po scrîre en wallon
Dju c'mince pa v'dire merci du bin bon cœur
Po tote l'aidance qui vz'è pris saquants heures,
Ca, in s'fait q'mi, duy'nu vî buquè,
D'vot v'fè bisquè po z'apontiè l'suquè.
V'ponriz pinsè, qu'après ça, dju v'rovie
Et q'd'esse fessè, dju n'n'ai pu waire l'envie
Po fè des rimes ? Vos n'quittez nin m'n'esprit.
Mi, tot mér seu, nolu n'aurot compris.
Supèse lignasse qui n'est nin duscramiée,
C'est maumonate qui dut c'esse aflulée.
Lu monçai d'grain battu è dandgie d'van :
I faut sauclè l'cortigeai mointes côns l'an.
Dju l'ai r'connu avu nosse Pônrminade
O bouès -, sins vos, c'n'aurot sti q'do l'cramiade.
Des ans après l'aver rucatournè,
Elle s'espellit po do wallon d'nosse tèt.
Dju sondge à vos à querrant à dire djusse.
Mes nots d'clitehès, l'mie qu di'put, dju lz'adjusse.
S'i l'è vont d'byaire, s'cutoirdèt bizar'mint,
C'est, q'sins critique, l'y faut grignè des dints.
Po la grammére, la musique et l'algèbe,
Ces fringantes-là s' gadrouyerint dins mes régues.
Mais po ovrè, aye ma foè, dj'm'y connut
Mie qu'in savant qui saye d'y parvunu.
I gn'è d'mes rimes qu'i faurè z'esse ovrie
Po les comprinde et dire çu qu'elles ont d'vie.
S'put q'des callès nu vônrint nin waite
C'qu'in simpe cervai s'è permis d'y boutè !
Vos, par bonheur, porsigeant vôns études,
Vos z'avîz bon du r'viqué nosse vie rude.
Et vz'accoirdez qu dj'causeuche en lum'çon.
— Tossaint, ônt'mint, mu stroprot l'gargasson. -
Mais v'ci c'qu'arrive : si di'tape après les feumes,
I s'fout à rire et fait la here apreme
Quand il avoue qu Lonie è bin fait.
I faut q'tchèquin su lèyeuche dire ses vrais.
II.
Comme po c'qu'è sti imprimè s'enne gazette :
— In long rimatche qui d'mande enne rusponse nète. —
Ça vaut les pônnes, i s'adgit d'in djambon !
Tos lz'Ardinoès è pindèt o crampon.
Nosse rimeu vut qu s'soyeuche auque du rare.
I dit q'po inque, on fait do tintamare,
Qu l'ci qui l'è l'tambourine du s'chapau.
Qu l'viadge dut s'épe la tchance qu ça li vaut.
Qu'on djalous'rè sa djônye et sa marinde,
Qu'enfin, c'ti-là è d'quoè, là, po surprinde !
Nu c'taye t'on nin des milles pattes avau-ci?
Et pus, l'rovyisse, i sondge aux pônfs, wai-li !
I lz'y réserve, du s'djambon, la coyine !
I n'su gêne waire po s'crîre c'qu'il imadgine.
Et, po l'gaztie, i n'nos c'nnt nin, dandgreu ?
Vut-on nos prinde sins fierté et peuyeus ?
Nos mèprigè, su moquè d'nosse langadge,
Dire aux èfants pu dj'dumerans sauvadges ?
Qu'i s'apougninchent aux maisses qui s' mèlèt d'mi.
Zais s' dèvouèt po l'patois, c'est l'ami.
Ligez leus lives, grandiveus, vz'aurez r'plique
A vosse coyine. « Elle nu vaut nin enne chique ».
S'apinse Tossaint, à l'soquate do Noyè,
Quand i ravize dů mes paumes s'asployèt !
Si dj'cause du battes et d'fautcheu, c'est qu'on m'serre,
Pari! On m'gougne po qu'à l'raison dj'm'y hère.
Enne bonne zévenne, ça n'saurot q'fé do bin.
C'est des burtales o pantalon qui d'chind.
Comme à c'qu'on met d'solide dins les bâtiges,
On waite du près po n'nin dire des sottiches.
scrît e moes d' djun 1933