A bin s’ î prinde, rin du rmètu
Du trante chî sogne on put sônrtu.
Ène feume su lance a fé sa pôsse,
Après avèr rufêt sès tchôsses
Èt côzè do bê èt do lêd
Avu s’ vèjine. Pus rin n’ s’ è fêt.
Èlle è roviè d’ sognè la gade
Èt lèyot tot dudins sès flates.
Angoucheûse, mèt Sint Pîre al mwê,
Cand la farène manke o satchê !
Comint asteûre ènn-alè kère
Lu for èst tchônd, fôt dja k’ on rhère ?
Lès pouyes russont o cortijê
Lu tchin, bin lon, rulance lès vês.
Ène vatche ki ratind sa brèschônte,
La troye ki stôre sa tine trop tchônde ;
Lès ptits couchèts, tot leû lècê,
A-n atindant, spotchèt t’t-afêt.
Lu tchèt, a sôntant d’ sa gayônle
Fêt ku s’ l’ ârmêre, t’t-afêt bèrônle
La covrasse amon.ne sès pouyons
Po fè fracas dins lès tèchons.
Lès vatches bizèt, totes awarées,
Èt o rèslî, co pont d’ foûrée !
Fôrot rnètiè, c’ èst co sèmdi,
Cand pônrèt-on rtchandjè lès lits ?
Ink ki ratind k’ vos l’ sucourîche,
Si vos tôrdjez, frè dins sa tchmîje.
Ène ônte rarive, c’chèrè, crotè.
Âh ! Cès deûs la su front spètè !
L’ feû ki s’ dustind, pupont d’ choflate,
La crème ratind k’ on la barate,
La bwée ki soûwe, la o solê ;
Vola k’ i tone, ku l’ timps dvint lêd.
Et tant k’ i gn-è co do lâvadje,
Tant a rustinde, s’ on ‘nn-è l’ coradje.
Lu feû s’ rufêt, l’ pot su l’ fornê,
Ça brûle… Èt pont d’ êwe o sèyê.
La marinde po djins èt po biasses,
Va co falu k’ on la rimplace !
Mon Dieu, di-st-èle, comint ê-dj’ fêt ?
Ele vèt sônrtu l’ feû pa l’ tutê !
A ç’ momint la, sun-ome rintère,
So l’ timps k’ èle vore èt crîye : « mater »
Vla l’ ome ki rît, l’ suké démon,
Dudins l’ arwa d’ tote sa môjon.
« Choûte, feume », di-st-i, « t’ avos dandjî
D’ deûs, twas bones fârces po k’ ça vaye mî » ?
eplaidî avou ene djivêye di målåjheys mots, lijhåves vaici