Dju n'sus qu'enn'ovri. Cumint ça m'è t'i v'nu du s'crire en wallon ? Dju tins ç'marotte-là du m'pére, qu l' Bon Dieu oye su n'âme, et d'tois professeurs du ma conuchance qu dj'cite pus long.
Tint d'ma fine djonnesse, poupa querrot à fé in bon scolie du s'niqdouye du valè, pus argayôn qu'ônte tchônse. Li qu'avot stî djusqu'à d'pus d' vingt ans dins les scoles à Namer, à l'Athénée et à mon les Péres Jésuites, récitot d'in trait des longs poèmes et connuchot l'histoire. Ç'astot plaigi du l'oyu lire totes belles pages des grands auteurs, avu l'idée du m'dumâdré, v'sintez bin ! Portant bin douè, li è volu sônrtu du scole et apprinde lu mestie du s'pére et du s'frère. In rude mestie, allez, qu l'ci d'tonn'lie adon ! Et i s'è v'nu atterrè à Aurvaye, in p'tit viadge des dères Ardennes. I s'plaigeot bin avu l'zovrîs et i m'digeot todis qu'i n'rugrettot rin d' Namer et qu'il astot contint du s'sônrt. Et bin, mi ossi, dj'voye les scoles aux cinq cent mille diâles, mu d'geotche, po m'contintè ossi d'nosse mestie.
Poupa ainmot d'causè s'wallon. I tchantot v'lettie les boquès des auteurs du d'pa lauvau. I n'n'astot fiér.
Dj'avot passè soixante ans quand dj'ai don sayè du scrire lu wallon d'Aurvaye. Dj'ai oyu, po m'dusgrochi, la tchance du trovu in professeur d'Aurvaye li ossi, qui m'è appris bramint à scrire et à m'fè comprinde des ôntes. I fallot ça po n'nin trop fé rire du mi des ci qui sont pointeus s'les régues.
Mais v'là, wai, q'les acouradg'mints mu v'nèt du d'partout, des ci qu'ont fait totes leus scoles et des ôntes. I m'faut cité voci les noms da Monsieu Bauvir, professeur à Virton, da Monsieu J. Calozet, préfet d'Athénée du Namer, lu fin auteur wallon connu, et d'Monsieu J. Haust, lu savant professeur du l'Université d' Lîtche. C'est mes maisses, zais, et dju les r'mercie voci, tot l'zy tirant m'chapai des dimègnes bin bas. I l'ont pris la vètche po m'sucoriè du n'nin todis les bin choutè.
Dju r'mercie tos les ci qui m'ont aidè dins m'travaye du r'querri les vîs mots, d'pônye Joseph Tossaint jusqu'à des missionnaires do Congo. C'est v'dire qu'i gn'è bramint qu'ont poussè à l'roue po montè enne dère gritchette. Ca c'est malaugi du r'trovu des vîes affères qu'on dirot bin racafônrées dins les rantoyes do guernie et co pus fel'mint arroquées! Dj'ai bramint couru et co travayè po scrire les vîs mots, les purs dictons.
D'aver longtimps ovrè dins les bouès, aux tchamps, dins les atèliers, ça m'è co aidè, afaiti. Monsieu Haust, li, è l'tour du dusterrè les vîs mots qui sourdèt d'enne tiasse comme truques fû d'tèrre. A l'place du crauwe po rauyè, il è v'nu quéques côns d'lez mi avu enne kyrielle du questions et i nos è fallu nos mointes po n'y rusponde qu'à mitan !
I n'è fallot nin d'pus po m'emballè, da mi, à mette mes bèrigues et t'ni enne plème avu in bètche po r'callè les r'trovus s'do papie !
Vos savez qu dins ltimps, les viadges avint leu sobriquet. A Aurvaye, c'est des lum'cons à caracoles et dj'ai volu luwandgè l'éte du douceure si mèprigè. Dju m'ai moquè, comme du djusse, des tchins d' Libin, des leus du Smu, des coirbaus d'Hatrivau, des vais d'Nauwin'ne et des Borquins, sins roviè les coucous d'Lorcy. Les saqués coucous, v'lant haurdè la maistriche dins nosse commune, ont volè dzeu la cresse do l'Bèyonle po s'allè rabatte dins l'ravière du Saint-Maurtin, comptant qu l'saint guerrier et l'Saint tchesseu Saint Hubèrt subarrint l'saint Apônte Saint Pônl, nosse patron ! I font don criè comme des possédès : coucous, coucous, toucoucous ! tint q'les dâbons d'lum'cons dumerrint coiques, stritchant moll'mint leus coines, tot d'mème ! Ça n'fait rin, vos vairez qu'i f'ront d'pus d'grimaces po s'rusponde.
On n'n'è djà veu quéquinques su r'dinguè s'la scène do patronatche d'Aurvaye. Dju vz'assûre qu'i savèt djawtè quand i v'lèt lu langadge du leus bons vîs parints.
Asteure, dju lais m'n'éditeur vos mette duzos l'nèz l'û q'dj'ai ponu, enne maigue wache, in pônf petit live dû q'djai sayè d'fè raviquè nôns bons vîs spots q'les braves dgins du t'ci haurdèt maugré les djonnes cî qui vônrint roviè leu patois.
Dju n'è dis nin d'pus. Ligez et waitez du r'connuche et d'ainmè l'Ardenne, ses bouès, ses tchamps, ses près, ses dgins, leus viquairîes et, o dzeu d'tot ça, leu flori langadge.