
Les traites coirbaus ont volè à bande
Dù q'c'est la plainne, sins soucis des tchmins.
O sol, leus ées n'perdèt nin attatche.
Qu'i gn'oye do l'place, zais, u qu'i gn'oye pon,
N'ont nin craindu des royais d'paurtatche,
I v'lint pèpiè les s'minces do l'région!
Oute do l'noire-aiwe, s'les thièrs, aux vallées,
Plainnes du brouyîres, c'est sti tchins et leus.
Au respect d'l'Homme, nosse pastere haurdée.
Mettus d'costè, hagneus, piyardeus !
A places rustiques, vilainnes sauvadges biasses,
A bon endoit, des êtes dous et bons.
Et c't'arrandg'mint pris po la sorface,
On s'è plottè, binauges, dins les fonds.
En vèrité, l'lum'con è veu clér,
Quant tot douc'mint, sins l'vèye manœuvrant,
I s'è mettu quitte du ses compéres.
Sins zoupralè, r'esse fel conquèrant !
Précautionneu, l'è sî ses idées.
Delicat, attachant comme il est !
Rintrant ses coines fû des tripotées.
Il è tracè s'bin, i s'yè collè.
In'n'è chapè dz'ontes gueuyant s'l'orîre?
Des vais tiastus, vireus maumurvins,
Bonnasses piardus aux soyons d'brouyîre!
C'est nosse pandâre tot nu qui les d'find !
S'les carnassiens, i s'y prind par douceure,
I denne sa tchaurre et spaugne les tèmoins !
L'crau zigue plait mie g'do fiè d'accopleure,
Mais l'è r'naqué des pris do l'mwaiche foim.
Vlà don l'lum'con, fin, mér long, s'sa terre.
Ni djin, ni biasse à l'duscollè d'fustu !
Pon d'ètrandgie v'nant l'waitè d'travière
Quand i tchafie u doime tot bodu.
Les routes, les trames, qu partout on r'quîrre
Po zallè vite, i n'n'è q'do dègout.
Aux awarreures, n'y lûrtiant pon d'av'nir.
I s'rônle à l'dgîse, coines po verrou.
I fait mo bin! C'est mau c'qu'on ravaude.
Dins waire du timps, v'l'allez vèye volè.
Nos, djonnes lum'cons, po qu l'ciél nos haude,
Dj'astans c'toirdants po s'aberdallè
Dins l'fond des airs pu hônt q'les coirnayes.
S'les ougeais d'fièr ! On s'plaq'rè sus tos,
Mais dj'nos lairans cheurre sins tchoque à Aurvaye,
Pa c'qu c'est là q's'atertint nosse dos.
riscrît e moes d' måss 1930