L’êwe
Li Moûse rôle sès êwes pâhulmint
Tot tchantant s’pèneuse lètanêye
E cîr, nol ouy’ d’ôr ni clign’têye
Et l’blanke bêté ni s’mosteure nin.
Sol corant dèl nut′ on freud vint
S’a-st-èlèvé, si lamièn’têye ;
Li Moûse rôle ses êwes pâhulmint
Tot tchantant s’pèneuse lètanêye.
Ine saqui dispôy’ on ptit timps,
Louk’ cori l’êwe… Ine ascohèye…
Et l’pauv’ cwérps si djète al valèye.
Cloup ! On gros bouyon… puis, pus rin.
Li Moûse rôle ses êwes pâhulmint.
Lucien COLSON