Pa in bon pècheu, dj'vons saver pa què z'instrumints on pèchot do timps d'nosse fine djonnesse du vîs hommes. C'est avu c'qu'on z'avot imaginè d'vant, bin sûr, et ça nos oblidge à pèchè bin fond dins l'histoire.
D'après nosse pècheu, i gn'avot pon dattrapes dins l'vî vî timps. C'est po fè passè des ci qu'il è connu po capabes qu'i dit ça. I n'è sèt nin pus q'nos d'adon, mais mettans nos d'accoird. on s'siarvot d'ses moins do timps d'Caïn, d'Abraham, du Tobie, du Napolèon et i paret qu'on s'è siave co do timps d'Perpéte. Lu tour d'apicè è d'meru bon et dj'avans dit q'lèyi chapè, c'astot tant mieu, mais nin la tote pètite dja o tchèna q'on r'tape du frousse des gendarmes et qu'est tote garnouyée.
I s'put q'Caïn, qu'astot dèmon et rûzè, s'è dit qu'i happrot d'pus d'pèchons, sins moussè à l'aiwe et d'grettè ses belles grosses dônyes avu enne espéce du bonate du choisse amantchée o coron d'enne baguette du frêne. Avu l'adresse qu'il avot, in pèchon qui s'mostrot fû d'laiwe su pl'ot fé agayônlè comme in pampion. Abraham s'è siarvu d'enne banslate, vu qu l'monde mettot la sciyince à profit.
Noé, vormint, n'avot pris q'totes biasses appattées dins s'batai. Po des pèchons, ç'aurot stî enne loign'rie du sondgè d'les pèchè et d'les sauvè avu lz'ôntes do Dèluche ! Mais, li et ses dgins, il fallot qu'i viquinchent ôntrumint qu'avu do four et do strin. I faut qu'on s'sutope. Enne pètite fricassée fait todis plaigi, et on ois'rot bin dire qu ses pouyes et les canes du ses canards n'astint nin foirt animées du ponre sins trovu des pirichates et des vièrs. Cumint n'aurot-i nin comptè s'les pècheus, don, Noé, ainsi ? Apaitchè d'pèchè d'mau mettu, pusqu'il aurot bin volu avu les moins, et tentè d'vèye tant des pèchons qu'èmèt mie dandgreu lu dzeu d'l'aiwe qu l'ferfond, il aurè amidrè la bonate da Caïn et trouvu in bin bon tour u deux don Abraham è profitè. Ontrumint, c'aurot s'ti in ninasse.
Do timps d'Jonas, i s'è passè in fait unique, affère du pèchlottrie. C'est l'prophéte qui, po n'nin piade enne chique occasion d'pèchè, è manquè à s'duvoir d'allè praitchè pènitince à Ninive. I sondgeot tot d'même aux pèchons po fè carème ! I s'è embarquè et les matlots l'ont tchauspougnè et l'foute à l'aiwe po ses allures du maumurvin. I n'aurot seu naigè foir long.
Tot à s'sot'nant, il aporçuvit in gros dèmon d'pèchon qui approtchot, — dj'ai manquè d'dire ventratère —. Ma foè, Jonas s'è fônrè à l'idée do l'tiasse qu'i s'rot s'sauveur à li grippant sus l'dos et l'tirè pa lz'orayes po l'fé bratchè sus l'boird do l'mér !
C'n'astot nin co si mau tûzè. Mais, v'là, wai, qu l'pèchon l'avize et drûve enne gueuye pus grande qu la ci d'in for ! Jonas fuchit si sbarè, qu'il è fait tot l'contraire qu'il aurot d'vu sayè d'fè ! L'fôn tissot s'è lèyi hemè pa l'pèchon !
Mais sa présince d'esprit l'yè ruv'nu à timps. Il è passé comme enn'allemoire inte les tchafias do l'balène po moussè s'garanti dins l'gargasson du n'su nin leyi greumé ! Chapè d'ça, i s'è tchonquè, s'glissè, s'afondré po trovu enne place passabe qu'i s'rot bin po s'rapoisè.
Quand i s'è rawayè, l'paresseu, il è volu s'racrampotè, après aver sutindu ses djammes et ses brès, comme on l'fait duzos les couvèrtes. Ses laids gnoz, sa vie stritchante tiasse, ses affiyants ceudes, tot si bin q'ses fesses à lame, ont fait mau o pèchon, qui n'è pu volu l'haurdè dins l'océan, ca i l'è r'naquè comme i l'avot galoufè, tot rônti, sus l'boird du l'aiwe. In monsse parèye, sus sintant tchaurgougnè dins l'vinte, p'lot aver lu scrupule du s'dire qu l'homme pècheur pèchè astot trop maigue, trop coine et trop rèche, mais advinans q'Jonas lî avot fait aver des coliques sins lî d'nè do l'paudrome.