Dins tote vosse vie, causez l'langadge
Qu v'savez l'mie, vos s'rez compris.
Quoè vut-on d'pus? C'est vosse t'ovradge
Qui dut monnè l'coir et l'esprit.
Nu sayez nin d'fé des tourneures,
D'vôns embarras, v'coire dins l'bon ton,
Mostrez-vos fiér do l'simpe paurleure
Po n'nin potchè fû do l'raison.
Quand on n'è waire suti à scole,
Lu timps qu'i faut d'vant d'travayè,
Ça n'vos f'rè nin tchandgè vosse role,
Mais vos aidè, sins vz'abrouyè.
Pa vosse patois, s'n'acostemance,
Vos savez dîre çu qu v'pinsez.
L'âme do clotchi pèse à l'balance
Po q'vos l'ainmiche tél vos l'causez.
Des grandiveus s'mellèt d'apprinde
A leus èfants in mwais francès.
Tot lu r'lugeatche qui l'y vont prinde,
C'est qu'on rirè d'leus quîrr après !
Qu'i s'dumèfyinchent voci do l'mônte.
Foirt en francès aterpris d'bon,
Ca, c'est foirt bon po plusieurs sônrtes,
Mais par amour, haurdans l'wallon.
Spitants Flaminds, faut qu'on v'louandge.
On v'zè morguè, vz'ôns réadgi.
Mointes, leu dialèque vos les dèrandge !
I l'mèprigè et z'è rodgi !
Mais i d'meurrè d'bonne récinée
Qu'est afoncée dins der terrain
Et qui s'rusème du grainne haurdée,
Trop viquant po tournè à rin.
Comme tot mènadge è ses manîres,
Lu pu p'tit viadge tint à s'patois.
Auque du li même, on put bin l'dîre,
Enn'hèritatche, ossi in doit.
Po l'appréciè comme i dut l'esse,
C'est du d'meru in pon rie d'li.
L'oyu r'causè d'inque qui v'rabresse,
Vosse djônye est grande d'è dîre ossi !
Des hommes savants, du franc mèrite,
Djausèt v'lettie l'patois comme nos.
Quî s'monne ainsi, qu'on l'fèlicite.
Il è l'esprit d'esse comme tortos.
Is'met d'niveau avu tot l'monde
Et, en ami, s'lait approtchè
Pa l'vî langadge et sins fausse honte
Lu respect s'haurd bin aboutchè.
Ça n'put nin prinde les sordîries.
On n'su tchandge nin à s'fé valu.
Lu cœur y manque à de l'babie.
Causè patois, c'est même volu.
Prouvè q'wallon è d'quoè s'dusfinde.
Waitez l'travaye, i n'ravalle nin,
Ca totes les moins duvèt s'è r'sinte.
On n'rodgit nin du c'qui est bin.
Paurlè francès, l'saver sucrire,
Est nécessaire fû des salons.
I vint à pon po d'gin à r'cire
Tot comme por vos si vz'allez long.
Qu'on s' tègne à ça et q'rin n'apaitche
Qu l'bon wallon n'vègne animè
Nôns rassannatches, lu cœur qui praitche
Po z'esse à s'nauge et po s'ainmé.
Sicrît e moes d' måss 1930