«Cuique. Pougne a l' cawe! Cuique! Pice à l'oraye. Cuique!
La coide à l'patte li plait mie q'la bèrique.
Lèyans l' sônrtu ainsi tot bai douc'mint.
Dussus l'pas d'l'huche, tu m'aidre là seul'mint
A l'supanslè », dit l'toueu à Batisse,
In grand djonn'homme, aide bônrai o suplice.
«Tins, vos l'là dju ! Passe'mu l'coutai
Et s'monte dussus, sus l'timps qu dju l'cotch'rai ».
L'gros mayi crie, il ameute la coirnée,
Tos les gamins aboirdèt à l'saignée.
I gn'è les feumes qui rintrèt pitieus'mint,
N'sônrtant qu'adon, on n'ônrè pus l'cuiq'mint.
Ça dere bin d'trop ! L'toueu s'arme du sa lame,
La plante o côn, d'vè l'cœur, bourru o drame.
Po vudè l'sang, la plaiye, i l'agrandit,
I l'atertint, s'coutai forre dins les cris !
Don, qué c'tapadge, lu couchè en soffrance ?
Deux hommes lu t'nèt et n'lî lèyèt pon d'tchance
Du s'ragritchè, Les quate pattes su crispèt
A battant l'air djusqu'o dainrain hiquè.
Tint qu l'sang striche, in dèr cœur lu rasgote
Avu la paile, dzos la plaiye qu'on tchicote.
A mitan pleinne, i la vûde o sèyai
Qu'est prête djondant la banse po les boyais.
Lu blanc tchèna po z'y mette la dispouye,
Ça est bin stî, ca, dialle ni qu t'trifouye,
L'homme è djondu l'crachou o cœur bin fond.
D'vèye lu noir sang q'met la biasse à coron.
Po l'rodje boudin, elle è soffru martyre !
Lu ponf laid foute, on p'lot si bin l'aq'sire
D'in cômp d'mayoque, augimint l'aver dju,
Z'aver tot l'sang, s'rèdich'mint n'n'è spaurdu.
Lu toueu pique, qu l'comdanè adere
Su n'engonie, ca même elle s'rot si dere !
I put cuiquiè ainsi d'lez les èfants
Mo bin curieus d'vèye à l'tèrre couru l'sang !
Nu r'protchans nin aux vis toueus leus crimes,
Dju lz'ans aidè, fè l'toisime et l'quatrime.
Nos fallot bin s'in pourçai s'rulèvot,
L'coutai o côn! Trop cômus, on s'sauvot.
La cause d'enne farce, c'astot todis nos ôntes.
L'toueu, dermint, i fallot qu'il è sônrte.
C'qu'on conte voci, c'est l'touadge du d'dins l'timps.
On vos l'ramèt tél quél qu'on s'è sovint.
Si c'est tchandgè en mie à la bonne heure !
Dju v'lans co bin c'qu'est s'goirdgè sins douleure.
Taise qu'aye, asteure, t'è des bons saucissons.
Do l'tiasse pressée, bonnes fesses à mon Tchampion.
Ça est marquè: «O singlè des Ardennes ».
C'est augi d'vèye si c'est d'ci-lalle qu'on t'denne.
V'là l'couchè moirt. Wai, les belles sônyes qu'il è !
L'toueu sèt bin comme les coibgies les v'lèt.
I les arrauye, lessées à enne tchuvie,
O côn, s'la scrine, i gn'è q'là qu'i toirchie
Totes les pus grosses, ca ônte paure, c'est trop fin,
Disti, sus l'timps qui chaurre sur z'elles do strin.
Couvèrte qu'è sônrte do côn enne bonne flammée
Qui rostich'rè à d'mée les ci d'mèrées.
Lu toueu, li, comme Batisse, toitche à feu,
Fègèt la baube, nin si bin qu'o rèzeu.
L'coron des strins brûle par sus les onglates
Qui, tchôndes assè, s'lèyèt rauyè des pattes.
Po les gamins, tot ça lz'y sanne si bai !
Lu feu aux toitches ? Pouf pouf, dirîz, q'ca fait !
I v'lèt saye, on les traque aux orayes.
Lu feu y stoffe! Elles ratindront qu'on c'taye.
L'couchè r'tournè est r'griyè comme i faut
Et pus on l'lave à l'aiwe tchônde tot avau.
Tint q'nosse Batisse s'crotte lu cûr pa la brique,
Et qu l'toueu rèze à fond tot c'qui r'pique,
Feume denne aidance, savez asteure, vormint !
Les ingrates dgins n'v'lèt pus sinte les gamins !
I gn'è mie q'zais po vûdè l'sèyai d'aiwe
A fait s'les poèls, tos r'pairès, s'on les raiwe.
Nu rovians nin cu qu'on z'apoite adon?
Au moins deux vèrres du pèquet bine à pon !
A deux bônrais! Pa la gote, on les r'paule
Tint qu'i hiz'lèt leu victime sus la taule.
I fallot vèye potot l'toueu d'Libin !
Li, i s'sègnot d'vant d'duv'nu assazin !
Diche mille toueries avau l'viadge, qué c'sainn'tées !
Comme à Aurvaye, s'n'allure astot r'waitée.
L'pourçai sus s'dos, Batisse dumeure dulez,
Lî chaurre les pattes po c'qu l'toueu va fé :
D'in cômp d'sa lame, i l'yè drovu la panse !
Et c'momint-là è fait fini enne transse.
I gn'è la feume qui s'rafie, l'premî d'tot,
D'saver quante dèts s'crachou è d'laurd sus s'dos ?
Elle nu dère nin du l'dîre à sa vègine.
A tot s'tindu, c'est sa crache qui taquine.
L'boutchie ruspond : « Ai-là ! Allans à fait.
Lu tène m'avîre qu'i n'n'aurè in monçai.
Ah, bin tant mieu, dis s't'elle, on s'fout do l'tchaurre.
Dju l'ans nourri po z'aver do spès laurd.
Mènadge du feumes m'è fait dire à l'estè
« Dialle ni l'pauquie, po s'fiè à tchafiotè !
Po do l'fristouye, vaut mie féves et salaudes,
C'qui bagne à l'crache et qu'i gn'è c'fé qu dj'paute ».
Autou des tripes, lu djonn'homme et l'toueu,
Du c'qu'elle cutape, s'sohaitèt trintches sus l'feu.
Lèye toune lu pid et l'vî dit à Batisse :
«Tè ci dzos l'nèz l'mèyeu parti qu'èxisse.
Si t'ème comme mî c'qui fait gotè l'minton,
Ruluque la ci qui n'suce nin les crètons ».
Batisse nu dit aye ni no du c'qu'i tûze.
L'ônte nu djause nin à malvau ni par rûze,
Mais qu'i hatcheuche lu gargasson d'en d'dins.
Ces bûzais-là à l'cass'role, on z'y tint.
Dumoin, dins la dispouye, lu der et l'mol
Auront enne sauce qu tot l'monde è raffole !
In pôn d'pasyince. La feume waite duscrachè
Çu qu'enne trip'rie fait d'sèyin o couchè.
Gn'è d'pus aux pans et do l'rawète à l'toiye
Qu'est, là, chaurrée, vos dirîz do l'rantoye !
Mais lu tchet guaide, on n'sèt s'mette quitte do tchin.
Ah, les pansus ! C'est la misse qu'on ratind !
Ca, po l'amér, c'est si fiel qu do boque !
C'est si puant qu do côn l'nèz s'sutope.
Gn'è q'ça d'tapè voye, dins tant d'bine à pon
Do crau mayi qui s'lait pinde o crampon.
Wai, q'totes les feumes sont v'nues s'enqui do l'crache !
«L'è faut à l'djotte et à tos les miche-maches ».
Leu dîre. L'dèsir do l'tchaurre, in pôn ossi.
Mais enne protesse: « Ni mèr, ni crau, sése, mi ! »
L'toueu, adon ? Bin, chofflot la véchie !
Deux dz'elles allint avu la banse o bie
Po bin nettiè les tripes et l'gros satchai,
«Boudins, hatehisse, c'est si bon, dj'y vairai.
Et dit Batisse à l'djèneuse à catchette.
Nu f'gez rin vèye, l'toueu, c'est s't'enne raguette.
N'fait q'du s'moquè des djonnes tot dû qu'i va.
Çu s'rot apreme si 'm'invitîz o r'pas ! —
Quand v'vairîz co, dis s't'elle, même à l'dispouye,
Vos m'f'rîz plaigi. Mi, vos m'temez à l'ouye
Qu vz'èmez l'crau! — Oh ça, disti viv'mint,
Dju cois q'nos deux, dju nos atindrans bin. »
L'lond'moin à nonne, on z'è fait l'duscômpatche.
Tranchè la tiasse o coutai d'vant l'mènadge,
Mais à l'solliate, s'cottè tos les ochais.
Dusfachè l'laurd à bague, lu tène et l'bai,
Fé deux djambons à chaque mintan do l'biasse.
Autou d'l'assiette, augimint, l'coutai trace.
I d'meure do l'tchaurre, qu'on c'taye à tos boquès,
Lu bai po les parints, v'plez l'rumarquè.
Tchaurre et boudins, dispouye vont à l'banslate.
On su l'ruvaut tot sovint bin li quate.
Ça s'poite do côn et on s'y trûve foirt bin.
Lu pu pônf lè lu côn qu'i n'touerot nin.
Voci l'saleu bin r'lavè à l'aiwe tchonde,
Lu bouès rinflè, ca s'put co q'saumoire sônrte.
Lu tonn'lie dit qu l'fond sûne maugrémint.
L'djon à l'raineure et même à tos les joints !
Il è ruscousse du fé mette des bons sèques,
Paltée du senne, pus v'voye aux calendes grèques.
On l'aurot fait à timps s'on l'avot seu
Co même hayir, sins s'fyè o toueu !
Porveu q'la gote tègne bon dudins s'gozie,
Li s'fout pas mal d'enn'embarras d'tonn'lie.
Les quate djambons, i les coigèle o fond
Y vûde do sè, l'laurd à coutches, bouchant l'rond.
Bônrès d'sanies duvant qu'i n'y moussinchent.
Poive aux djontères, taise, i faut qu'i salinchent !
C'est l'même à l'tchaurre, aré la ci d'boudins.
Des carbonades q'les toueus èmèt bin.
Po sa dringuelle, qu n'prind-t'i la cervelle,
Li, l'vî ? Elle su fricasse pa enne du z'elles.
Po s'chér ami, don, qu'è bon appetit !
Vz'onz co les pattes, la tiasse et quoè d'meure-t'i ?
A moins q'la linwe, vormint ! On soye, on c'taye
Po la djawée, lu bas-bètche et lz'orayes.
Lu dairain rond, qu n'rimplit t'i l'saleu ?
Tot ça balè et salè djusqu'o dzeu,
I gnè là d'dins qu'on pônrè tirè vite
S'on z'ème quéque timps auque du bon à l'marmite,
Trente et in djours, les faut bin aux djambons
Dins la saumoire, tot c'timps-là, i bagn'ront.
Pus s'ront pindus bins hônt à l'tchuminée,
Qu'on n'oye nin peure du lz'y lé enne happée.
Lu laurd ossi, mais i s'pind l'pus sovint
Dzeu l'huche do l'tchamme, tchaurre et androuyes dudins.
Pônrot-vali qu'on z'aurot tot s'plantchie
R'catchè ainsi ! C'qu'on met, c'est totes sindg'ries.
Coleure, papie, n'ont rin d'bon q'leu baitè.
Mais rin à cûre po t'si bin ragostè.
Et pus l'sèyin, don asteure, qu'on va fonde ?
L' mette dins des pots. C'qu'on z'y pouge, bèni-monde !
- Wète, cor in pon, dj'aurins roviè les r'nods ! —
Mais l'vî toueu yavot sondgè por nos.
On les fricasse lu djour des carbonades
Et on s'è r'lètche comme du totes bonnes griades.
C'est drole tot d'même qu'on z'è honte do couchè !
S'on s'crît pourçai, c'est s' foute dins la nich'tè !
Mais halte, savez ! D'gez'm in pon s'i v'gadouye.
Lu mau qu'i v'fait, si djà l'nom vos chatouye ?
Lu, d'mauhontiè, soffert du vons façons.
Po vos l'provè, vos z'èci des raisons :
C'est la bonne biasse djà do timps d'Epicure.
A c'qu'i praitchot, v'naurîz seu vz'y adure.
C'thomme-là, d'abônr qui prigeot tant l'couchè,
C'est q'tchin et tchet astint mî arrandgè.
Vos, si nareu, vz'ônz mo bon à l'marinde
Du l'sinte passé agostant dins vosse vinte !
Et, timps qu'i vique, n'est-i nin coradgeu
Et aderant, lu type do malhereu !
Quand don qu'i v'pwène, c'est raclônt dins enne bônre !
Çu couchè-là, l'niche pourçai, i vaut d'l'ônr !
Il ème d'esse net et s'è l'instinct plaigeant,
Po tant d'motifs du nos dîre nèglidgents.
Mais i n'protesse qu'adon, i dut fè cuique.
Et q'ca s'rot djusse qu'i nos crierot : bourrique.
D'enne façon, no, baudè, dju n'l'astans nin.
D'l'estimè moirt. S'on n'frûle nin d'ses grogn'mints,
On vorre ça d'pus atolidgè dz'ôntes biasses
Et li q'mérite d'aver la mèyeue place !
scrît e moes d' octôbe 1937.