Djë va vous cauzer dou toubak. Èm grand-pére èt m' pére estint fabricants d' toubak së la Smwas, a Poupan. C'estot in ptit viyadje dins la valée, in pô rafoncî. Les toubaks estint plantés dans les côsses au sud, an françès, on dirot « së l' adret ». C'estot ni éjî pou-z î travayî paskë c'estot fôrt an pante.
Coumint çk' on fjot l' toubak ?
Bin a pårti dou mwès d' mârs’, on mèlandjot les grin.nes dë toubak avë dou tèrô fôrt fin, a pô près in dé a keude pou wit’ a dî mètes cârés d’ coûtches. Tout l' mèlandje, on l' mètot dins des pots a confitëre dû çk’i fjot tchôd. Adon, souvint, c'estot së la tchëmnée. Après kékes djoûrs, on wèyot dja les grin.nes ki cmacint a djêrmer.
Së ç' tins la, on prèparot les coûtches. Elle estint nètiyîes. On brûlot min.me lë terô së des toles, k'on-z avot mètë lë fû padzo, pou lë rcoûre. Coume ça, on fjot crèver les ptites bêsses èt les mauvêses grin.nes èt tout çk'astot mauvês. Ça sintot bon dins l' viyadje. Dayeûr, pou les afants, ça sintot l' printans.
Vè l’ 19 dë mârs’, a l' Sint-Jozef, les ptites grin.nes k'estint djermées, on les smot dins les coûtches. On rmètot les cârôs së les coûtches pou aurder les toubaks a l'abri dou frad, hin, èt on les arouzot d' tanzantans.
Après deûs mwès, il avint poûssé d'a pô près dîs çantimètes èt tchake pitit toubak avot a pô près chîj a wit fèyes.
Asteure, il est tins d' les rplanter dins les tchamps. Mês les tchamps avint sté labourés; avint sté êrsîs.
Pou les rplanter, on prënot in grand markoû an bos. C'estot coume in grand rësté èt tchake dint estot séparé dë swassante çantimetes. On lë fjot dins les deûs sanses pou fwêre des cârés. Èt on rpikot les djon.nes plantes a tchake cwin. On n'estot ni a ëne bètchtée près. On rpicot, don, tous les djon.nes toubaks.
On-z avot a pô près 26 a 27.000 plants pou ën ectâre.
Tins des twas mwès ki chûvint, i falot les atërtëni. Don, i falot nètiyî les sauclins ki poûssint toudi ou pî des djon.nes toubaks avë in ratiswâr. On ratissot atèr les toubaks. Èt, come il estint ptits, i falot fwêre atancion pou n’ ni les spater. Èt dë n' ni les côper non pës.
C'estot d' la bzougne pask’ i falot toudi rëcmacî. C'est k’ ça poûsse vite, les sauclins. Mais ç' n'est ni l' tout. I falot co djètouner les toubaks k' avint créchë. Èt c'est ni rin non pës. On-z è les mwins ki colant avë l’ goudron k’est dins les djètons èt les fëyes. Dayeûr, i falot dou sulnich coume on djot ou dou Vim ou dou noir savlon èt sërtout dë l'êwe bin boulante pou s' dëcrasser. Ëne niche bëzougne.
A l’ fin dou mwès d'ayousse èt dèbët sètambe, on cmace la rècolte. On côpe les toubaks ou pî avec in côpou. C'è-st in ptit mantche an bos, k’ on-z è mètë ëne lame in pô triyangulaire ou dbout. Il falot pa des côps rbate lë côpou.
Cand les toubaks estint côpés, on les rassan.not a tas de chî u wit’. C'estot pës éjî pou les rmète së la tchèrète pou les mon.ner dans les hangârs. Pou les fwêre sètchi, on pikot les toubaks ink a ink së des boudriyots. C'est ëne pertche dë bos k’ i gn è des pwintes sins tésse en kinconce dissu. I gn è-n avot a pô près douze ou ptète in pô dpës pa boudriyot. Ça dèpandot d’ la laurdjeûr des pindadjes.
Lë deûs d’ nôvambe, après la messe des môrts, les oumes së tchindjint pou cmacî a dèpinde les prëmîs toubaks bin sètchs. Les fames marotint les bèles fëyes ëne a ëne èt les afants s'okëpint des ptites fëyes. On rassan.not les fëyes dë deus a twas pî d' toubak, sëlon leu grocheûr. On loyot la marote avë ëne grande fëye dë toubak. Ça fjot a pô près 30 a 50 fëyes pou ëne marote. Les tëlés, c'estot les fëyes k'avint sté cassées. On les afijot së des fins fils dë fêr k'on pindot dins les angars èt dins l' tins pa des côps së les façâdes.
A fwét dou marotadje, les oumes botlint. On mètot les marotes dins ëne bwate a botler, ëne sôrte dë kêsse an bos sins fond. On les dispôzot coume i faut. Ëne bote pëzot in pô dpës dë vint likos èt ça rprèzantot a pô près 320 plants. On mètot dins les bwates sèt’ marotes së la laurdjeûr, sèt’ së la spècheûr èt deûs së la longueûr. Tout estot bin fiçlé. Ces botes la estint vindëes a des fabricants d' toubak.
Dëvant d' vinde les botes, les accizyins vnint pou controler lë pwès des botes. Dëvant dë s'arnaler, i bëvint la ptite goute coume des trôs.
lî ås scoles di Bive (scole påzès scolîs) li 25 di nôvimbe 2025