Dj'ans in pays qu'è si belle mine
Pa ses hônts thiers qu'on vè du d'long !
I n'put ainsi mostrè q'ses chines,
Marquant qu'inte z'elles su truve les fonds
Des ravichantes vallées d'Ardenne.
C'est d'l'abaumeure lu long d'l'estè
Pa ses bonnes fleures qu'à ruchai denne
Aux monches d'apis du quoè fiastè.
Des rotches lauvau, v'ci c'qu'on z'assûre :
D'enne cornue grotte, rèche du parot,
Marie d'Gobaye avot dgîse sûr.
— S'n'esprit rôde co dû l'dumerot. -
L'Homme l'amidjolle, chûle quand i passe.
Pus mousse aux ponts do l'ligne d'Erlon.
A l'Goffe des tchfaus, i s'y ramasse,
Zoubelle les pîrres, cranquie tot l'long.
Dou bru, pus hônt, d'lez les fontainnes,
L'aiwe y est clére, l'crusson s'y plait.
Crawyant, c'sôntant, in bie y drainne
Tot les p'tits soures v'nant d'aux hourlais.
I trimpe bîgées; framouges à spande;
Dins les fraules près tot raclônts d'bouès !
Pa l'ris, l'ombrire, la vallée tente
Djolliées du fleures les bons tchônds moès.
Là elles ont tot po les rinde belles !
Comme i l'è d'vint z'esse amoureux,
Les bons vîs hommes à trèche du z'elles !
Z'y fé des bies, niv'lè les creus !
O Près-de-Thièr et à Gobaye,
Sus des Ôntes près, mette l'aiwe au d'pus.
Vraie djouichance dins leu travaye
Et ça pus d'four ainsi d'trovu.
Quand c'est l'warnu, les grands tchaleures.
On z'è si bon d'râbiè aux près !
Nutes rupoisantes, totes à moiture,
R'lugeantes rozées qu l'solai boèt.
Dins c' qu'i l'avint, là, d'cafônrrie,
Nons dgins y f'gint si bai fènau !
Qué somme o bouès tint qu l'four grie,
L'bon r'pas ossi durie la fau ?
Asteure, on vè q'ces âmes si simpes
Astint sensibes. A s'rascontrant
Po r'paurti l'aiwe taurd u trop timpe,
I s'ascropint tot à paurlant
Do ciél, do l'vie sus tèrre, d'oradge,
Miot qui plane, toune, rubondit,
Ougeais r'connus pa leu choufflatche,
Hope d'in chevreu passant dzeu li !
L'ci qu'è connu ces vis ancètes
Put co ramette leus sintimints.
Po leus minées, i trovint r'mèdes,
Des thés floris, l'è v'lint bramint.
I n'aurint nin volu po d'l'ônr
Tchandgè leu vie et dèbusquè
Des près, des bouès, du leus cabônres
Faites du wazon sus quate piquets.
Si on n'sêt pus ainsi les sîre
Dins c'qu'i croiyint todis d'meru,
Zais, qu'à leus près, dzingnint les pîrres,
Pinsant léguè des bous av'nus.
R'vint leus souv'nirs, leus bons exempes,
Leu foi en Dieu. Allans comme zais.
I l'ont fait l'mars, nos, dj'ans septembe
Po vèye tortos nosse payis bai.
sicrît e moes d' fevrî 1930